Educated Unemployment: ୫ମ ପାସ୍ କରିଥିଲେ ସରକାରୀ ଚାକିରି, ପାଠପଢ଼ି ମାଳମାଳ ଉଚ୍ଚଶିକ୍ଷିତ ବେକାରୀ

ପାଠପଢ଼ି ମାଳମାଳ ଉଚ୍ଚଶିକ୍ଷିତ ବେକାରୀ । ଚାକିରି ପାଇଁ ଶିକ୍ଷାଗତ ଯୋଗ୍ୟତା ୫ମ ପାସ୍ । କିନ୍ତୁ ପରୀକ୍ଷା ଦେଲେ ଗ୍ରାଜୁଏଟ୍-ପିଜି ପିଲା । ସମ୍ବଲପୁରରେ ବେକାରୀର ଏ ବିକଳ ଚିତ୍ର ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ୧୮୭ଟି ହୋମଗାର୍ଡ ପଦ ପାଇଁ ୮ ହଜାର ପରୀକ୍ଷାର୍ଥୀ ପରୀକ୍ଷା ଦେଉଛନ୍ତି । ଖୋଲା ଆକାଶ ତଳେ ଚାଲିଛି ଚାକିରି ପାଇଁ କାଗଜ କଲମର ଯୁଦ୍ଧ । ଯିଏ ଧାର୍ଯ୍ୟ ମାର୍କ ଠାରୁ ଅଧିକ ମାର୍କ ରଖିବ ସିଏ ନିଯୁକ୍ତି ପାଇବ । ପାଠପଢ଼ି ଚାକିରି ନମିଳିବାରୁ ଯୁବପିଢ଼ିଙ୍କ ଭବିଷ୍ୟତ ଏବେ ଦିଗହରା ହୋଇଛି । 

ଜମାଦାରପାଲି ଏୟାରଷ୍ଟ୍ରିପରେ ଚାଲିଥିଲା ହୋମଗାର୍ଡ ନିଯୁକ୍ତି ପରୀକ୍ଷା । ସମ୍ବଲପୁର ଜିଲ୍ଲାର ବିଭିନ୍ନ ଥାନାରେ ୧୮୭ ହୋମ୍ ଗାର୍ଡ ପଦବୀ ଖାଲି ଥିବାରୁ ଏଥିଲାଗି ବିଜ୍ଞପ୍ତି ପ୍ରକାଶ ପାଇଥିଲା । ତେଣୁ ପ୍ରାୟ ୧୧ ହଜାରରୁ ଅଧିକ ଆଶାୟୀ, ଚାକିରି ପାଇଁ ଆବେଦନ କରିଥିଲେ । ଗୃହରକ୍ଷୀ ପଦବୀ ଲାଗି ଏତେ ସଂଖ୍ୟାରେ ପିଲାଙ୍କ ଆବେଦନକୁ ନେଇ କର୍ତ୍ତୃପକ୍ଷ ଏୟାରଷ୍ଟ୍ରିପ ଭଳି ସ୍ଥାନକୁ ଲିଖିତ ପରୀକ୍ଷା ପାଇଁ ବାଛିଥିଲେ । ଆଉ ଖୋଲାମେଲାରେ ପରୀକ୍ଷା ଦେଇଥିଲେ ପରୀକ୍ଷାର୍ଥୀ । ଗୃହରକ୍ଷୀ ପାଇଁ ସର୍ବନିମ୍ନ ଶିକ୍ଷାଗତ ଯୋଗ୍ୟତା ପଞ୍ଚମ ଶ୍ରେଣୀ ଥିବା ବେଳେ ଅନେକ ଉଚ୍ଚଶିକ୍ଷିତ ଯୁବକଯୁବତୀ ପରୀକ୍ଷା ଦେଇଥିବା ଦେଖିବାକୁ ମିଳିଥିଲା । 

ଆମ ରାଜ୍ୟର ବେକାରୀ ସମସ୍ୟାକୁ ଏ ଚିତ୍ର ପଦାରେ ପକାଇ ଦେଇଛି । ସାଧାରଣ ଚାକିରିଟିଏ ପାଇଁ ଏବେର ଯୁବପିଢ଼ି କିଭଳି ପରିଶ୍ରମ ଜାରି ରଖିଛି ଏ ଚିତ୍ର ବର୍ଣ୍ଣନା କରୁଛି ।