Biju Jayanti Programme: ଡାକିଲେ ମୋହନ; ଗଲେନି ନବୀନ, ରାଗିକି ଏମିତି କହିଲେ ମୁଖ୍ୟମନ୍ତ୍ରୀ

ରାଜ୍ୟସ୍ତରୀୟ ବିଜୁ ଜୟନ୍ତୀ କାର୍ଯ୍ୟକ୍ରମରେ ବିଶିଷ୍ଟ ଅତିଥି ଭାବେ ଯୋଗଦେବାକୁ ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କୁ ନିମନ୍ତ୍ରଣ କରିଥିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ହେଲେ କାର୍ଯ୍ୟକ୍ରମକୁ ଆସିନଥିଲେ ନବୀନ । ଏହାକୁ ନେଇ ବିରୋଧୀ ଦଳ ନେତାଙ୍କୁ କଡ଼ା ସମାଲୋଚନା କରିଛନ୍ତି ମୁଖ୍ୟମନ୍ତ୍ରୀ । ଯେଉଁମାନେ ନିମନ୍ତ୍ରଣ ସତ୍ତ୍ୱେ ଆସିଲେନି ସେମାନେ ପାପ କରିଛନ୍ତି । ନବୀନ କାର୍ଯ୍ୟକ୍ରମକୁ ନଆସି ପାପ କରିଛନ୍ତି ବୋଲି କହିଛନ୍ତି ମୋହନ ।

ଅଧିକ ପଢ଼ନ୍ତୁ: ବିଜେପିକୁ ଟାର୍ଗେଟ କଲେ ନବୀନ; କହିଲେ, ‘ନାଁ ବଦଳାଇ ପାରନ୍ତି, ଭଲ ପାଇବା ନୁହେଁ’

ରାଜ୍ୟ ସରକାରଙ୍କ ପକ୍ଷରୁ ଭୁବନେଶ୍ୱର ଜୟଦେବ ଭବନଠାରେ ଏହି ବିଜୁ ଜୟନ୍ତୀ କାର୍ଯ୍ୟକ୍ରମ ଆୟୋଜିତ ହୋଇଥିଲା । ଏଥିରେ ଯୋଗଦେଇ ମୁଖ୍ୟମନ୍ତ୍ରୀ ମୋହନ ମାଝୀ କହିଛନ୍ତି, ''ରାଜ୍ୟସ୍ତରୀୟ ବିଜୁ ଜୟନ୍ତୀ ସମାରୋହକୁ ନ ଆସି ନବୀନ ପାପ କରିଛନ୍ତି । ତାଙ୍କୁ ନିମନ୍ତ୍ରଣ କରିଥିଲୁ ସେ ଆସିଥିଲେ ଉତ୍ସବ ପୂର୍ଣ୍ଣାଙ୍ଗ ହୋଇଥାନ୍ତା । ଏହାକୁ ନେଇ ରାଜନୀତି କରିବା କଥା ନୁହେଁ ।'' 

ଏହାସହିତ ବିଜୁ ବାବୁଙ୍କ ଅଧୁରା ସ୍ବପ୍ନ 'ଗାଁକୁ କାମ ମାକୁ ସମ୍ମାନ' କଥା ଉଠାଇ ମଧ୍ୟ ପୂର୍ବ ସରକାର ଉପରେ ଖୁବ ବର୍ଷିଛନ୍ତି ମୋହନ । ସେ କହିଛନ୍ତି, ଯେଉଁମାନେ ବିଜୁ ବାବୁଙ୍କ ଅଧୁରା ସ୍ୱପ୍ନ ପୂରଣ କରିବାକୁ ପ୍ରଚାର କରୁଥିଲେ, ତାହାକୁ ବାସ୍ତବରେ କାର୍ଯ୍ୟକାରୀ କରିପାରିଲେ ନାହିଁ । ବିଜୁ ବାବୁଙ୍କ ସ୍ବପ୍ନ ପୂରଣ କେବଳ ରାଜନୀତିରେ ରହିଗଲା । ହେଲେ ବିଜେପି ସରକାର ଏହାକୁ ବାସ୍ତବିକତା ରୂପ ଦେବାକୁ ଯାଉଛି । ଓଡ଼ିଶା ପାଇଁ ବିଜୁ ବାବୁ ଯେଉଁ ସ୍ବପ୍ନ ଦେଖିଥିଲେ ତାକୁ ଆମ ସରକାର ପୂରଣ କରିବ ।

ଭୁବନେଶ୍ବର ଜୟଦେବ ଭବନରେ ଆୟୋଜିତ ରାଜ୍ୟସ୍ତରୀୟ ବିଜୁ ଜୟନ୍ତୀ ଉତ୍ସବରରେ ନବୀନ ପଟ୍ଟନାୟକ ବିଶିଷ୍ଟ ଅତିଥି ଭାବେ ଯୋଗଦେବାର ଥିଲା । କିନ୍ତୁ ନବୀନ ନଆସିବାରୁ ଉତ୍ସବରୁ ତାଙ୍କ ଚୌକି କାଢି ନିଆଯାଇଥିଲା । ନବୀନ ଉତ୍ସବକୁ ଆସିନଥିବା ବେଳେ କେବଳ ବିଜେଡିର ବରିଷ୍ଠ ନେତା ପ୍ରଫୁଲ୍ଲ ଘଡ଼େଇ ଯୋଗ ଦେଇଥିଲେ ।

ମାର୍ଚ୍ଚ ୫ ତାରିଖରେ ବିଜୁ ପଟ୍ଟନାୟକ ଜନ୍ମଦିନକୁ ୩ ଦଶନ୍ଧି ଧରି ପଞ୍ଚାୟତିରାଜ ଦିବସ ଭାବେ ପାଳନ କରାଯାଉଥିଲା । କିନ୍ତୁ ବିଜେପି ସରକାର ଚଳିତ ବର୍ଷ ବିଜୁ ଜୟନ୍ତୀକୁ ପଞ୍ଚାୟତିରାଜ ଦିବସ ନ ପାଳିବାକୁ ଘୋଷଣା କରିଥିଲେ । କେବଳ ଏହି ଦିନକୁ ରାଜ୍ୟସ୍ତରୀୟ ବିଜୁ ଜୟନ୍ତୀ କାର୍ଯ୍ୟକ୍ରମ ପାଳନ କରିବାକୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ନିର୍ଦ୍ଦେଶ ଦିଆଯାଇଥିଲା । 

ଏହି ଦିନରେ ସରକାରୀ ଛୁଟି ମଧ୍ୟ ବାତିଲ କରାଯାଇଥିଲା । ଯାହାକୁ ନେଇ ବିଜେଡି ନେତାଙ୍କ ମଧ୍ୟରେ ଦେଖିବାକୁ ମିଳିଥିଲା କଡ଼ା ପ୍ରତିକ୍ରିୟା । ଏହାରି ମଧ୍ୟରେ ମୁଖ୍ୟମନ୍ତ୍ରୀ ମୋହନ ନବୀନଙ୍କୁ ରାଜ୍ୟ ସ୍ତରୀୟ ବିଜୁ ଜୟନ୍ତୀ ଉତ୍ସବରେ ଯୋଗ ଦେବାକୁ ନିମନ୍ତ୍ରଣ କରିଥିଲେ । ଏହି କାର୍ଯ୍ୟକ୍ରମକୁ ନବୀନ ଯାଉଛନ୍ତି ନା ନାହିଁ  ତା' ଉପରେ ଥିଲା ସମସ୍ତଙ୍କ ନଜର । ମାତ୍ର ନବୀନ ସମାରୋହରେ ଯୋଗ ଦେଇନଥିଲେ ।

ଅଧିକ ପଢ଼ନ୍ତୁ: ବିଜେପି ସରକାର ଉପରେ ବର୍ଷିଲେ ନବୀନ; କହିଲେ. ‘ବିଜୁଙ୍କ ନାଁ କୁ କାଟିବାକୁ ବିଜେପି ଅପଚେଷ୍ଟା କରୁଛି’