Blessings Online, Feast Offline : ଭର୍ଚୁଆଲରେ ବରକନ୍ୟାଙ୍କୁ ଆଶୀର୍ବାଦ ଦେଇ ବାହାଘର ଭୋଜି ଖାଇଲେ, ଇଣ୍ଡିଗୋ ବିମାନ ପାଇଁ ସବୁ ହେଲା ଗଡବଡ …

ଇଣ୍ଡିଗୋ ବିମାନ ସେବାରେ ଗୁରୁତର ସଂକଟ ପାଇଁ କିଏ କେତେ ଯେ ହଇରାଣ ହୋଇଛନ୍ତି, ତାର କିଛି ହିସାବ ନାହିଁ । କିଏ ଚାକିରି ପାଇଁ ଇଣ୍ଟରଭ୍ୟୁ ଦେବାକୁ ବାହାରି ଅଧାରେ ଅଟକି ଯାଇଛନ୍ତି ତ ଆଉ କିଏ ହସ୍ପିଟାଲ ଯିବାକୁ ବାହାରି ଏୟାରପୋର୍ଟ ଲାଉଞ୍ଜରେ ପଡ଼ିରହିଛନ୍ତି । ହେଲେ ନୂଆକରି ବାହା ହୋଇଥିବା ଇଂଜିନିୟର ଦମ୍ପତି ଯେଉଁ ଅବସ୍ଥା ଭୋଗିଛନ୍ତି, ତାହା ଜାଣିଲେ ଆପଣଙ୍କ ମନ ବି ଖରାପ ହୋଇଯିବ ।

ଗତ ନଭେମ୍ବର ୨୩ରେ କର୍ଣ୍ଣାଟକର ମେଧା କ୍ଷୀରସାଗରଙ୍କୁ ବିବାହ କରିଥିଲେ ଓଡ଼ିଶାର ସଙ୍ଗମ ଦାସ । ଉଭୟ ବେଙ୍ଗାଲୁରୁରେ ଏକ ସଫ୍ଟୱେର୍ କଂପାନୀରେ ଚାକିରି କରୁଛନ୍ତି । ୨୩ ତାରିଖରେ ଭୁବନେଶ୍ବରରେ ବାହାଘର ପରେ ଯୋଜନା ଥିଲା ଡିସେମ୍ବର ୩ ତାରିଖରେ କର୍ଣ୍ଣାଟକର ହୁବ୍ଲିରେ ରିସେପ୍ସନ୍ ଭୋଜି ଦିଆଯିବ । ବାହାଘର ଖୁସିରେ ଖୁସିରେ ଭୁବନେଶ୍ବରରେ ସରିଲା । ୨ ତାରିଖ ଦିନ ସକାଳ ୯ଟାରେ ବରକନ୍ୟା ସଙ୍ଗମ ଏବଂ ମେଧା ବାହାରିଲେ ହୁବ୍ଲି  ।

ବରକନ୍ୟାଙ୍କ ମନ ଖଟା ହୋଇଗଲା

ଭୁବନେଶ୍ବର ଏୟାରପୋର୍ଟରେ ପହଞ୍ଚି ଯାହା ଶୁଣିଲେ ସେମାନଙ୍କ ମନ ଖଟା ହୋଇଗଲା । ବେଙ୍ଗାଲୁରୁ ଯିବାକୁ ଥିବା ଇଣ୍ଡିଗୋ ବିମାନଟି କୌଣସି କାରଣରୁ ବିଳମ୍ବ ଥିବା ସୂଚନା ପାଇଥିଲେ । ୨ ତାରିଖ ସକାଳ ୯ଟାରୁ ୩ ତାରିଖ ସକାଳ ପର୍ଯ୍ୟନ୍ତ ପରିବାର ପରିଜନଙ୍କ ସହ ଉଭୟ ଭୁବନେଶ୍ବର ଏୟାରପୋର୍ଟରେ ଅପେକ୍ଷା କରି କରି ଶେଷରେ ନିରାଶ ହୋଇ ଘରକୁ ଫେରିଲେ । ଇଣ୍ଡିଗୋ ବିମାନ ପୂରା ବାତିଲ ହୋଇଗଲା । ଉଭୟ ବରକନ୍ୟା ଆଉ ହୁବ୍ଲି ଯାଇପାରିଲେନି ।

ଅନ୍ୟପକ୍ଷରେ ସେପଟେ ହୁବଲିରେ ପୂର୍ବ ଯୋଜନା ଅନୁସାରେ ବାହାଘର ରିସେପ୍ସନ୍ ଭୋଜି ଆୟୋଜନ କଲେ କନ୍ୟାପକ୍ଷ ଲୋକେ । ବରକନ୍ୟା ଭୁବନେଶ୍ବରରେ ରହିଲେ । ଭୋଜି ହେଲା କର୍ଣ୍ଣାଟକ ହୁବ୍ଲିରେ । କଣ ଆଉ କରାଯିବ ? ଉଭୟ ଯେହେତୁ ସଫ୍ଟୱେର୍ ଇଂଜିନିୟର ଶେଷକୁ ନିଜ ପାଠକୁ କାମରେ ଲଗାଇଲେ । ଏଇଠି ଭୁବନେଶ୍ବରରେ ବରକନ୍ୟା ବେଶରେ ସଜେଇ ହୋଇ ବସିଲେ ନବଦମ୍ପତି ସଙ୍ଗମ ଏବଂ ମେଧା । ସେପଟେ ହୁବ୍ଲିରେ ରିସେପସନ ଭୋଜି ଚାଲିଲା । ଭର୍ଚୁଆଲ୍ ମୋଡ୍ରେ ଭିଡିଓ କନଫରେନ୍ସିଂ ଜରିଆରେ ଉଭୟ ଅତିଥିମାନଙ୍କୁ ଦେଖାଦେଲେ । ଅତିଥିମାନେ ଆସିଲେ ।

ରିସେପସନ ହଲରେ ଲାଗିଥିବା ବଡ଼ ଭିଡିଓ ସ୍କ୍ରିନରେ ବରକନ୍ୟାଙ୍କୁ ଦେଖି ସେଇଠୁ ଆଶୀର୍ବାଦ ଦେଲେ । ଏପଟେ ଭୁବନେଶ୍ବରରେ ବସି ଭର୍ଚୁଆଲରେ ଅତିଥିମାନଙ୍କ ଠାରୁ ଆଶୀର୍ବାଦ ଗ୍ରହଣ କଲେ ନବଦମ୍ପତି ସଙ୍ଗମ ଓ କ୍ଷୀରସାଗର । ଇଣ୍ଡିଗୋ ପାଇଁ ନିଜ ବାହାଘର ଭୋଜି ଖାଇପାରିନଥିବା ସଙ୍ଗମ ଓ କ୍ଷୀରସାଗରଙ୍କ କଥା ଏବେ ଯିଏ ଶୁଣୁଛି ସିଏ କହୁଛି ହାୟରେ ଇଣ୍ଡିଗୋ, ତୁ କଣ କଲୁ ?