AI Help: ଆର୍ଟିଫିସିଆଲ ଇଣ୍ଟେଲିଜେନ୍ସର ଚମତ୍କାର, ପୁଣି ନିଜ ସ୍ୱରରେ କଥା ହେଲେ ମହିଳା...

ଆର୍ଟିଫିସିଆଲ ଇଣ୍ଟେଲିଜେନ୍ସ (AI) ଲୋକଙ୍କ ଜୀବନକୁ ସମ୍ପୂର୍ଣ୍ଣ ରୂପେ ବଦଳାଇ ଦେଇଛି। ପ୍ରତ୍ୟେକ କ୍ଷେତ୍ରରେ ଏଆଇର ବ୍ୟବହାର ହେଉଛି। ମେଡିକାଲ କ୍ଷେତ୍ରରେ ଏଆଇ ଏକ ବରଦାନ ସାବ୍ୟସ୍ତ ହେଉଛି। ଏଆଇର ସାହାଯ୍ୟରେ ଜଣେ ମହିଳା ବର୍ଷ ବର୍ଷ ପରେ ନିଜ ମୂଳ ସ୍ୱରରେ କଥା ହେବାକୁ ସକ୍ଷମ ହୋଇଛନ୍ତି। ବ୍ରିଟିଶ ଆର୍ଟିଷ୍ଟ ସାରା ଏଜେକିଲ, ମୋଟର ନିଉରନ ରୋଗ (MND) ରୋଗରେ ପୀଡ଼ିତ, ଯାହା କାରଣରୁ ତାଙ୍କର କଥା ହେବାର କ୍ଷମତା ହରାଇଥିଲା। କିନ୍ତୁ ଏଆଇ ଏବଂ ଏକ ପୁରୁଣା ଭିଡିଓର ମାତ୍ର ୮ ସେକେଣ୍ଡର ଅସ୍ପଷ୍ଟ କ୍ଲିପ୍‌ର ସାହାଯ୍ୟରେ ସେ ପୁଣି ନିଜ ସ୍ୱରରେ କଥା ହେବାକୁ ସକ୍ଷମ ହୋଇଛନ୍ତି।

ସାରା ଏଜେକିଲଙ୍କ ପାଇଁ ଏହା ଏକ ଚମତ୍କାରଠାରୁ କମ୍ ନୁହେଁ। ସେ ତାଙ୍କ ଦ୍ୱିତୀୟ ସନ୍ତାନର ଗର୍ଭଧାରଣ ସମୟରେ ୩୪ ବର୍ଷ ବୟସରେ MND ରୋଗରେ ପୀଡ଼ିତ ହେବା ପରେ କଥା କହିପାରିନଥିଲେ। ଏହି ରୋଗ ସ୍ନାୟୁ ତନ୍ତ୍ରର କିଛି ଅଂଶକୁ ଧୀରେ ଧୀରେ କ୍ଷତିଗ୍ରସ୍ତ କରେ ଏବଂ ଜିଭ, ମୁହଁ ଓ ଗଳାର ମାଂସପେଶୀକୁ ଦୁର୍ବଳ କରିପାରେ, ଯାହା କାରଣରୁ କିଛି ରୋଗୀ ସମ୍ପୂର୍ଣ୍ଣ ରୂପେ ନିଜ ସ୍ୱର ହରାଇଥାନ୍ତି।

ଉତ୍ତର ଲଣ୍ଡନରେ ରହୁଥିବା ଏଜେକିଲ MND ରୋଗରେ ପୀଡ଼ିତ ହେବା ପରେ ବର୍ଷ ବର୍ଷ ଧରି କମ୍ପ୍ୟୁଟର ଓ ଧ୍ୱନି ଉତ୍ପାଦନ କରୁଥିବା ଟେକ୍ନୋଲୋଜିର ସାହାଯ୍ୟରେ ଅନ୍ୟମାନଙ୍କ ସହ କଥାବାର୍ତ୍ତା କରୁଥିଲେ। କିନ୍ତୁ ଏହି ସ୍ୱର ତାଙ୍କ ନିଜ ସ୍ୱରଠାରୁ ସମ୍ପୂର୍ଣ୍ଣ ଭିନ୍ନ ଥିଲା। ତାଙ୍କୁ ଲାଗୁନଥିଲା ଯେ ସେ ନିଜେ କଥା ହେଉଛନ୍ତି। ଏହାକୁ ନେଇ ସେ ବେଶ୍‌ ଚିନ୍ତିତ ରହୁଥିଲେ। ତଥାପି, ସେ ମାନି ନେଇଥିଲେ ଯେ ଏବେ ତାଙ୍କୁ ଏହି କମ୍ପ୍ୟୁଟର ସ୍ୱର ସହିତ ଜୀବନ କାଟିବାକୁ ପଡ଼ିବ।

ସାରା ଏଜେକିଲଙ୍କ ସନ୍ତାନ ଅବୀବା ଓ ଏରିକ ବଡ଼ ହେଲେ ଏବଂ ସେମାନେ ଜାଣି ନଥିଲେ ଯେ ତାଙ୍କ ମା’ କେବେ କିପରି କଥା ହେଉଥିଲେ। କିନ୍ତୁ ଯେତେବେଳେ ସେମାନେ ଜାଣିଲେ ଯେ ତାଙ୍କ ମା’ ନିଜ ସ୍ୱର ନେଇ କେତେ ଚିନ୍ତିତ, ସେମାନେ ଏହି ସମସ୍ୟାର ସମାଧାନ ଖୋଜିବା ଆରମ୍ଭ କଲେ। ଏହି ସମୟରେ ସେମାନେ ଜାଣିଲେ ଯେ ଏକ୍ସପର୍ଟ ଟେକ୍ନୋଲୋଜି ବ୍ୟବହାର କରି ଜଣେ ବ୍ୟକ୍ତିର ମୂଳ ସ୍ୱରର କମ୍ପ୍ୟୁଟରାଇଜଡ ସଂସ୍କରଣ ତିଆରି କରିବାରେ ଦ୍ରୁତ ଉନ୍ନତି ହେଉଛି।

ବ୍ରିଟେନର ମେଡିକାଲ କମ୍ୟୁନିକେସନ କମ୍ପାନୀ ସ୍ମାର୍ଟବକ୍ସର ସାଇମନ ପୁଲ କହିଥିଲେ ଯେ ଏହି ଟେକ୍ନୋଲୋଜି ପାଇଁ ସାଧାରଣତଃ ଲମ୍ବା ଓ ଉଚ୍ଚ ଗୁଣବତ୍ତା ବିଶିଷ୍ଟ ରେକର୍ଡିଂର ଆବଶ୍ୟକତା ହୁଏ। ଏହା ପରେ ଏପରି ସ୍ୱର ଉତ୍ପନ୍ନ ହୁଏ, ଯାହା ରୋଗୀର ସ୍ୱର ପରି ଲାଗେ । କମ୍ପାନୀ ଆରମ୍ଭରେ ଏଜେକିଲଙ୍କଠାରୁ ଏକ ଘଣ୍ଟାର ଅଡିଓ ମାଗିଥିଲେ। ଯେଉଁମାନଙ୍କୁ MND ପରି ରୋଗ ହେବା କାରଣରୁ କଥା ହେବାର କ୍ଷମତା ହରାଇବାର ଆଶଙ୍କା ରହିଛି, ସେମାନଙ୍କୁ ବର୍ତ୍ତମାନ ନିଜର “ପରିଚୟ” ସୁରକ୍ଷିତ ରଖିବା ପାଇଁ ଯଥାଶୀଘ୍ର ନିଜ ସ୍ୱର ରେକର୍ଡ କରିବାକୁ କୁହାଯାଏ, ଯାହା ଦ୍ୱାରା ସେମାନଙ୍କର କଥା ହେବାର କ୍ଷମତା ମଧ୍ୟ ବଜାୟ ରହିପାରେ।

ଯେତେବେଳେ ଏଜେକିଲଙ୍କୁ ମାତ୍ର ଏକ ଅତ୍ୟନ୍ତ ଛୋଟ ଓ ନିମ୍ନ ଗୁଣବତ୍ତା ବିଶିଷ୍ଟ କ୍ଲିପ୍ ମିଳିଲା, ପୁଲ କହିଥିଲେ ଯେ ନିରାଶ ହୋଇଥିଲେ । ୧୯୯୦ ଦଶକର ଏକ ହୋମ ଭିଡିଓ କ୍ଲିପ୍ ମାତ୍ର ୮ ସେକେଣ୍ଡ ଲମ୍ବା ଥିଲା, ଧୀମା ଏବଂ ପୃଷ୍ଠଭୂମିରେ ଟିଭିର ଶବ୍ଦ ଥିଲା। ପୁଲ ନିଉୟର୍କ ସ୍ଥିତ ଏଆଇ ଭଏସ୍ ଏକ୍ସପର୍ଟ ଇଲେଭେନଲାବ୍ସ ଦ୍ୱାରା ବିକଶିତ ଟେକ୍ନୋଲୋଜିର ସାହାଯ୍ୟ ନେଇଥିଲେ, ଯାହା କେବଳ ଅତି କମ ଆଧାରରେ ସ୍ୱର ଉତ୍ପାଦନ କରେନି, ବରଂ ଏହାକୁ ଏକ ପ୍ରକୃତ ମଣିଷର ସ୍ୱର ପରି ମଧ୍ୟ ତିଆରି କରିପାରେ।