Delhi Demolition Drive: ରାଜଧାନୀରେ ବୁଲିଲା ବୁଲଡୋଜର; ପୋଲିସ୍ ଉପରକୁ ପଥର ମାଡ

ଦିଲ୍ଲୀର ତୁର୍କମାନ ଗେଟ୍ ଅଞ୍ଚଳରେ ଥିବା ଫୈଜ-ଏ-ଇଲାହି ମସଜିଦ ନିକଟରେ ବେଆଇନ ନିର୍ମାଣ ଭାଙ୍ଗୁଥିବା ବେଳେ ପୋଲିସ ଉପରକୁ ହୋଇଛି ପଥର ମାଡ଼। ପଥର ଫିଙ୍ଗାଳି ଦୁର୍ବୃତ୍ତମାନଙ୍କୁ ଘଉଡ଼ାଇବା ପାଇଁ ପୋଲିସ ଲୁହ ବୁହା ଗ୍ୟାସ୍ ପ୍ରୟୋଗ କରିଛି। ବର୍ତ୍ତମାନ, ଉକ୍ତ ଅଞ୍ଚଳରେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି। ରାତି ପ୍ରାୟ ୨ ଟାରୁ ଜବରଦଖଲ ହଟାଇବା ପାଇଁ କାର୍ଯ୍ୟାନୁଷ୍ଠାନ ଆରମ୍ଭ ହୋଇଥିଲା। ଏମସିଡି କର୍ମଚାରୀମାନେ ୩୦ ରୁ ଅଧିକ ବୁଲଡୋଜର ସହିତ ମସଜିଦ ନିକଟରେ ପହଞ୍ଚି ଜବରଦଖଲ ହଟାଇବା କାମ ଆରମ୍ଭ କରିଥିଲେ। ପଥର ଫିଙ୍ଗା ମାମଲାରେ ଦିଲ୍ଲୀ ପୋଲିସ ୧୦ ଜଣଙ୍କୁ ଅଟକ ରଖିଛି।

ପୂରା ଘଟଣା କ’ଣ?

ଦିଲ୍ଲୀ ହାଇକୋର୍ଟ ମସଜିଦ ସଂଲଗ୍ନ ଡିସପେନସାରୀ ଏବଂ ବିବାହ ହଲକୁ ଅବୈଧ ଘୋଷଣା କରିଛନ୍ତି। ଜବରଦଖଲ ଉଚ୍ଛେଦ ଅଭିଯାନ ଆରମ୍ଭ ହେବା ମାତ୍ରେ କିଛି ଦୁର୍ବୃତ୍ତ ସେଠାରେ ଏକାଠି ହୋଇ ପୋଲିସ ଉପରେ ପଥର ମାଡ଼ କରିବା ଆରମ୍ଭ କରିଦେଇଥିଲେ। କାର୍ଯ୍ୟାନୁଷ୍ଠାନ ସ୍ୱରୂପ, ପୋଲିସ ଦୁର୍ବୃତ୍ତମାନଙ୍କୁ ଘଉଡ଼ାଇବା ପାଇଁ ଲୁହ ବୁହା ଗ୍ୟାସ୍ ପ୍ରୟୋଗ କରିଥିଲା।

ଫୈଜ-ଏ-ଇଲାହୀ ମସଜିଦ ବାହାରେ ପଥର ଫିଙ୍ଗା ଘଟଣାରେ ଅନେକ ପୋଲିସ କର୍ମଚାରୀ ଆହତ ହୋଇଛନ୍ତି। ଚାନ୍ଦନୀ ମହଲ ପୋଲିସ ଷ୍ଟେସନର ଏସଏଚଓ ମହାବୀର ପ୍ରସାଦ ମଧ୍ୟ ଗୁରୁତର ଆହତ ହୋଇଛନ୍ତି। ପଥର ଫିଙ୍ଗା ଘଟଣାରେ ସ୍ଥାନୀୟ ସିସିଟିଭି ଦ୍ବାରା ଅଭିଯୁକ୍ତମାନଙ୍କୁ ଚିହ୍ନଟ କରାଯିବ। 

ରିପୋର୍ଟ ଅନୁଯାୟୀ, ମସଜିଦର ଅବୈଧ ଜବରଦଖଲ ହଟାଇବା ପାଇଁ କାର୍ଯ୍ୟାନୁଷ୍ଠାନ ଗ୍ରହଣ କରିବା ପୂର୍ବରୁ ସ୍ଥାନୀୟ ବାସିନ୍ଦାଙ୍କୁ ସେମାନଙ୍କର ଜିନିଷପତ୍ର ହଟାଇବା ପାଇଁ ସମୟ ଦିଆଯାଇଥିଲା। ପୋଲିସ ସେହି ରାତିରେ ଏକ ଟ୍ରାଫିକ ପରାମର୍ଶ ମଧ୍ୟ ଜାରି କରିଥିଲା, କିଛି ରାସ୍ତାକୁ ସମ୍ପୂର୍ଣ୍ଣ ବନ୍ଦ କରି ଦେଇଥିଲା। ନିକଟସ୍ଥ ପୋଲିସ ଷ୍ଟେସନରୁ ଏକ ବଡ଼ ପୋଲିସ ଫୋର୍ସ ଘଟଣାସ୍ଥଳରେ ମୁତୟନ କରାଯାଇଥିଲା। ଯେକୌଣସି ଜରୁରୀକାଳୀନ ପରିସ୍ଥିତିର ମୁକାବିଲା ପାଇଁ ଅର୍ଦ୍ଧସାମରିକ ବାହିନୀକୁ ମଧ୍ୟ ମୁତୟନ କରାଯାଇଥିଲା।

ଦିଲ୍ଲୀ ପୋଲିସ ବେଆଇନ ନିର୍ମାଣ ଭାଙ୍ଗିବା ନେଇ ସୃଷ୍ଟି ହୋଇଥିବା ଉତ୍ତେଜନା ସମ୍ପର୍କରେ ଏକ ବିବୃତ୍ତି ଜାରି କରିଛି। ଡିସିପି କହିଛନ୍ତି ଯେ ସକାଳ ୧୦ଟା ସୁଦ୍ଧା ରାସ୍ତାଗୁଡ଼ିକ ଖୋଲାଯିବ ଏବଂ ଅଞ୍ଚଳରେ ବ୍ୟାପକ ପୋଲିସ ମୁତୟନ କରାଯିବ।