LIVE TV
ରାଜ୍ୟ କଂଗ୍ରେସ ର ଦୁଇ ବିଧାୟକଙ୍କୁ କାରଣ ଦର୍ଶାଅ ନୋଟିସ୍ ଜାରି ହୋଇଛି। ପିସିସି ଶୃଙ୍ଖଳା କମିଟି ଅଧ୍ୟକ୍ଷ କିଶୋର ପଟେଲ ବିଧାୟକ ମହମ୍ମଦ ମୋକିମ ଓ ସୁରେଶ ରାଉତରାୟ ଙ୍କୁ ଏହି ନୋଟିସ୍ ଜାରି କରିଛନ୍ତି।
ଦଳୀୟ ଶୃଙ୍ଖଳା ଓ ଅନୁଶାସନ ଭଙ୍ଗ ଅଭିଯୋଗରେ ମୋକିମ ଓ ସୁର ରାଉତରାୟଙ୍କୁ ନୋଟିସ୍ କରାଯାଇଛି। ୭ ଦିନ ଭିତରେ ନୋଟିସ୍ର ଉତ୍ତର ରଖିବାକୁ ୨ ବିଧାୟକଙ୍କୁ ନିର୍ଦ୍ଦେଶ ଦିଆଯାଇଛି। ପଦ୍ମପୁରରେ ଭୋଟ୍ ବିକ୍ରି ନେଇ ଗଣମାଧ୍ୟମରେ ୨ ବିଧାୟକ ଆକ୍ଷେପ କରିଥିଲେ।
ନୋଟିସ୍ ଜାରି ନେଇ ସୁର ରାଉତରାୟ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ଯଦି ନୋଟିସ୍ ହୋଇଛି ଅଭିନନ୍ଦନ। ମୋ ପାଟିରୁ ସତ କଥା ବାହାରେ। କଂଗ୍ରେସର କ୍ଷତି କରିବାକୁ ଦେବିନି । ମୁଁ ଚେଲ୍ଲାକୁମାରଙ୍କ ନାଁ କହିନି । ଶରତ ପଟ୍ଟନାୟକଙ୍କ ନାଁ କହିନି ।
ପଦ୍ମପୁର ଉପନିର୍ବାଚନ ପରେ ରାଜନୀତି ସରଗରମ ହୋଇଥିଲା। ବିଜେଡି ଓ କଂଗ୍ରେସ ଡିଲ୍ ହୋଇଥିବା ନେଇ ବିଜେପି ନେତା ଜୟନାରାୟଣ ମିଶ୍ର ଅଭିଯୋଗ କରିଥିଲେ। ତେବେ ଏହି ଅଭିଯୋଗ ସତ ବୋଲି କଂଗ୍ରେସ ବିଧାୟକ ସୁର ରାଉତରାୟ କହିଥିଲେ। ସୁର କହିଥିଲେ ଯେ, କଂଗ୍ରେସ ପାଇଁ ଯେଉଁମାନେ ପ୍ରଚାର କରିବାକୁ ଯାଇଥିଲେ, ସେମାନେ କଂଗ୍ରେସ ପ୍ରାର୍ଥୀଙ୍କୁ ଜିତାଇବା ପାଇଁ ନୁହେଁ ବରଂ ହରାଇବା ପାଇଁ ଯାଇଥିଲେ।
