LIVE TV
ଓଡ଼ିଶା ରାଜନୀତିରେ ବିରାଟ ଶୂନ୍ୟସ୍ଥାନ । ଜଣେ ଲଢୁଆ ବିଧାୟକଙ୍କ ଦେହାବସାନ । ଏକ ଶାଣିତ ସ୍ୱରର ଅବସାନ ଘଟିଛି । ଧାମନଗର ବିଜେପି ବିଧାୟକ ତଥା ବିରୋଧୀଦଳ ଉପନେତା ବିଷ୍ଣୁ ସେଠୀ ଙ୍କ ପରଲୋକ ହୋଇଛି । ଭୁବନେଶ୍ୱର ଏମ୍ସରେ ଚିକିତ୍ସାଧୀନ ଅବସ୍ଥାରେ ଆଜି ସକାଳ ୭ଟା ୪୫ରେ ଶେଷ ନିଶ୍ୱାସ ତ୍ୟାଗ କରିଛନ୍ତି ବିଷ୍ଣୁ । ମୃତ୍ୟୁ ବେଳକୁ ତାଙ୍କୁ ୬୧ ବର୍ଷ ବୟସ ହୋଇଥିଲା । ବର୍ଷେ ହେଲା ସେ କିଡନୀ ରୋଗରେ ପୀଡ଼ିତ ଥିଲେ । ନିୟମିତ ଡାଇଲିସିସ୍ ଚାଲିଥିଲା, ତେବେ ମାସକ ତଳେ ଲଙ୍ଗ୍ସରେ ସଂକ୍ରମଣ ଓ ବ୍ରେନ୍ ଷ୍ଟ୍ରୋକ୍ ହେବାରୁ ତାଙ୍କୁ ICUରେ ଭର୍ତ୍ତି କରାଯାଇଥିଲା । ସେବେଠୁ ଚିକିତ୍ସା ଚାଲିଥିଲା ଏବଂ ଆଜି ତାଙ୍କର ଦେହାନ୍ତ ହୋଇଛି । ବିଷ୍ଣୁଙ୍କ ପରଲୋକ ସମ୍ପର୍କରେ ସୂଚନା ଦେଇଥିଲେ ଭୁବନେଶ୍ୱର ଏମସ୍ ସୁପରିଟେଣ୍ତେଣ୍ଟ ଏସ୍ ଏନ୍ ମହାନ୍ତି ।
ଆଉ ନାହାନ୍ତି ବିରୋଧୀଦଳ ନେତା ବିଷ୍ଣୁ ସେଠୀ । ସକାଳ ୮ଟା ବେଳକୁ ଏ ଖବର ଯେମିତି ବିଜୁଳି ବେଗରେ ଖେଳି ଯାଇଥିଲା । ରାଜନେତା, ସାହିତ୍ୟିକ, ବିଜେପି କର୍ମୀ ଓ ଶୁଭେଚ୍ଛୁ ସମସ୍ତେ ହତବାକ୍ ହୋଇ ଯାଇଥିଲେ ଏବଂ ଶେଷ ଦର୍ଶନ ପାଇଁ ଏମସ୍ ମୁହାଁ ହୋଇଥିଲେ । ମଧ୍ୟାହ୍ନ ୧୨ଟା ବେଳକୁ ଏମସ୍ରୁ ବିଷ୍ଣୁ ସେଠୀଙ୍କ ମରଶରୀର ପ୍ରଥମେ ବିଧାନସଭା ପରିସରକୁ ନିଆଯାଇଥିଲା । ସେଠାରେ ଗାର୍ଡ ଅଫ୍ ଅନର ଦିଆଯିବା ପରେ ବାଚସ୍ପତି ବିକ୍ରମ ଆରୁଖ ଶ୍ରଦ୍ଧାଞ୍ଜଳି ଜଣାଇଥିଲେ । ଏହା ପରେ ଦଳମତ ନିର୍ବିଶେଷରେ ସାଥୀ ବିଧାୟକ ଓ ମନ୍ତ୍ରୀ ମାନେ ବି ଶ୍ରଦ୍ଧାସୁମନ ଅର୍ପଣ କରିଥିଲେ ।
Also Read
ବିଧାନସଭାରୁ ସ୍ୱର୍ଗତ ବିଷ୍ଣୁ ସେଠୀଙ୍କ ମରଶରୀରକୁ ରାଜ୍ୟ ବିଜେପି କାର୍ଯ୍ୟାଳୟକୁ ନିଆଯାଇଥିଲା । ସେଠାରେ ରାଜ୍ୟ ବିଜେପି ସଭାପତି ସମୀର ମହାନ୍ତି ପାର୍ଥୀବ ଶରୀର ଉପରେ ଦଳୀୟ ପତାକା ପକାଇ ଶ୍ରଦ୍ଧାଞ୍ଜଳି ଦେଇଥିଲେ । ରାଜ୍ୟ ବିଜେପି ପ୍ରଭାରୀ ଡି. ପୁରେନ୍ଦେଶ୍ୱରୀଙ୍କ ସମେତ ଦଳର ବହୁ ନେତା ଓ କର୍ମୀମାନେ ବି ଶେଷ ଦର୍ଶନ କରିଥିଲେ । ଦଳୀୟ ନେତା କହିଛନ୍ତି ଯେ, ବିଷ୍ଣୁ ସେଠୀଙ୍କ ଭଳି ଜଣେ ଲଢୁଆ ନେତା ଓ ଦକ୍ଷ ସଂଗଠକଙ୍କ ବିୟୋଗ ରାଜ୍ୟ ବିଜେପି ପାଇଁ ଅପୂରଣୀୟ କ୍ଷତି ।
ବିଷ୍ଣୁ ସେଠୀଙ୍କ ବିୟୋଗରେ ଶୋକ ପ୍ରକାଶ କରିଛନ୍ତି ରାଷ୍ଟ୍ରପତି ଦ୍ରୈପଦୀ ମୁର୍ମୁ । ତାଙ୍କ ଦେହାନ୍ତ ଓଡ଼ିଶା ରାଜନୀତିରେ ଏକ ଅପୂରଣୀୟ ଶୂନ୍ୟ ସ୍ଥାନ ସୃଷ୍ଟି କରିଛି ବୋଲି ଟ୍ୱିଟ୍ କରିଛନ୍ତି ରାଷ୍ଟ୍ରପତି । ସେହିପରି ଓଡ଼ିଶାର ବିକାଶରେ ବିଷ୍ଣୁ ବାବୁଙ୍କ ଅତୁଳନୀୟ ଅବଦାନ ଥିଲା ଏବଂ ଜଣେ ପରିଶ୍ରମୀ ବିଧାୟକଭାବେ ତାଙ୍କର ନିଆରା ପରିଚୟ ଥିଲା ବୋଲି ଟ୍ୱିଟ୍ କରିଛନ୍ତିି ପ୍ରଧାନମନ୍ତ୍ରୀ ମୋଦି ।
Saddened by the demise of Shri Bishnu Charan Sethi, a prominent public figure in Odisha. A prolific writer, Shri Sethi was an eminent legislator. His demise leaves a void which is difficult to fill. My heartfelt condolences to his family, well-wishers and followers.
— President of India (@rashtrapatibhvn) September 19, 2022
ବିଷ୍ଣୁଙ୍କ ଅବର୍ତ୍ତମାନରେ ଟ୍ୱିଟ୍ କରି ଗଭୀର ଶୋକବ୍ୟକ୍ତ କରିଛନ୍ତି ରାଜ୍ୟପାଳ ପ୍ରଫେସର ଗଣେଶୀଲାଲ୍ ଓ ଆନ୍ଧ୍ର ରାଜ୍ୟପାଳ ବିଶ୍ୱଭୂଷଣ ହରିଚନ୍ଦନ । ବିଷ୍ଣୁ ସେଠୀଙ୍କ କଲ୍ୟାଣକାରୀ କାର୍ଯ୍ୟ ସର୍ବଦା ସ୍ମରଣୀୟ ରହିବ ବୋଲି ଟ୍ୱିଟ୍ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେହିପରି କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ, ବିଜେପି ରାଷ୍ଟ୍ର ଅଧ୍ୟକ୍ଷ ଜେ.ପି ନଡ୍ଡା ଓ ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡା ମଧ୍ୟ ବିଷ୍ଣୁଙ୍କ ବିୟୋଗରେ ଗଭୀର ଶୋକ ପ୍ରକାଶ କରିଛନ୍ତି ।
ଧାମନଗର ବିଧାୟକ ବିଷ୍ଣୁ ଚରଣ ସେଠୀଙ୍କ ଦେହାନ୍ତ ବିଷୟରେ ଜାଣି ମୁଁ ଦୁଃଖିତ। ଜନପ୍ରତିନିଧି ଭାବେ ଲୋକଙ୍କ ପାଇଁ ତାଙ୍କ କଲ୍ୟାଣକାରୀ କାର୍ଯ୍ୟ ସର୍ବଦା ସ୍ମରଣୀୟ ରହିବ। ଏପରି ଦୁଃଖଦ ସମୟରେ ଶୋକସନ୍ତପ୍ତ ପରିବାର ସଦସ୍ୟଙ୍କ ପ୍ରତି ମୋର ସମବେଦନା ଜଣାଇବା ସହ ତାଙ୍କ ଅମର ଆତ୍ମାର ସଦଗତି କାମନା କରୁଛି।
— Naveen Patnaik (@Naveen_Odisha) September 19, 2022
Deeply pained by the untimely demise of Shri Bishnu Sethi, deputy leader of opposition in the Odisha Legislative Assembly.
— Baijayant Jay Panda (@PandaJay) September 19, 2022
An irreplaceable loss to @BJP4Odisha. His contributions to state politics will always be remembered. My prayers are with the family and friends. Om Shanti🙏🏻 pic.twitter.com/n9kRj2Azee
ବିଷ୍ଣୁଙ୍କ ଅବର୍ତ୍ତମାନରେ ଜନ୍ମଭୂମିରୁ କର୍ମଭୂମି, ସବୁଠି ଶୋକାକୁଳ ପରିବେଶ । ଯଦି ସବୁଠୁ କିଏ ଅଧିକ ମର୍ମାହତ, ତାହାଲେ ସେ ହେଲା ଭଦ୍ରକ ତିହିଡ଼ିର ମଙ୍ଗରାଜପୁର ଗାଁ ପରିବାର, ପଡ଼ୋଶୀ, ସାଙ୍ଗସାଥୀ ସମସ୍ତେ ବାକ୍ଶୂନ୍ୟ । ଜଣେ ପରୋପକାରୀ, ମେଳାପି, ଖୁସି ମିଜାଜ୍ ଓ ସତ୍ୟବାଦୀ ମଣିଷଙ୍କୁ ଝୁରୁଛି ଜନ୍ମମାଟି । ସମସ୍ତଙ୍କ ମୁହଁରେ ସେଇ ଗୋଟିଏ କଥା, ଆମେ ମୂରବୀଶୂନ୍ୟ ହୋଇଗଲୁ । ଏମିତିକି ବିଷ୍ଣୁ ସେଠୀଙ୍କ ପରଲୋକ ଜନିତ ଖବର ମିଳିବାମାତ୍ରେ ତାଙ୍କ ସମର୍ଥକମାନେ ମାଇକ୍ ଯୋଗେ ପ୍ରଚାର କରି ଶେଷ ଦର୍ଶନ ଓ ଶେଷକୃତ୍ୟରେ ସାମିଲ ପାଇଁ ଏମିତି ସମସ୍ତଙ୍କୁ ନିବେଦନ କରିଥିଲେ ।
