Artificial Floating Island: ବିଶ୍ବର ପ୍ରଥମ କୃତ୍ରିମ ଭାସମାନ ଦ୍ବୀପ, ପରମାଣୁ ବିସ୍ଫୋରଣ ବିଗାଡି ପାରିବନି କି ବାତ୍ୟାରେ ବି କ୍ଷତି ହେବନି

ବିଜ୍ଞାନ କ୍ଷେତ୍ରରେ ସବୁଠୁ ଆଗୁଆ ଚୀନ୍ ପୁଣି ଆଉ ପାଦେ ଆଗେଇଛି। ବିଶ୍ବ ସ୍ତରରେ ସାମୁଦ୍ରିକ ଶକ୍ତିକୁ ଆହୁରି ବିସ୍ତାରିତ କରିବ। ଚୀନ୍ ନିର୍ମାଣ କରୁଛି ବିଶ୍ବର ପ୍ରଥମ କୃତ୍ରିମ ଭାସମାନ ଦ୍ବୀପ। ଯାହା କେବଳ ସାମୁଦ୍ରିକ ଶକ୍ତିକୁ ବଢାଇବ ନାହିଁ, ବରଂ ପରମାଣୁ ବିସ୍ଫୋରଣକୁ ମଧ୍ୟ ସହ୍ୟ କରି ପାରିବ। ଏଥି ସହିତ ବିଶ୍ବର ସବୁଠାରୁ ଶକ୍ତିଶାଳୀ ଟାଇଫୁନକୁ ମଧ୍ୟ ସହ୍ୟ କରି ପାରିବ ବୋଲି ଚୀନ୍‌ର ସାଉଥ୍ ଚାଇନା ମର୍ଣ୍ଣିଂ ପୋଷ୍ଟ ଉଲ୍ଲେଖ କରିଛି।

ପ୍ରକଳ୍ପରେ ସାମିଲ ବୈଜ୍ଞାନିକଙ୍କ ସୂଚନା ଅନୁଯାୟୀ, ଏଥିରେ ଥିବା "ମେଟାମାଟେରିଆଲ୍" ସାଣ୍ଡୱିଚ୍ ପ୍ୟାନେଲ୍ ବିପର୍ଯ୍ୟୟକାରୀ ଆଘାତକୁ ମୃଦୁ ଚାପରେ ପରିଣତ କରିବ। ଏହାକୁ ସମସ୍ତ ପାଣିପାଗ ପରିସ୍ଥିତିରେ ଦୀର୍ଘକାଳୀନ ବାସସ୍ଥାନ ପାଇଁ ଡିଜାଇନ୍ କରାଯାଇଛି। ଏହାର ସୁପରଷ୍ଟ୍ରକଚରରେ ଗୁରୁତ୍ୱପୂର୍ଣ୍ଣ ଅଂଶ ରହିଛି, ଯାହା ଜରୁରୀକାଳୀନ ଶକ୍ତି, ଯୋଗାଯୋଗ ଏବଂ ନାଭିଗେସନ୍ ନିୟନ୍ତ୍ରଣ ସୁନିଶ୍ଚିତ କରିବ।

ଏହି ପ୍ରକଳ୍ପର ନାମ ରଖାଯାଇଛି “ଡିପ୍ ସି ଅଲ୍ ୱେଦର ରେସିଡେଣ୍ଟ ଫ୍ଲୋଟିଙ୍ଗ୍ ରିସର୍ଚ୍ଚ ଫ୍ୟାସିଲିଟି”। ଚାଇନା ବହୁ ଗବେଷଣା କରିବା ପରେ ଏହି "ଦୂର-ସମୁଦ୍ର ଭାସମାନ ଦ୍ୱୀପ" ନିର୍ମାଣ କରୁଛି।

ରିପୋର୍ଟ ଅନୁଯାୟୀ, ଏହା ଏକ ସେମି-ସବମର୍ସିବଲ୍ ଟ୍ୱିନ୍-ହଲ୍ ପ୍ଲାଟଫର୍ମ ଯାହା ଦୁନିଆର ପ୍ରଥମ ସ୍ବାବଲମ୍ବୀ ଦ୍ବୀପ। ପୁନଃ ଯୋଗାଣ ବିନା ଚାରି ମାସ ପର୍ଯ୍ୟନ୍ତ ଏଠାରେ ଏକା ଥରେ ୨୩୮ ଜଣ ରହି ପାରିବେ।

ଏହି ଦ୍ୱୀପର ଓଜନ ୭୮,୦୦୦ ଟନ୍ ହେବ ଏବଂ ଚାଇନାର ଫୁଜିଆନ୍ ଏୟାରକ୍ରାଫ୍ଟ କ୍ୟାରିୟର ସହିତ ସମାନ ହେବ। ଏହି ଦ୍ବୀପ ୧୩୮ ମିଟର ଲମ୍ବା ଏବଂ ୮୫ ମିଟର ଚଉଡା ହେବ। ମୁଖ୍ୟ ଡେକ୍ ଜଳସ୍ତରଠାରୁ ୪୫ ମିଟର ଉଚ୍ଚରେ ରହିବ। ଏହା ୧୫ ନଟ୍ ବେଗରେ ଯାତ୍ରା କରିପାରିବ। ଏହା ୬-୯ ମିଟର ସମୁଦ୍ର ଢେଉ ଏବଂ ସବୁଠାରୁ ଶକ୍ତିଶାଳୀ ଟ୍ରପିକାଲ ସାଇକ୍ଲୋନ ଟାଇଫୁନର ବର୍ଗ ୧୭କୁ ମଧ୍ୟ ସହ୍ୟ କରି ପାରିବ। ଏହା ୨୦୨୮ ମସିହାରେ କାର୍ଯ୍ୟକ୍ଷମ ହେବ।