Indians kidnapped: ୫ ଭାରତୀୟଙ୍କୁ ଆତଙ୍କବାଦୀଙ୍କ ଦ୍ବାରା ଅପହରଣ, ବଢୁଛି ଅଲ-କାଏଦା, ISIS ର ଦବଦବା

ପଶ୍ଚିମ ଆଫ୍ରିକୀୟ ରାଷ୍ଟ୍ର ମାଲିରେ ଅଲ-କାଏଦା ଏବଂ ଆଇଏସଆଇଏସ-ସଂଯୁକ୍ତ ଆତଙ୍କବାଦୀ ଗୋଷ୍ଠୀ ଦ୍ୱାରା ହିଂସାକାଣ୍ଡ ଘଟୁଥିବା ବେଳେ, ପାଞ୍ଚ ଜଣ ଭାରତୀୟ ନାଗରିକଙ୍କୁ ଅପହରଣ କରାଯାଇଛି ବୋଲି ଅଧିକାରୀମାନେ ନିଶ୍ଚିତ କରିଛନ୍ତି।

ପଶ୍ଚିମ ମାଲିର କୋବ୍ରି ନିକଟରେ ଗୁରୁବାର କିଛି ସଶସ୍ତ୍ର ବ୍ୟକ୍ତି ଭାରତୀୟମାନଙ୍କୁ ଅପହରଣ କରିଥିଲେ। ସେମାନେ ସ୍ଥାନୀୟ ବିଦ୍ୟୁତୀକରଣ ପ୍ରକଳ୍ପରେ ଜଡିତ ଏକ ସଂସ୍ଥା ଦ୍ୱାରା ନିଯୁକ୍ତି ପାଇଥିଲେ।

କମ୍ପାନୀର ଜଣେ ପ୍ରତିନିଧି କହିଛନ୍ତି ଯେ ଅନ୍ୟ ସମସ୍ତ ଭାରତୀୟ ଶ୍ରମିକଙ୍କୁ ରାଜଧାନୀ ବାମାକୋକୁ ସ୍ଥାନାନ୍ତର କରାଯାଇଛି। ଅପହରଣରେ ଏପର୍ଯ୍ୟନ୍ତ କୌଣସି ଗୋଷ୍ଠୀଙ୍କର ହାତ ଥିବା ତାହା ଜଣା ପଡିନାହିଁ।

"ଆମେ ପାଞ୍ଚ ଜଣ ଭାରତୀୟ ନାଗରିକଙ୍କ ଅପହରଣ ହୋଇଥିବା ନିଶ୍ଚିତ କରୁଛୁ। କମ୍ପାନୀରେ କାମ କରୁଥିବା ଅନ୍ୟ ଭାରତୀୟମାନଙ୍କୁ ରାଜଧାନୀ ବାମାକୋକୁ ସ୍ଥାନାନ୍ତର କରାଯାଇଛି," ବୋଲି ପ୍ରତିନିଧି କହିଛନ୍ତି।

ସାମରିକ ଜୁଣ୍ଟା ଦ୍ୱାରା ଶାସିତ ମାଲି ବର୍ଷ ବର୍ଷ ଧରି ଅସ୍ଥିରତା ଏବଂ ବଢ଼ୁଥିବା ଉଗ୍ରବାଦୀ ହିଂସାର ସମ୍ମୁଖୀନ ହୋଇଛି। ଅଲ-କାଏଦା-ସଂଲଗ୍ନ ଗ୍ରୁପ୍ ଫର ଦି ସପୋର୍ଟ ଅଫ୍ ଇସଲାମ ଆଣ୍ଡ୍ ମୁସଲିମସ୍ (JNIM) ଏହି ହିଂସାକାଣ୍ଡରେ ସମ୍ପୃକ୍ତ ଅଛି। ଯାହା ପୂର୍ବରୁ ଥିବା ଗମ୍ଭୀର ଆର୍ଥିକ ସଙ୍କଟକୁ ଆହୁରି ଖରାପ କରିଛି।

ମାଲିର ଏପରି ଅଞ୍ଚଳରେ ବିଦେଶୀ ନାଗରିକଙ୍କ ଅପହରଣ ଅସାଧାରଣ ନୁହେଁ, ଯେଉଁଠାରେ ୨୦୧୨ ପରଠାରୁ ବାରମ୍ବାର ବିଦ୍ରୋହ ଏବଂ ଜିହାଦୀ ଆକ୍ରମଣ ରାଜ୍ୟ ନିୟନ୍ତ୍ରଣକୁ କ୍ଷୁର୍ଣ୍ଣ କରିଛି।

ଚଳିତ ବର୍ଷ ସେପ୍ଟେମ୍ବରରେ, ଜେଏନଆଇଏମ ଲଢ଼ୁଆମାନେ ବାମାକୋ ନିକଟରେ ଦୁଇଜଣ ଏମିରାତି ନାଗରିକ ଏବଂ ଜଣେ ଇରାନୀଙ୍କୁ ଅପହରଣ କରିଥିଲେ। ପ୍ରାୟ ୫୦ ନିୟୁତ ଆମେରିକୀୟ ଡଲାରର ମୁକ୍ତି ପ୍ରଦାନ କରାଯିବା ପରେ ଗତ ସପ୍ତାହରେ ସେମାନଙ୍କୁ ମୁକ୍ତ କରାଯାଇଥିଲା।

୨୦୧୨ ମସିହାରେ ଏକ ତୁଆରେଗ ବିଦ୍ରୋହରୁ ଜନ୍ମିତ, JNIM ଉତ୍ତର ମାଲିରୁ ଦେଶର କେନ୍ଦ୍ର ଏବଂ ସୀମା ପାର କରି ବୁର୍କିନା ଫାସୋ ଏବଂ ନାଇଜର ପର୍ଯ୍ୟନ୍ତ ଏହାର ପ୍ରସାରକୁ ବିସ୍ତାର କରିଛି। ମାଲିର ଜୁଣ୍ଟା ନେତା, ଆସିମି ଗୋଇତା ବିଦ୍ରୋହକୁ ଦମନ କରିବାକୁ ପ୍ରତିଜ୍ଞା କରି କ୍ଷମତାକୁ ଆସିଥିଲେ। କିନ୍ତୁ ଫ୍ରାନ୍ସ ଏବଂ ଆମେରିକା ସହିତ ପ୍ରତିରକ୍ଷା ସମ୍ପର୍କ ଛିନ୍ନ କରି ରୁଷ ଆଡକୁ ମୁହାଁଇବା ପରେ ସେଥିରେ ବିଫଳ ହୋଇଛି।

ବାମାକୋ ସରକାରୀ ନିୟନ୍ତ୍ରଣରେ ରହିଥିବା ବେଳେ, JNIM ରାଜଧାନୀ ଆଡକୁ ଅଗ୍ରସର ହେବାର ସମ୍ଭାବନା ମାଲିବାସୀଙ୍କୁ ଚିନ୍ତିତ କରୁଛି। ଯେଉଁ ଅଞ୍ଚଳରେ ଏହା ପ୍ରାଧାନ୍ୟ ବିସ୍ତାର କରୁଛି, ସେହି ଅଞ୍ଚଳରେ ଏହି ଗୋଷ୍ଠୀ କଠୋର ନିୟମ ଲାଗୁ କରୁଛି। ସାଧାରଣ ଲୋକଙ୍କ ଗତିବିଧି ଉପରେ ନଜର ରଖୁଛି ଏବଂ ସାର୍ବଜନୀନ ପରିବହନରେ ମହିଳାମାନଙ୍କୁ ହିଜାବ ପିନ୍ଧିବାକୁ ନିର୍ଦ୍ଦେଶ ଦେଇଛି।