President Rejects Mercy Plea: ଫାଶୀ ଖୁଣ୍ଟରେ ଝୁଲିବ ନାବାଳିକା ଦୁଷ୍କର୍ମୀ, ରାଜକ୍ଷମା ଆବେଦନକୁ ରାଷ୍ଟ୍ରପତିଙ୍କ ପ୍ରତ୍ୟାଖ୍ୟାନ

ଫାଶୀ ଖୁଣ୍ଟରେ ଝୁଲିବ ନାବାଳିକା ଦୁଷ୍କର୍ମୀ । ଯୌନ ରାକ୍ଷାସ ପାଇଁ ଭିଡ଼ାଯିବ ଫାଶୀ ଦଉଡ଼ି । ମୃତ୍ୟୁ ଦଣ୍ଡ ପାଇଁ ରାଷ୍ଟ୍ରପତି ଦେଲେ ସ୍ବୀକୃତି । ଦୋଷୀର ରାଜକ୍ଷମା ଆବେଦନକୁ ରାଷ୍ଟ୍ରପତିଙ୍କ ପ୍ରତ୍ୟାଖ୍ୟାନ । ୨୦୧୨ ମସିହାରେ ମହାରାଷ୍ଟ୍ରରେ ଜଣେ ୨ ବର୍ଷର ଶିଶୁ କନ୍ୟାକୁ ଅପହରଣ କରାଯାଇ ଦୁଷ୍କର୍ମ ଓ ହତ୍ୟା କରାଯାଇଥିଲା । ରବି ଅଶୋକ ଘୁମାରେଙ୍କ ନାମକ ଜଣେ ବ୍ୟକ୍ତି ଏହି କାଣ୍ଡ ଘଟାଇଥିଲା । ଏହି ମାମଲାର ଶୁଣାଣି ହେବା ପରେ ସୁପ୍ରିମକୋର୍ଟ ୨୦୧୯ ଅକ୍ଟୋବର ୩ରେ ଦୋଷୀକୁ ଫାଶୀ ଦଣ୍ଡରେ ଦଣ୍ଡିତ କରିଥିଲେ । ଯାହାକୁ ନେଇ ରବି ରାଷ୍ଟ୍ରପତିଙ୍କ ନିକଟରେ ରାଜକ୍ଷମା ଆବେଦନ କରିଥିଲା । କିନ୍ତୁ ମହାମହିମ ରାଷ୍ଟ୍ରପତି ଏହି ଆବେଦନକୁ ଖାରଜ କରିଛନ୍ତି । 

୨୦୨୨ ଜୁଲାଇ ୨୫ରେ ରାଷ୍ଟ୍ରପତି ଦାୟିତ୍ୱ ଗ୍ରହଣ କରିବା ପର ଠାରୁ ଏହା ତାଙ୍କର ତୃତୀୟ କ୍ଷମା ଆବେଦନ ଖାରଜ । ସୁପ୍ରିମକୋର୍ଟ ମୁଖ୍ୟ ବିଚାରପତି ଜଷ୍ଟିସ ସୂର୍ଯ୍ୟକାନ୍ତଙ୍କୁ ନେଇ ଗଠିତ ୩ ଜଣିଆ ଖଣ୍ଡପୀଠରେ ଏହି ରାୟ ଶୁଣାଇଥିଲେ । ମହାରାଷ୍ଟ୍ରର ଜାଲନା ସହରର ଇନ୍ଦିରାନଗର ଅଞ୍ଚଳରେ ଏହି ଘଟଣା ଘଟିଥିଲା । ୨୦୧୨ ମାର୍ଚ୍ଚ ୬ ତାରିଖରେ ଦୋଷୀ ରବି ଅଶୋକ ଘୁମାରେ ପୀଡିତାଙ୍କୁ ଚକୋଲେଟ୍ ଦେଇ ପ୍ରଲୋଭିତ କରିଥିଲା । ପରେ ତାଙ୍କୁ ଅପହରଣ କରି ୪ରୁ ୫ ଘଣ୍ଟା ଯାଏଁ ଶିଶୁ କନ୍ୟାଟି ସହ ଦୁଷ୍କର୍ମ କରିଥିଲା । ପରେ ତା’କୁ ହତ୍ୟା କରି ପୋତି ଦେଇଥିବା ଜଣାପଡ଼ିଥିଲା । 

ପୂର୍ବରୁ ଟ୍ରାଇଲ କୋର୍ଟ ରବି ଅଶୋକ ଘୁମାରଙ୍କୁ ଦୋଷୀ ସାବ୍ୟସ୍ତ କରିଥିଲେ । ସେପ୍ଟେମ୍ବର ୧୬, ୨୦୨୫ରେ ତାଙ୍କୁ ମୃତ୍ୟୁଦଣ୍ଡ ଦେବାକୁ ନିର୍ଦ୍ଦେଶ ଦେଇଥିଲେ । ପରେ ଏହି ମାମଲା ବମ୍ବେ ହାଇକୋର୍ଟକୁ ଆସିଥିଲା । ବମ୍ବେ ହାଇକୋର୍ଟ ମଧ୍ୟ ଜାନୁଆରୀ ୨୦୧୬ରେ ତାଙ୍କ ମୃତ୍ୟୁଦଣ୍ଡକୁ କାଏମ ରଖିଥିଲେ । ପରେ ରବି ସୁପ୍ରିମକୋର୍ଟ ଯାଇଥିଲେ ଏବଂ ସୁପ୍ରିମକୋର୍ଟ ବି ମୃତ୍ୟୁ ଦଣ୍ଡାଦେଶକୁ କାଏମ ରଖିଥିଲେ । ଶେଷରେ ବଞ୍ଚିବାର ଶେଷ ଚେଷ୍ଟା ସ୍ବରୂପ ରାଷ୍ଟ୍ରପତିଙ୍କ ନିକଟରେ ରାଜକ୍ଷମା ଆବେଦନ କରିଥିଲା ଦୋଷୀ । ହେଲେ ରାଷ୍ଟ୍ରପତି ରାଜକ୍ଷମା ଆବେଦନକୁ ପ୍ରତ୍ୟାଖ୍ୟାନ କରିଛନ୍ତି । ରାଷ୍ଟ୍ରପତିଙ୍କ କ୍ଷମା ଆବେଦନ ପ୍ରତ୍ୟାଖ୍ୟାନ ପରେ ଏବେ ସମସ୍ତଙ୍କ ନଜର କେଉଁ ଦିନ ଜହ୍ଲାଦ ରବି ଫାଶୀ ଖୁଣ୍ଟରେ ଝୁଲିବ ।