Shocking Murder: ସମ୍ପତ୍ତି ଲୋଭରେ ପୁଅର ନୃଶଂସ କାଣ୍ଡ, କୁରାଢିରେ ହାଣିଦେଲା ୩ ଜଣଙ୍କୁ

ବାପା, ସହ ଭଉଣୀ ଓ ୧୪ ବର୍ଷର ଭାଣିଜୀକୁ ହାଣି କୂଅରେ ଫିଙ୍ଗିଲା । ସାମାନ୍ୟ ଜମି ଖଣ୍ଡିଏ ପାଇଁ ଜନ୍ମକଲା ପୁଅ ଯେ ଏମିତି ସୈତାନ ପାଲଟିପାରେ, ତାହା ଜାଣିଲେ ଆଶ୍ଚର୍ଯ୍ୟ ହୋଇଯିବେ । ବାପା ସାନପୁଅ ନାଁରେ କିଛି ଜମି କରିଥିଲେ । ଆଉ ଏଥିରେ ରାଗିଯାଇଥିଲା ବଡ ପୁଅ । ଘରେ ବାପାର ତଣ୍ଟି ଚିପି ମାରିଥିଲା ।

ଭଉଣୀ ଓ ଭାଣିଜୀ ଏହାକୁ ଦେଖିଦେବାରୁ କୁରାଢିରେ ସେ ଦୁଇ ଜଣଙ୍କୁ ବି ହାଣି ଦେଇଥିଲା । ଆଉ ଅନ୍ଧାର ରାତିରେ ୩ ଜଣଙ୍କ ଶବକୁ ଲୁଚାଇ ନେଇ କୂଅରେ ଫିଙ୍ଗିଦେଲା । ଏହାସହ ନିଜ ସାନ ଭାଇକୁ ବି ଗୁଳି କରିଥିଲା ଅଭିଯୁକ୍ତ ।

ଉତ୍ତରପ୍ରଦେଶ ପ୍ରୟାଗରାଜର ଗଙ୍ଗାନଗର ଅଞ୍ଚଳରେ ଘଟିଛି ଏହି ବୀଭତ୍ସ ହତ୍ୟାକାଣ୍ଡ । ଗତ ଶୁକ୍ରବାର ରାତିରୁ ବାପା ରାମ ସିଂ, ଭଉଣୀ ସାଧନା ଓ ଭାଣିଜୀ ଘରୁ କୁଆଡେ ନିଖୋଜ ହୋଇଯାଇଥିଲେ । ଏନେଇ ସାନଭାଇ ମୁକୁନ୍ଦ ପଟେଲ ଥାନାରେ ଅଭିଯୋଗ କରିଥିଲେ ।

କୂଅରୁ ମିଳିଥିଲା ୩ ମୃତଦେହ

ବଡଭାଇ ମୁକେଶ ପଟେଲ ହିଁ ସେମାନଙ୍କ ସହ କିଛି ଘଟାଇଥିବା ସନ୍ଦେହ କରିଥିଲେ ମୁକୁନ୍ଦ । ଅଭିଯୋଗ ପାଇ ଜୋରଦାର ଛାନଭିନ୍ ଚଳାଇଥିଲା ପୋଲିସ । ଏହାର ଦୁଇ ଦିନ ପରେ ଗାଁ ପାଖ ଗୋଟିଏ କୂଅ ଭିତରୁ ମିଳିଥିଲା ୩ ଜଣଙ୍କ ମୃତଦେହ । 

ପୋଲିସର ପଚରାଉଚରାରେ ସବୁ ସତ ଓଗାଳିଥିଲା ଅଭିଯୁକ୍ତ ମୁକେଶ । ତା' ବାପା, ସାନ ଭାଇ ନାଁରେ ୪ ବିଘା ଜମି କରିଦେଇଥିଲେ । ଏଥିରେ ରାଗି ଯାଇ ସେ ବାପାକୁ ହତ୍ୟା କରିଥିଲା । ଭଉଣୀ ଓ ଭାଣିଜୀ ଏହାକୁ ଦେଖିଦେବାରୁ ଘରେ ପଡିଥିବା ଏକ କୁରାଢୀରେ ହାଣି ସମସ୍ତଙ୍କୁ ମାରିଦେଇଥିଲା ।

ଆଉ ରାତିରେ ଘନ କୁହୁଡିର ସୁଯୋଗ ନେଇ ଘର ପାଖରେ ଥିବା ଏକ କୂଅ ଭିତରେ ୩ ଜଣଙ୍କ ମୃତଦେହ ଫିଙ୍ଗି ଘୋଡାଇ ଦେଇଥିଲା । ଏହି ଟ୍ରିପଲ ମର୍ଡର ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇଥିବା ବେଳେ ପୋଲିସ ଅଭିଯୁକ୍ତ ପୁଅକୁ ଗିରଫ କରିଛି ।