LIVE TV
ସମ୍ପ୍ରସାରିତ ହେଲା ମହାରାଷ୍ଟ୍ର କ୍ୟାବିନେଟର ମନ୍ତ୍ରିମଣ୍ଡଳ। ଶପଥ ନେଲେ ନୂଆ ମନ୍ତ୍ରୀ। ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍, ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ ଏବଂ ଅଜିତ ପାୱାରଙ୍କ ଉପସ୍ଥିତିରେ ଶପଥ ଗ୍ରହଣ କାର୍ଯ୍ୟକ୍ରମ ଶେଷ ହୋଇଛି। ନାଗପୁରର ରାଜ ଭବନରେ ରାଜ୍ୟପାଳ ସିପି ରାଧାକ୍ରିଷ୍ଣନ୍ ମନ୍ତ୍ରୀମାନଙ୍କୁ ଶପଥପାଠ କରାଇଥିଲେ। ଆସନ୍ତାକାଲି ବିଧାନସଭାର ଶୀତ ଅଧିବେଶନ ଆରମ୍ଭ ହେଉଥିବା ବେଳେ ଏହାର ଠିକ୍ ଗୋଟିଏ ଦିନ ପୂର୍ବରୁ ରାଜ୍ୟ କ୍ୟାବିନେଟର ଶପଥ ଗ୍ରହଣ କାର୍ଯ୍ୟକ୍ରମ କରାଯାଇଛି। ଯାହାକୁ ଏକ ବିରଳ ଘଟଣା ବୋଲି କୁହାଯାଉଛି।
ମହାରାଷ୍ଟ୍ର ବିଧାନସଭା ନିର୍ବାଚନର ଫଳାଫଳ ଘୋଷଣା ହେବାର ୨୧ ଦିନ ପରେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କ କ୍ୟାବିନେଟ ସମ୍ପ୍ରସାରିତ ହୋଇଛି। ପୂର୍ବରୁ ନାଗପୁରରେ ଶେଷ ଶପଥ ସମାରୋହ ୧୯୯୧ମସିହାରେ ହୋଇଥିଲା। ତତକାଳୀନ ରାଜ୍ୟପାଳ ସି ସୁବ୍ରମଣ୍ୟମ୍, ଛଗନ୍ ଭୁଜବଳ ଓ ଅନ୍ୟ ମନ୍ତ୍ରୀମାନଙ୍କୁ ଶପଥ ଗ୍ରହଣ କରାଇଥିଲେ । ଦୀର୍ଘବର୍ଷ ପରେ ପୁଣି ନାଗପୁରରେ ହୋଇଛି ଶପଥଗ୍ରହଣ ସମାରୋହ।
Also Read
ମନ୍ତ୍ରୀମାନଙ୍କୁ ବିଭାଗ ଆବଣ୍ଟନ ଖୁବଶୀଘ୍ର କରାଯିବା ନେଇ ଆଶା କରାଯାଉଛି। କାରଣ ଅଧିବେଶନ ଆରମ୍ଭ ପୂର୍ବରୁ ବିଧାୟକଙ୍କ ଭୂମିକା ଚୂଡ଼ାନ୍ତ କରିବାକୁ ମାତ୍ର ଗୋଟିଏ ଦିନ ବାକି ରହିଛି। ଦେବେନ୍ଦ୍ର ଫଡନାଭିସ୍ ମୁମ୍ବାଇର ଆଜାଦ ମଇଦାନରେ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିବାର ୧୦ଦିନ ପରେ କ୍ୟାବିନେଟ୍ ଶପଥ ଗ୍ରହଣ କରିଛି। ଏହି ସମାରୋହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯୋଗ ଦେଇଥିଲେ ଯେଉଁଥିରେ ଏନସିପିରୁ ଅଜିତ ପାୱାର ଏବଂ ଶିବସେନାର ପୂର୍ବତନ ସିଏମ ଏକନାଥ ସିନ୍ଦେ ଉପମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ।
ଅଧିକ ପଢ଼ନ୍ତୁ: ସମ୍ବିଧାନ ବିତର୍କରେ ଗାନ୍ଧି ପରିବାର ଉପରେ ମୋଦିଙ୍କ ପ୍ରଚଣ୍ଡ ହମଲା
ବିଭାଗ ଆବଣ୍ଟନ ଏବଂ ଶେଷ ମୁହୂର୍ତ୍ତରେ କ୍ୟାବିନେଟ୍ ଶପଥ ଗ୍ରହଣକୁ ନେଇ ଶିବସେନା ଏବଂ ଏନସିପି ଦଳ ସହ କ୍ଷମତାକୁ ସନ୍ତୁଳିତ କରିବାରେ ଆହ୍ୱାନକୁ ଦାୟୀ କରାଯାଇପାରେ। ଉଭୟ ସରକାରରେ ପ୍ରଭାବଶାଳୀ ଭୂମିକା ଗ୍ରହଣ କରିବାକୁ ଆଗ୍ରହୀ ଥିଲେ। ରାଜ୍ୟ ନିର୍ବାଚନରେ ବିଜେପି ନେତୃତ୍ୱାଧୀନ ମହାୟୁତି ମିଳିତ ମଞ୍ଚ ଏକ ନିର୍ଣ୍ଣାୟକ ବିଜୟ ହାସଲ କରି ୨୩୫ ଟି ଆସନ ଜିତିଛି। ୧୩୨ ଟି ଆସନ ସହ ବିଜେପି ସର୍ବ ବୃହତ ଦଳ ଭାବରେ ଉଭା ହୋଇଥିବା ବେଳେ ଶିବସେନା ୫୭ ଏବଂ ଏନସିପି ୪୧ଟି ଆସନରେ ଜିତିଛି।
କଂଗ୍ରେସ ମାତ୍ର ୧୬ ଟି ଆସନ, ଶିବସେନା (ୟୁବିଟି) ୨୦ ଏବଂ ଏନସିପି (ଶରଦ ପାୱାର ଦଳ) ମାତ୍ର ୧୦ ଟି ଆସନ ଜିତିଥିବା ବେଳେ ମହା ବିକାଶ ଅଘାଡି ମେଣ୍ଟକୁ ବଡ଼ ଝଟକା ଲାଗିଛି। ଆଶାତୀତ ସଂଖ୍ୟା ସତ୍ତ୍ୱେ ମହାୟୁତି ମେଣ୍ଟର ସଂପ୍ରସାରଣରେ ବିଳମ୍ୱ ଘଟିଥିଲା। ୩ ପ୍ରମୁଖ ଦଳର ନେତାମାନଙ୍କୁ ସନ୍ତୁଷ୍ଟ କରିବା ପାଇଁ ଏକ ସନ୍ତୁଳିତ ମନ୍ତ୍ରୀମଣ୍ଡଳ କରିବା ପାଇଁ ଚାହିଁଥିଲେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍। ରାଜନୈତିକ ଚାପ କାରଣରୁ ସେ ବିଳମ୍ୱ କରିଥାଇ ପାରନ୍ତି ବୋଲି ଚର୍ଚ୍ଚା ହେଉଛି।
