Mob Killing: ସ୍ବାମୀଙ୍କୁ ପିଟିପିଟି ମାରିଦେଲେ, ଏବେ ୩ ପିଲାଙ୍କ ଜୀବନ ଉପରେ ବିପଦ

ପ୍ରଶାସନର ଅବହେଳା ପାଖରେ ଏମାନେ ନାଚାର । ନ୍ୟାୟ ପାଇଁ ଲଢ଼େଇ କରିବେ କ’ଣ ଓଲଟି ଜୀବନ ପାଇଁ ସଂଘର୍ଷ କରୁଛନ୍ତି । ପାଦେ ପାଦେରେ ହତ୍ୟା ଭୟ ଘାରୁଛି । ୩ କୁନିକୁନି ପିଲାଙ୍କ ସହ ମା’ ପ୍ରତିଦିନ ମରିମରି ବଞ୍ଚୁଛି । ସିନ୍ଦୂର ଲିଭିଗଲା ପରେ ସନ୍ତାନଙ୍କ ପାଇଁ ଏ ମା’ର ପଣତ ଯେମିତି ଆଉ ସୁରକ୍ଷା କବଚ ହୋଇନାହିଁ ।

ଦେବଗଡ଼ ଜିଲ୍ଲା ରିଆମାଳ ଥାନା ଅଞ୍ଚଳର ବାସିନ୍ଦା । କିନ୍ତୁ ବର୍ତ୍ତମାନ ଜୀବନ ବଞ୍ଚାବାକୁ ବରଗଡ଼ ଜିଲ୍ଲା ଅତାବିରା ବ୍ଲକ କୁମେଲସିଂହା ଗାଁରେ ଥିବା ବାପଘରେ ଆଶ୍ରୟ ନେଇଛନ୍ତି । ସ୍ବାମୀଙ୍କୁ ହତ୍ୟା ପରେ ଏବେ ୪ ଜୀବନ ବିପଦରେ ଥିବା ଅଭିଯୋଗ ଆସିଛି ।

ଗତ ସେପ୍ଟେମ୍ବର ମାସରେ ମାନସୀ ସେଠୀଙ୍କ ସ୍ବାମୀ କିଶୋରଙ୍କୁ ପିଟିପିଟି ହତ୍ୟା କରାଯାଇଥିଲା । ଗାଁର କିଛି ଲୋକ କିଶୋର ଗୋ’ ହତ୍ୟା କରିଥିବା ଅଭିଯୋଗ ଆଣି ତାଙ୍କୁ ଜୀବନରୁ ମାରିଦେଇଥିଲେ । ଆଉ ସ୍ବାମୀଙ୍କ ମୃତ୍ୟୁ ପରେ ସ୍ତ୍ରୀଙ୍କ ଅଭିଯୋଗ ଆଧାରରେ ପୋଲିସ ଘଟଣାକୁ ଗୁରୁତର ସହ ନେଇଥିଲା ।

ମର୍ଡରର ମାତ୍ର ୪ ଦିନ ମଧ୍ୟରେ ୬ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିଲା । ହେଲେ ଏବେ କିଶୋରଙ୍କ ପରିବାର ବେସାହାରା ହୋଇଯାଇଛି । ଗାଁ ଲୋକଙ୍କ ଆକ୍ରୋଶ ଭୟରେ ୧୦ ଓ ୧୧ ବର୍ଷର ଦୁଇ ଝିଅ ଏବଂ ୮ ବର୍ଷର ପୁଅକୁ ଧରି ବାପ ଘର ଦେବଗଡ଼ରେ ପଡ଼ିରହିଛନ୍ତି ମାନସୀ ।

ଫଳରେ ପିଲାଙ୍କ ପାଠପଢା ଠପ୍ ହୋଇଯାଇଛି । ସେପଟେ ଏ ସମ୍ପର୍କରେ ପ୍ରତିକ୍ରିୟା ରଖିଛନ୍ତି ଦେବଗଡ଼ ଆରକ୍ଷୀ ଅଧିକ୍ଷ ଅନିଲ ମିଶ୍ର ଓ ଜିଲ୍ଲା ସାମାଜିକ ସୁରକ୍ଷା ଅଧିକାରୀ ଶ୍ରୀନିବାସ ଜାନି । 

ତେବେ ଜଣେ ଅସହାୟ ମହିଳାଙ୍କୁ ଦେଖି ମଧ୍ୟ ବରଗଡ଼ ପ୍ରଶାସନ ଆଖି ବୁଜିଦେଇଛି । ସ୍ବାମୀଙ୍କ ମୃତ୍ୟୁ ପରେ ଏଣେ ତେଣେ ମୁଲ ଲାଗି ପିଲାମାନଙ୍କୁ ବଡ଼ କରୁଥିବା ଏ ମା’ଟା ଦୁଃଖ କଷ୍ଟରେ ଦିନ କାଟୁଛି । ତେଣୁ ଏମାନଙ୍କ ପାଇଁ ସରକାରୀ ସୁବିଧା ନିହାତି ଆବଶ୍ୟକ ହୋଇପଡ଼ିଛି ।