Together We Can Defeat AIDS: ଜିତିବ ଜୀବନ ହାରିବ ଏଡସ୍, ଆଜି ବିଶ୍ବ ଏଡସ୍ ଦିବସ

ଜିତିବ ଜୀବନ, ହାରିବ ଏଡସ୍ । ଆଜି ହେଉଛି ବିଶ୍ବ ଏଡସ ଦିବସ । ଏଡସକୁ ନେଇ ସଚେତନ କରାଇବା ଉଦ୍ଦେଶ୍ୟରେ ପ୍ରତିବର୍ଷ ଡିସେମ୍ବର ୧ ତାରିଖକୁ ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ପକ୍ଷରୁ ବିଶ୍ବ ଏଡସ୍ ଦିବସ ଭାବେ ପାଳନ କରାଯାଉଛି । ଚଳିତ ବର୍ଷର ଥିମ୍ ରହିଛି Overcoming disruption and transforming the AIDS response ।  ଏହି ଅବସରରେ ରାଜ୍ୟ ଏଡସ ନିୟନ୍ତ୍ରଣ ସମିତି ପକ୍ଷରୁ ସଚେତନତା ପଦଯାତ୍ରା ଅନୁଷ୍ଠିତ ହୋଇଛି ।

କ୍ୟାପିଟାଲ ହସ୍ପିଟାଲ ପରିସରରେ ଆୟୋଜିତ ରାଲିକୁ ପତାକା ଦେଖାଇ ଉଦଘାଟନ କରିଛନ୍ତି ସ୍ୱାସ୍ଥ୍ୟ ମନ୍ତ୍ରୀ ମୁକେଶ ମହାଲିଙ୍ଗ । ଚଳିତ ବର୍ଷ ଅକ୍ଟୋବର ସୁଦ୍ଧା ରାଜ୍ୟରେ ୨୪୬୨ ଜଣ HIV ପଜିଟିଭ ଚିହ୍ନଟ ହୋଇଛନ୍ତି । ସେହିପରି ୧୨ଲକ୍ଷ ସାଧାରଣ ଲୋକ ଏବଂ ୮ଲକ୍ଷ ଗର୍ଭବତୀଙ୍କୁ ମିଶାଇ ମୋଟ ୨୦ ଲକ୍ଷ ଟେଷ୍ଟ ପାଇଁ ଲକ୍ଷ୍ୟ ରହିଛି । ସେଥିରୁ ବର୍ତ୍ତମାନ ସୁଦ୍ଧା ୧୪ଲକ୍ଷ ଟେଷ୍ଟ ସରିଥିବା ସୂଚନା ଦିଆଯାଇଛି । 

ହଜାର ହଜାର ଲୋକ ଏଚଆଇଭି ସଂକ୍ରମିତ

ଏହି ରୋଗରେ ପୀଡିତ ବ୍ୟକ୍ତିଙ୍କ ରୋଗ ପ୍ରତିରୋଧକ ଶକ୍ତି ନଷ୍ଟ ହୋଇଯାଏ । ଫଳରେ କୌଣସି ପ୍ରକାରର ଅସୁସ୍ଥତା ସହଜରେ ଭଲ ହୁଏନାହିଁ । ପ୍ରତିବର୍ଷ ହଜାର ହଜାର ଲୋକ ଏଚଆଇଭି ସଂକ୍ରମିତ ହେଉଛନ୍ତି । ଏଡ୍ସ ସମ୍ପର୍କରେ ଲୋକଙ୍କୁ ବିଭିନ୍ନ ପ୍ରକାର ବିଜ୍ଞାପନ, ହୋର୍ଡିଂ,ଗଣମାଧ୍ୟମ ଜରିଆରେ ସଚେତନ ବି କରାଯାଉଛି । ଗାଁଠୁ ନେଇ ସହରକୁ ଏଡସ ମୁକ୍ତ କରିବା ଓ ଏକ ସୁସ୍ଥ ସମାଜ ଗଢିବାକୁ ସମସ୍ତେ ଯତ୍ନବାନ ହେବା ଦରକାର । ଯଦି ଏହି ରୋଗ ପ୍ରତି ସଚେତନ ହେବା, ତେବେ ଏହାକୁ ହରାଇପାରିବା ଏଥିରେ ସନ୍ଦେହ ନାହିଁ । 

ଆଜିର ଦିନରେ ସାରା ବିଶ୍ବରେ ବିଭିନ୍ନ ସଚେତନତା କାର୍ଯ୍ୟକ୍ରମ ଆୟୋଜନ ହେଉଛି । ଏହାର ଭୟାବହତା ବିଷୟରେ ଲୋକଙ୍କୁ ସଚେତନ କରାଇବା ଉଦ୍ଦେଶ୍ୟରେ ୧୯୮୮ ମସିହାରୁ ପ୍ରତିବର୍ଷ ପାଳନ କରାଯାଉଛି ‘ବିଶ୍ୱ ଏଡସ ଦିବସ’ । ଏଚ୍ଆଇଭି ବା ଏଡସର ଭୟବହତା ସଂପର୍କରେ ଲୋକମାନଙ୍କୁ ସଚେତନ କରାଇବା ହେଉଛି ଏହି ଦିବସର ମୂଳ ଉଦ୍ଦେଶ୍ୟ।