Big Break in SI Exam Scam: ନୀତୀଶ କୁମାର ଓ ଅନ୍ୟ ଅଭିଯୁକ୍ତଙ୍କୁ ରିମାଣ୍ଡରେ ନେଲା CBI, ଆହୁରି ଖୋଲିବ ପୋଲିସ SI ପରୀକ୍ଷା ସ୍କାମ ଗୁମର

ପୋଲିସ SI ପରୀକ୍ଷା ସ୍କାମ ମାମଲାରେ ଆଜିଠୁ ୨ ଦିନିଆ ରିମାଣ୍ଡରେ ଗଲେ ଅଭିଯୁକ୍ତ ମୁନା ମହାନ୍ତି, ଶ୍ରୀକାନ୍ତ ମହାରଣା, ଟି. ଅଭିମନ୍ୟୁ ଦୋରା ଓ ପ୍ରିୟଦର୍ଶିନୀ ସାମଲ । ସେପଟେ ବିହାରରୁ ଗିରଫ ଅଭିଯୁକ୍ତ ନୀତୀଶ କୁମାରକୁ ଗତକାଲି ଭୁବନେଶ୍ବର କୋର୍ଟରେ ହାଜର କରିବା ପରେ ୨ ଦିନ ରିମାଣ୍ଡରେ ନେଇଛି CBI । ଏହା ସହ ମାମଲାରେ ସାମ୍ନାକୁ ଆସିଛି ଆନ୍ତଃରାଜ୍ୟ ଲିଙ୍କ ।

ରିମାଣ୍ଡରେ ନେଇ ଏହି ସମସ୍ତ ଅଭିଯୁକ୍ତଙ୍କୁ ସିବିଆଇ ମୁଁହାମୁହିଁ ଜେରା କରିବ । ଏହି ଘଟଣାରେ ଆଉ କିଏ କିଏ ସଂପୃକ୍ତ, କେତେଜଣ ବଡ଼ବଡ଼ିଆ ଏହି ସ୍କାମ ପଛରେ ଅଛନ୍ତି ସେନେଇ ଜେରା ପରେ ତଥ୍ୟ ପାଇପାରେ ସିବିଆଇ ।

ପୋଲିସ ଏସଆଇ ସ୍କାମରେ ପୁଣି ଜଣେ ଏସଏସବି ଯବାନଙ୍କ ଲିଙ୍କ ଜଣାପଡିଥିଲା । ଆଗରୁ ଏହି ମାମଲାରେ ଗିରଫ ହୋଇଥିଲେ ଏସଏସବି ଯବାନ ବିଶ୍ବରଞ୍ଜନ ବେହେରା । ଆଉ ଏବେ ସ୍ପେଶାଲ୍ ସିକ୍ୟୁରିଟି ବାଟାଲିୟନ ଯବାନ ଅର୍ଜୁନ ନାଏକଙ୍କୁ ବାନ୍ଧିଛି ସିବିଆଇ । ବିଶ୍ବରଞ୍ଜନଙ୍କ ଭଳି ଅର୍ଜୁନ ମଧ୍ୟ ଆଗରୁ ନବୀନ ନିବାସରେ ଡ୍ୟୁଟି କରୁଥିବା ଜଣାପଡିଛି । 

ପାୱାର କରିଡରରେ ରହି ସ୍କାମ

୨ ଦିନର ଜେରା ପରେ ଅର୍ଜ୍ଜୁନ ନାଏକଙ୍କ ସହ ନିମାଇଁ ଚରଣ ସାହୁଙ୍କୁ ଗିରଫ କରିଥିଲା ସିବିଆଇ  । ଏହି ଦୁଇ ଜଣ ପୂର୍ବରୁ ଗିରଫ ବିରଞ୍ଚି କୁମାର ନାଏକଙ୍କ  ସହଯୋଗୀ ଥିଲେ । ତେବେ ଅର୍ଜୁନ ଙ୍କ ଗିରଫଦାରୀ ପରେ ପୁଣିଥରେ ସାମ୍ନାକୁ ଆସିଛି ପାୱାର କରିଡରରେ ରହି କେମିତି ହେଉଥିଲା ସ୍କାମ । ଏସଏସବି ଯବାନ ଭାବେ ଅର୍ଜୁନ କରୁଥିଲା ନବୀନ ନିବାସରେ ଡ୍ୟୁଟି । ଆଉ ଆଶାୟୀ ପରୀକ୍ଷାର୍ଥୀଙ୍କୁ ଦେଉଥିଲା ବଡ ଭରସା ।

ଶଙ୍କର ପୃଷ୍ଟି ସିଣ୍ଡିକେଟରେ  ଅର୍ଜୁନ ଓ ବିଶ୍ବରଂଜନ ଭଳି ପୋଲିସ କର୍ମଚାରୀ ଥିଲେ ସୋ କେଶ । ଏମାନେ ତତ୍କାଳୀନ ମୁଖ୍ୟମନ୍ତ୍ରୀଙ୍କ ଘରେ ଡ୍ୟୁଟି କରୁଥିବାରୁ ଆଶାୟୀଙ୍କୁ ପ୍ରଲୋଭନ ଦେଖାଇ ଚାକିରି ବିକ୍ରି କରୁଥିବାର ସୁରାକ ପାଇଛି ସିବିଆଇ । ସେପଟେ ସିବିଆଇ କାର୍ଯ୍ୟାଳୟରେ ବିରଞ୍ଚିଙ୍କ ସହ ଏକାଧିକ ଆଶାୟୀ ପରୀକ୍ଷାର୍ଥୀଙ୍କୁ ମୁହାଁମୁହିଁ ଜେରା କରାଯାଇଛି । 

ଏଣେ ପୂରା ନେଟୱର୍କର ମାଷ୍ଟରମାଇଣ୍ଡ ଶଙ୍କର ପୃଷ୍ଟି ଓ ଦଲାଲ ମୁନା ମହାନ୍ତିଙ୍କ ଚେର ବିହାର ଯାଏଁ ଲମ୍ବିଥିବା ପ୍ରମାଣ ମିଳିଛି । ଯେଉଁଥି ପାଇଁ ସିବିଆଇର ଏକ  ଟେକ୍ନିକାଲ ଟିମ ବିହାରରୁ ଅଭିଯୁକ୍ତକୁ ଧରିବା ପାଇଁ ଲାଗିପଡିଥିଲେ । ସିବିଆଇ ସୂତ୍ରରୁ ମିଳିଥିବା ସୂଚନା ଅନୁସାରେ, ପୋଲିସ ଏସଆଇ ପରୀକ୍ଷା କେଳେଙ୍କାରୀ ମାମଲାରେ ଗିରଫଦାରୀ ସଂଖ୍ୟା ଶହେ ଟପିଯାଇପାରେ । ପୂର୍ବରୁ ଏହି ମାମଲାରେ ୧୧୪ ଜଣ  ପରୀକ୍ଷାର୍ଥୀ ସମେତ ୧୨ ଦଲାଲଙ୍କୁ ଗିରଫ କରିଥିଲା କ୍ରାଇମବ୍ରାଞ୍ଚ ।