Low Pressure: ବଙ୍ଗୋପସାଗରରେ ଲଘୁଚାପ, ଚାଷୀକୁ ଛାନିଆ କଲାଣି ଅଦିନିଆ ବର୍ଷା

ବଙ୍ଗୋପସାଗରରେ ଲଘୁଚାପ ।  କାଲିକୁ ହେବ ଅଧିକ ଘନୀଭୂତ । ଧାନ ଅମଳ ସମୟରେ ଆସୁଛି ବର୍ଷା । ବିଲରେ, ମଣ୍ଡିରେ ପଡ଼ିଛି ଧାନ। ଚାଷୀଙ୍କୁ ଛାନିଆ କଲାଣି ଅଦିନିଆ ବର୍ଷା ଆଶଙ୍କା । ବଙ୍ଗୋପସାଗରରେ ସୃଷ୍ଟି ହୋଇଛି ଶୀତଦିନିଆ ଲଘୁଚାପ । ଧାନ ଅମଳ ସମୟରେ ଲଘୁଚାପ ସୃଷ୍ଟି ହେବା ଘଟଣା ଚାଷୀଙ୍କୁ ଛାନିଆ କରିଛି ।

ଭାରତୀୟ ପାଣିପାଗ କେନ୍ଦ୍ରର ଆକଳନ ଅନୁସାରେ କାଲି ସଂଧ୍ୟା ସାଢ଼େ ୫ଟାରେ ଉତ୍ତରପୂର୍ବ ବଙ୍ଗୋପସାଗର ଏବଂ ତତ୍ ସଂଲଗ୍ନ ପୂର୍ବ ବିଷୁବରେଖା ଭାରତ ମହାସାଗର ଅଞ୍ଚଳରେ ଲଘୁଚାପ କ୍ଷେତ୍ର ସୃଷ୍ଟି ହୋଇଛି ।  ଆଗାମୀ ୨୪ ଘଣ୍ଟା ମଧ୍ୟରେ ଏହା ଅଧିକ ଘନୀଭୂତ ହେବାର ସମ୍ଭାବନା ରହିଛି । ଆଗାମୀ ୪୮ ଘଣ୍ଟା ମଧ୍ୟରେ ଏହା ପଶ୍ଚିମ ଓ ଉତ୍ତର ପଶ୍ଚିମ ଦିଗକୁ ଗତିକରି ଦକ୍ଷିଣ ପଶ୍ଚିମ ବଙ୍ଗୋପସାଗର ଏବଂ ସଂଲଗ୍ନ ବିଷୁବରେଖା ଅନ୍ତର୍ଗତ ପୂର୍ବ ଭାରତ ମହାସାଗର ଆଡ଼କୁ ଯିବା ସମ୍ଭାବନା । ତେବେ ଓଡ଼ିଶା ଉପରେ ଏହା ବିଶେଷ ପ୍ରଭାବ ପକାଇ ନପାରେ ବୋଲି କୁହାଯାଉଛି ।

ହାଲୁକାରୁ ମଧ୍ୟମ ଧରଣର ବର୍ଷା ସମ୍ଭାବନା

ପାଣିପାଗ ବିଜ୍ଞାନୀ ଶରତ ସାହୁଙ୍କ କହିବାନୁସାରେ ଓଡ଼ିଶା ଉପରେ ଏହାର ସିଧାସଳଖ ପ୍ରଭାବ ପଡ଼ିନପାରେ । କିନ୍ତୁ ୧୦ ତାରିଖ ଦିନ ବର୍ଷା ହେବାର ସମ୍ଭାବନା ରହିଛି । ଓଡ଼ିଶା ଉପର ଦେଇ ଏକ ଟ୍ରାପ୍ ଲାଇନ୍ ଆସୁଥିବାରୁ ଏହାର ପ୍ରଭାବରେ ବର୍ଷା ହେବ । ୧୦ ତାରିଖ ଦିନ ଉପକୂଳ ଏବଂ ଉତ୍ତର ଓଡ଼ିଶାର ଅଧିକାଂଶ ଅଞ୍ଚଳରେ ହାଲୁକାରୁ ମଧ୍ୟମ ଧରଣର ବର୍ଷା ସମ୍ଭାବନା ରହିଛି । 

ପାଣିପାଗ ବିଜ୍ଞାନୀ ଶରତ ସାହୁଙ୍କ କହିବାନୁସାରେ ପୁରୀ, ଖୋର୍ଦ୍ଧା, କଟକ, ଜଗତସିଂହପୁର, କେନ୍ଦ୍ରାପଡ଼ା, ଯାଜପୁର, ଭଦ୍ରକ, ବାଲେଶ୍ବର, ଭୟୂରଭଂଜ ଜିଲ୍ଲାରେ ବର୍ଷା ସମ୍ଭାବନା ରହିଛି । ସେମିତି ସୁନ୍ଦରଗଡ଼, ସମ୍ବଲପୁର, ବରଗଡ଼ରେ ବର୍ଷା ହୋଇପାରେ । ସାରା ରାଜ୍ୟରେ ଏବେ ଚାଷୀ ଧାନ ସଂଗ୍ରହରେ ବ୍ୟସ୍ତ ।

କେଉଁଠି ଧାନ କଟା ଚାଲିଛି ତ ଆଉ କେଉଁଠି ଅମଳ ଚାଲିଛି ଓ  ଆଉ କେଉଁଠି ଧାନ ବିକିବାକୁ ମଣ୍ଡିରେ ବସିଛି ଚାଷୀ । ଏଭଳି ଅବସ୍ଥାରେ ବର୍ଷା ଚାଷୀକୂଳକୁ ଛାନିଆ କରିପକାଇଛି । ବର୍ଷା ଆସିବା ପୂର୍ବରୁ କଟା ହୋଇନଥିବା ଧାନକୁ କାଟି ପକାଇବା ଓ ସୁରକ୍ଷିତ ଭାବେ ଘୋଡ଼ାଇ ରଖିବା ସହ ମଣ୍ଡିରୁ ଧାନ ଉଠାଯିବା ଜରୁରୀ ହୋଇପଡ଼ିଛି ।