Typhoon Kalmaegi: ପ୍ରଳୟ ରଚିଲା ଟାଇଫୁନ୍, ସବୁକିଛି ଛିନଛତ୍ର କରିଦେଲା ...୧୧୦ରୁ ଅଧିକ ଲୋକଙ୍କ ମୃତ୍ୟୁ

ପ୍ରଳୟ ରଚିଲା ଟାଇଫୁନ୍, ସବୁକିଛି ଛିନଛତ୍ର କରିଦେଲା । ଉଡାଇଲା, ବୁଡାଇଲା, ଭସେଇଲା... । ବଡ଼ ବଡ଼ ଗାଡ଼ିମୋଟରଠୁ ଆରମ୍ଭ କରି ମଣିଷ, ଜୀବଜନ୍ତୁ ସବୁ ଭାସିଗଲେ । 
ଭୟଙ୍କର ବେଗରେ ବହିଲା ପବନ । ମାଡିଆସିଲା ବନ୍ୟା । କେଉଁଠି ଭୂସ୍ଖଳନ ତ ଆଉ କେଉଁଠି ପାଣିରେ ବୁଡି ଚାଲିଗଲା ଶହ ଶହ ଜୀବନ । ଏଭଳି କିଛି ଘଟିଛି ଦକ୍ଷିଣ ଏସୀୟ ଦେଶ ଫିଲିଫାଇନ୍ସର । ଶକ୍ତିଶାଳୀ ଟାଇଫୁନ୍ ବା ଝଡବାତ୍ୟା 'କାଲମେଗି' ଏମିତି ଦୋହଲାଇ ଦେଇଛି ପୂରା ଦେଶକୁ । ଏବେ ସୁଦ୍ଧା ଏଠି ୧୧୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିବାବେଳେ ଶତାଧିକ ନିଖୋଜ ଅଛନ୍ତି ।

କେନ୍ଦ୍ରୀୟ ଫିଲିଫାଇନ୍ସରେ ତାଣ୍ଡବ କରିଛି ଟାଇଫୁନ୍ । ପ୍ରବଳ ପବନ ସାଙ୍ଗକୁ ଲଗାଣ ବର୍ଷା ଓ ବନ୍ୟା ବ୍ୟାପକ କ୍ଷୟକ୍ଷତି ଘଟାଇଛି । ଘରଦ୍ୱାର ସବୁ ପାଣିରେ ବୁଡି ରହିଛି । ପ୍ରାୟ ୨୪୧ ଜଣଙ୍କ ମୃତ୍ୟୁ ଘଟିଥିବା ଓ ନିଖୋଜ ଥିବା ଜଣାପଡିଛି । ସେହିପରି ୫ ଲକ୍ଷରୁ ଅଧିକ ଲୋକଙ୍କୁ ସୁରକ୍ଷିତ ସ୍ଥାନକୁ ବିସ୍ଥାପିତ କରାଯାଇଛି । ଫିଲିଫାଇନ୍ସ ବାୟୁସେନାର ଏକ ହେଲିକପ୍ଟର ଉଦ୍ଧାର କାର୍ଯ୍ୟ ପାଇଁ ଯାଉଥିବାବେଳେ କ୍ରାସ ହୋଇଯାଇଛି । ଫଳରେ ୬ ଜଣଙ୍କ ମୃତ୍ୟୁ ହୋଇଛି । ଟାଇଫୁନରେ ସର୍ବାଧିକ କ୍ଷତିଗ୍ରସ୍ତ ହୋଇଛି ସେବୁ ପ୍ରଦେଶ । ବନ୍ୟା ଓ ଭୂମିକମ୍ପରେ ଏଠି ୭୦ରୁ ଅଧିକ ଲୋକଙ୍କ ମୃତ୍ୟୁ ହୋଇଛି । ଏମିତି ସାଂଘାତିକ  ସ୍ଥିତିକୁ ଦେଖି ଦେଶରେ ଏମର୍ଜେନ୍ସି ଘୋଷଣା କରିଛନ୍ତି ରାଷ୍ଟ୍ରପତି ।  

ଫିଲିଫାଇନ୍ସ ଉପରେ ଯେମିତି ଦାଉ ସାଧୁଛି ପ୍ରକୃତି । ଗୋଟିଏ ପରେ ଗୋଟିଏ ପ୍ରାକୃତିକ ବିପର୍ଯ୍ୟୟ ଗ୍ରାସୁଛି ଦେଶକୁ । ସେପ୍ଟେମ୍ବର ୩୦ରେ ଏଠି ୬.୯ ତୀବ୍ରତାର ଶକ୍ତିଶାଳୀ ଭୂମିକମ୍ପ ହୋଇଥିଲା, ଯେଉଁଥିରେ ପ୍ରାୟ ୮୦ ଜଣଙ୍କ ମୃତ୍ୟୁ ହୋଇଥିଲା । ଏହାର କିଛି ଦିନ ପରେ  ପ୍ରଳୟ ଆଣିଥିଲା ବାତ୍ୟା ରାଗାସା । ଆଉ ଏବେ ପୁଣି ଗୋଟିଏ ବାତ୍ୟା ଦୋହଲିଯାଇଛି ଫିଲିଫାଇନ୍ସକୁ ।