Viral Scandal: ସୋସିଆଲ ମିଡିଆରେ ପାକ୍‌ ଆର୍ମି ଅଫିସରଙ୍କ ଅସଭ୍ୟ ଭିଡିଓ, ସାମ୍ବାଦିକାଙ୍କୁ ଆଖି ମାରିଲେ ପାକିସ୍ତାନ ଲେଫ୍ଟନାଣ୍ଟ ଜେନେରାଲ

ମୁନୀର୍‌ଙ୍କ ଗେହ୍ଲା ଅଫିସରଙ୍କ ଅଭଦ୍ରାମୀର ଦୃଶ୍ୟ । ଏହା ଏବେ ସୋସିଆଲ ମିଡିଆରେ ଖୁବ୍ ଭାଇରାଲ ହେବାରେ ଲାଗିଛି । ଭିଡିଓରେ ପାକ୍ ଲେଫ୍ଟନାଣ୍ଟ ଜେନେରାଲ ତଥା ସେନା ପ୍ରବକ୍ତା ଅହମ୍ମଦ ସରିଫ୍ ଚୌଧୁରୀ ଜଣେ ସାମ୍ବାଦିକାଙ୍କୁ ଆଖି ମାରୁଥିବାର ଦେଖାଯାଉଛି ।

ଚାଲିଥିଲା ପାକ୍ ସେନାର ପ୍ରେସ୍ କନଫରେନ୍ସ । ଲେଫ୍ଟନାଣ୍ଟ ଜେନେରାଲ ଅହମ୍ମଦ ସରିଫ୍ ଚୌଧୁରୀଙ୍କୁ ପ୍ରଶ୍ନ ପରେ ପ୍ରଶ୍ନ ପଚାରୁଥିଲେ ସାମ୍ବାଦିକ । ଏହି ସମୟରେ ଜଣେ ମହିଳା ରିପୋର୍ଟର ଅବସା କୋମଲ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ୍‌ଙ୍କ ସହ ଜଡିତ ପ୍ରସଙ୍ଗରେ ପ୍ରଶ୍ନ କରିଥିଲେ । ଇମ୍ରାନ ଖାନ୍ ରାଷ୍ଟ୍ରୀୟ ସୁରକ୍ଷା ପାଇଁ ବିପଦ, ରାଷ୍ଟ୍ରବିରୋଧୀ, ଭାରତ ଇସାରାରେ କାମ କରୁଥିବା ଭଳି ଯେଉଁସବୁ ଅଭିଯୋଗ ରହିଛି ତା' ଉପରେ ପଚାରିଥିଲେ ସାମ୍ବାଦିକା ଜଣକ । 

ନିଆଁ ଭଳି ଭାଇରାଲ 

ଏହାର ଜବାବରେ ମୁରୁକି ହସି ସାମ୍ବାଦିକାଙ୍କୁ ଆଖି ମାରିଥିଲେ ଅହମ୍ମଦ ଚୌଧୁରୀ । ଯାହାର ଭିଡିଓ ସୋସିଆଲ ମିଡିଆରେ ନିଆଁ ଭଳି ଭାଇରାଲ ହେଉଛି । ଅହମ୍ମଦ ଚୌଧୁରୀ, ଇମ୍ରାନ ଖାନଙ୍କୁ ମାନସିକ ରୋଗୀ କହି ଥଟ୍ଟା କରିବା ସହ ସାମ୍ବାଦିକାଙ୍କୁ ଆଖି ମାରୁଥିବାର ଦେଖିବାକୁ ମିଳୁଛି । ସମସ୍ତଙ୍କ ସାମ୍ନାରେ ପାକ୍ ଲେଫ୍ଟନାଣ୍ଟ ଜେନେରାଲଙ୍କ ଏପରି ଅସଭ୍ୟ ଆଚରଣକୁ କଡା ଭର୍ତ୍ସନା କରିଛନ୍ତି ସୋସିଆଲ ମିଡିଆ ୟୁଜର । ଜଣେ ଲେଖିଛନ୍ତି, 'ପାକିସ୍ତାନୀ ସେନା କେତେ ଅସଭ୍ୟ ତାହା ଏଥିରୁ ଜଣାପଡୁଛି ।' 'ବର୍ଦ୍ଦି ପିନ୍ଧି କେହି କେମିତି ସମସ୍ତଙ୍କ ସାମ୍ନାରେ ଆଖି ମାରିପାରିବ ?'

ଅହମ୍ମଦ ସରିଫ୍‌ ଚୌଧୁରୀ ପାକିସ୍ତାନ ଇଣ୍ଟର-ସର୍ଭିସ ପବ୍ଲିକ ରିଲେସନର ଡିଜି ଅଛନ୍ତି । ତାଙ୍କର ପାରିବାରିକ ପୃଷ୍ଠଭୂମି ପୂର୍ବରୁ ବିବାଦୀୟ ରହିଛି । ତାଙ୍କର ବାପା ହେଲେ ଆତଙ୍କବାଦୀ ଓସମା ବିନ୍ ଲାଡେନର ସହଯୋଗୀ ସୁଲତାନ ବସିରୁଦ୍ଦିନ ମହମ୍ମଦ । ଚୌଧୁରୀ ଅନେକ ସମୟରେ ଭାରତ ବିରୋଧୀ ବୟାନ ଓ ଇମ୍ରାନ ଖାନ୍‌ଙ୍କୁ ଭର୍ତ୍ସନା କରିବାକୁ ନେଇ ଚର୍ଚ୍ଚାରେ ରହିଥାନ୍ତି । ଏହି ପ୍ରସଙ୍ଗରେ ପାକିସ୍ତାନୀ ଅଧିକାରୀଙ୍କ ଅହଙ୍କାର ପଦାରେ ପଡିଯାଇଛି ।