Taliban Legalises Domestic Violence: ସ୍ତ୍ରୀଙ୍କୁ ନିର୍ଯାତନା ଦେଇପାରିବେ ସ୍ବାମୀ, ମାଡ଼ ମାରିବା ଅପରାଧ ନୁହେଁ

ମହିଳାଙ୍କ ସ୍ବାଧୀନତା ଉପରେ ପୁଣି ଲାଗିଲା କଟକଣା। ମହିଳାମାନଙ୍କୁ ନିର୍ଯାତନା ଦେବା ଆଇନଗତ କାର୍ଯ୍ୟ। ଏପରି ପୁଣି ହିଂସାତ୍ମକ ନିୟମ ଲାଗୁ କରିଛି ଆଫଗାନିସ୍ତାନ। 

ଆଫଗାନିସ୍ତାନ (Afghanistan) ରେ କ୍ଷମତା ହାସଲ କରିଥିବା ତାଲିବାନ (Taliban) ଏକ ନୂତନ ୯୦ ପୃଷ୍ଠାର 'ଫୌଜଦାରୀ ସଂହିତା' କାର୍ଯ୍ୟକାରୀ କରିଛି। ଏହି ନୂତନ ସଂହିତା ମହିଳା ଏବଂ ଶିଶୁଙ୍କ ବିରୁଦ୍ଧରେ ଘରୋଇ ହିଂସାକୁ ଆଇନଗତ ସ୍ୱୀକୃତି ପ୍ରଦାନ କରିଛି। ତାଲିବାନର ସର୍ବୋଚ୍ଚ ନେତା ହିବାତୁଲ୍ଲା ଆଖୁନ୍ଦଜାଦାଙ୍କ ଦ୍ୱାରା ସ୍ୱାକ୍ଷରିତ ଏହି ଆଇନରେ କୁହାଯାଇଛି ଯେ ସ୍ୱାମୀମାନେ ସେମାନଙ୍କ ସ୍ତ୍ରୀ ଏବଂ ପିଲାମାନଙ୍କୁ ଶାରୀରିକ ଭାବରେ ଦଣ୍ଡ ଦେଇପାରିବେ। କିନ୍ତୁ ଯେପରି ହାଡ ଭାଙ୍ଗି ନଯାଏ, ସେଥିପ୍ରତି ଧ୍ୟାନ ଦେବେ। ଏହି ଆଇନ ୨୦୦୯ ମସିହାରେ ପ୍ରଣୀତ ମହିଳାଙ୍କ ପାଇଁ ପୁରୁଣା ସୁରକ୍ଷା ବ୍ୟବସ୍ଥାକୁ ସମ୍ପୂର୍ଣ୍ଣ ଭାବରେ ସମାପ୍ତ କରିଦେଇଛି।

ନୂତନ ଆଇନ ଅନୁଯାୟୀ ଘରୋଇ ହିଂସା ସମ୍ପର୍କରେ ଥିବା ବ୍ୟବସ୍ଥାଗୁଡ଼ିକ ଅତ୍ୟନ୍ତ ଆଶ୍ଚର୍ଯ୍ୟଜନକ। ଯଦି ଜଣେ ସ୍ୱାମୀ ତାଙ୍କ ସ୍ତ୍ରୀଙ୍କୁ ମାଡ଼ ମାରିବା ବେଳେ ଯଦି ତାଙ୍କର ହାଡ ଭାଙ୍ଗିଯାଏ, ତେବେ ସ୍ବାମୀଙ୍କୁ ସର୍ବାଧିକ ୧୫ ଦିନ ଜେଲ୍ ଦଣ୍ଡ ଭୋଗିବାକୁ ପଡିବ। ଯଦି ଜଣେ ମହିଳା ଅଭିଯୋଗ ଦାୟର କରିବାକୁ ଚାହାଁନ୍ତି, ତେବେ ତାଙ୍କୁ ସମ୍ପୂର୍ଣ୍ଣ ହିଜାବ ପିନ୍ଧି ବିଚାରପତିଙ୍କ ସମ୍ମୁଖରେ ହାଜର ହେବାକୁ ପଡିବ। ତାଙ୍କ ସହିତ ଜଣେ "ପୁରୁଷ ଅଭିଭାବକ" ମଧ୍ୟ ରହିବାକୁ ପଡିବ, ପ୍ରାୟତଃ ହିଂସା କରିଥିବା ସ୍ୱାମୀକୁ ହିଁ ଉପସ୍ଥିତ ରହିବାକୁ ପଡିବ। 

ଏପରିକି ମହିଳାଙ୍କ ସମ୍ପର୍କ ସ୍ଥାପନ ଉପରେ ମଧ୍ୟ କଟକଣା ଲଗାଯାଇଛି। ଜଣେ ବିବାହିତ ମହିଳା ଯଦି ତାଙ୍କ ସ୍ୱାମୀଙ୍କ ଅନୁମତି ବିନା ସମ୍ପର୍କୀୟଙ୍କୁ ଭେଟିବାକୁ ଯାଆନ୍ତି, ତେବେ ମହିଳାଙ୍କୁ ତିନି ମାସ ପର୍ଯ୍ୟନ୍ତ ଜେଲ୍ ଦଣ୍ଡ ହୋଇପାରେ।

ତାଲିବାନ ସମାଜକୁ ଚାରିଟି ଶ୍ରେଣୀରେ ଭାଗ କରି ଦେଇଛି। ସେହି ହିସାବରେ କାହାକୁ କେତେ ଦଣ୍ଡ ମିଳିବ, ତା’ର ନିଷ୍ପତ୍ତି ନିଆଯିବ। 

ଧାର୍ମିକ ବିଦ୍ୱାନ: ସେମାନଙ୍କୁ କେବଳ ପରାମର୍ଶ ଦିଆଯିବ, କୌଣସି ଦଣ୍ଡ ଦିଆଯିବ ନାହିଁ।

ଅଭିଯାତ ଶ୍ରେଣୀ: ସେମାନଙ୍କୁ ଡକାଯିବ ଏବଂ ବୁଝାଯିବ।

ମଧ୍ୟବିତ୍ତ ବର୍ଗ: ସେମାନଙ୍କୁ ଜେଲ ଦଣ୍ଡ ଦିଆଯାଇପାରେ।

ନିମ୍ନ ବର୍ଗ: ଏମାନଙ୍କୁ କାରାଦଣ୍ଡ ଏବଂ ଶାରୀରିକ ଦଣ୍ଡ, ଯେପରିକି ଚାବୁକ ମାଡ଼, ଭୋଗିବାକୁ ପଡ଼ିବ। ଆଶ୍ଚର୍ଯ୍ୟର କଥା, ଏହି ଚାବୁକ ମାଡ଼ ଜେଲ୍ ଅଧିକାରୀମାନଙ୍କ ଦ୍ୱାରା ନୁହେଁ ବରଂ ଧାର୍ମିକ ଧର୍ମଗୁରୁଙ୍କ ଦ୍ୱାରା କରାଯିବ।

ଆଫଗାନିସ୍ତାନରେ ଏହି ନୂତନ ଆଇନ କାର୍ଯ୍ୟକାରୀ ହେବା ପରେ ସାରା ବିଶ୍ବ ନିନ୍ଦା କରିଛି। ମହିଳା ବିରୋଧୀ ହିଂସା ନିବାରଣ ପାଇଁ ଜାତିସଂଘର ସ୍ୱତନ୍ତ୍ର ଦୂତ ରିମ୍ ଅଲ୍-ସାଲେମ୍ ଏହାକୁ ଭୟାନକ ବୋଲି କହିଛନ୍ତି। ସେ ଅନ୍ତର୍ଜାତୀୟ ସମ୍ପ୍ରଦାୟକୁ ପ୍ରଶ୍ନ କରିଛନ୍ତି, କେହି ତାଲିବାନ (Brutal Taliban) କୁ ଅଟକାଇବାକୁ ଯାଉଛନ୍ତି କି ନାହିଁ। ନିର୍ବାସିତ ଆଫଗାନିସ୍ତାନ ମାନବାଧିକାର ସଂଗଠନ, ରାୱାଦାରୀ, ଏହି ଆଇନକୁ ତୁରନ୍ତ ବନ୍ଦ କରିବାକୁ ଦାବି କରିଛି ଏବଂ ହସ୍ତକ୍ଷେପ କରିବାକୁ ଅନ୍ତର୍ଜାତୀୟ ସଂଗଠନଗୁଡ଼ିକୁ ଅପିଲ୍ କରିଛି।

ଗତ କିଛି ବର୍ଷ ମଧ୍ୟରେ ତାଲିବାନ ମହିଳାମାନଙ୍କ ଶିକ୍ଷା ଏବଂ ନିଯୁକ୍ତି ଉପରେ କଟକଣା ଲଗାଇଥିଲା, କିନ୍ତୁ ଏହି ନୂତନ ଫୌଜଦାରୀ ଆଇନ ସେମାନଙ୍କର ବ୍ୟକ୍ତିଗତ ସୁରକ୍ଷାକୁ ଆହୁରି କ୍ଷୁର୍ଣ୍ଣ କରୁଛି।