ଶପଥ ଗ୍ରହଣ ପରେ କେଉଁ ମନ୍ତ୍ରୀଙ୍କୁ ମିଳିଲା କେଉଁ ବିଭାଗ, ଜାଣନ୍ତୁ...

ଆଜି ଶପଥ ଗ୍ରହଣ ପରେ ମନ୍ତ୍ରୀମାନଙ୍କ ମଧ୍ୟରେ ବିଭାଗ ବଣ୍ଟନ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । 

• ବିକ୍ରମ ଆରୁଖଙ୍କୁ ମିଳିଲା ଅର୍ଥ ବିଭାଗ ଦାୟିତ୍ୱ
• ସୁଦାମ ମାର୍ଣ୍ଡି ହେଲେ ସ୍କୁଲ ଓ ଗଣଶିକ୍ଷା ମନ୍ତ୍ରୀ
• ସାରଦା ନାୟକଙ୍କୁ ଶ୍ରମ ବିଭାଗ ଦାୟିତ୍ୱ

ନିରଞ୍ଜନ ପୂଜାରୀଙ୍କଠାରୁ ଅର୍ଥ ବିଭାଗ ଆଣି ଆରୁଖଙ୍କୁ ଦିଆଗଲା । ଏବେ ନିରଞ୍ଜନଙ୍କ ହାତରେ ସଂସଦୀୟ ବ୍ୟାପାର ଓ ସ୍ୱାସ୍ଥ୍ୟ ବିଭାଗ ଦାୟିତ୍ୱ ଦିଆଯାଇଛି । ସେହିଭଳି ଶ୍ରୀକାନ୍ତ ସାହୁ ଶ୍ରମ ବିଭାଗ ଛାଡ଼ିବା ପରେ ସାରଦା ନାୟକଙ୍କୁ ଏହି ବିଭାଗ ମିଳିଛି । ସମୀର ଦାସଙ୍କ ପରେ ସ୍କୁଲ ଓ ଗଣଶିକ୍ଷା ମନ୍ତ୍ରୀ ହୋଇଛନ୍ତି ସୁଦାମ ମାର୍ଣ୍ତି ।

ଆଜି ରାଜ୍ୟ ମନ୍ତ୍ରିମଣ୍ଡଳର ଅଦଳବଦଳ ହୋଇଛି । କ୍ୟାବିନେଟ୍‌ ମନ୍ତ୍ରୀ ଭାବେ ଶପଥ ନେଇଛନ୍ତି ତିନି ନୂଆ ମନ୍ତ୍ରୀ । ବିକ୍ରମ କେଶରୀ ଆରୁଖ, ସାରଦା ପ୍ରସାଦ ନାୟକ ଓ ସୁଦାମ ମାର୍ଣ୍ତି ଆଜି କ୍ୟାବିନେଟ୍‌ ମନ୍ତ୍ରୀ ଭାବେ ଶପଥ ନେଇଛନ୍ତି। ପଦ ଓ ଗୋପନୀୟତାର ଶପଥ କରାଇଲେ ରାଜ୍ୟପାଳ ଗଣେଷୀ ଲାଲ । ଲୋକସେବା ଭବନର ସମ୍ମିଳନୀ କକ୍ଷରେ ରାଜ୍ୟପାଳ ନୂଆ ମନ୍ତ୍ରୀମାନଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି ।

ସାଧାରଣ ନିର୍ବାଚନର କିଛି ମାସ ପୂର୍ବରୁ ମନ୍ତ୍ରୀମଣ୍ଡଳ ଅଦଳବଦଳକୁ ନେଇ ଅନେକ ପ୍ରଶ୍ନ ଛିଡ଼ା ହୋଇଛି ? କାହିଁକି ନିର୍ବାଚନ ପୂର୍ବରୁ ମନ୍ତ୍ରୀ ମଣ୍ଡଳରେ ଏହି ‘ଫେର ବଦଳ’? ଗଞ୍ଜାମ ଜିଲ୍ଲାରେ ବିଜେଡି ର ସଂଗଠନ ଦୁର୍ବଳ ହେବା ଓ ଗୋଷ୍ଠୀ କନ୍ଦଳ ବଢ଼ିବା ପରେ ଏହାକୁ ପ୍ରଶମିତ କରିବାକୁ ଚେଷ୍ଟା କରିଛି ଦଳା ଆରୁଖଙ୍କୁ ମନ୍ତ୍ରୀ କରାଇ ସଂଗଠନ ସମ୍ଭାଳିବା ସହ ଗଞ୍ଜାମ ଓ କନ୍ଧମାଳରେ ଦଳକୁ ଅଧିକ ମଜବୁତ କରିବାକୁ ଚେଷ୍ଟା କରିବା ଅନୁମାନ କରାଯାଉଛି ।

ସେହିଭଳି ମୟୂରଭଞ୍ଜ ଜିଲ୍ଲାରେ ବଢ଼ୁଥିବା ବିଜେପି ସଂଗଠନକୁ ଦୃଷ୍ଟିରେ ରଖି ପୁଣି ଥରେ ସୁଦାମ ମାର୍ଣ୍ଡିଙ୍କୁ ମନ୍ତ୍ରୀ କରାଯାଇଛି । ତା’ସହ ଦୀର୍ଘ ବର୍ଷ ପରେ ପୁଣି ଥରେ ସାରଦା ନାୟକଙ୍କୁ ମନ୍ତ୍ରୀ କରାଯାଇଛି । କୁହାଯାଉଛି, ଝାରସୁଗୁଡ଼ା ନିର୍ବାଚନରେ ସାରଦାଙ୍କ ପ୍ରଦର୍ଶନ ଓ ଦଳ ପାଇଁ ଆନୁଗତ୍ୟ ଏହାର ପ୍ରମୁଖ କାରଣ । ଏହି ତିନି ଜଣ ପୂର୍ବରୁ ମନ୍ତ୍ରୀ ଭାବେ ଦାୟିତ୍ୱ ତୁଲାଇଛନ୍ତି ।