ଆଜି ଚମ୍ପାଇ ସୋରେନଙ୍କ ଭାଗ୍ୟ ପରୀକ୍ଷା; ଝାଡ଼ଖଣ୍ଡ ବିଧାନସଭାରେ ହେବ ଫ୍ଲୋରଟେଷ୍ଟ

ଆଜି ଚମ୍ପାଇ ସୋରେନଙ୍କ ଭାଗ୍ୟ ପରୀକ୍ଷା । ଝାଡ଼ଖଣ୍ଡ ବିଧାନସଭାରେ ହୋଇପାରେ ଗୁରୁତ୍ୱପୂର୍ଣ୍ଣ ଫ୍ଲୋରଟେଷ୍ଟ । ଏହାପୂର୍ବରୁ JMM ଓ ମେଣ୍ଟ ଦଳର ପ୍ରାୟ ୪୦ ବିଧାୟକ ହାଇଦ୍ରାବାଦରୁ ବିମାନ ଯୋଗେ ରାଞ୍ଚି ଫେରିଛନ୍ତି । ଘୋଡ଼ା ବେପାର ଭୟରେ ସେମାନଙ୍କୁ ହାଇଦ୍ରାବାଦ ନିକଟସ୍ଥ ଏକ ରିସୋର୍ଟରେ ରଖାଯାଇଥିଲା ।

ଦୁର୍ନୀତି ଅଭିଯୋଗରେ ଇଡି ଦ୍ୱାରା ଗିରଫ ହୋଇ ହେମନ୍ତ ସୋରେନ ଏବେ ଜେଲରେ ଥିବା ବେଳେ, ବରିଷ୍ଠ ନେତା ତଥା ମନ୍ତ୍ରୀ ଚମ୍ପାଇ ସୋରେନଙ୍କୁ ବିଧାୟକ ଦଳର ନେତା ତଥା ମୁଖ୍ୟମନ୍ତ୍ରୀ ଭାବେ ବାଛିଛନ୍ତି JMM ସମେତ ଶାସକ ଦଳ ବିଧାୟକ । ଏବେ JMMର ୨୮ ଓ କଂଗ୍ରେସର ୧୬କୁ ନେଇ ଶାସକ ମେଣ୍ଟ ପକ୍ଷରେ ୪୬ ବିଧାୟକଙ୍କ ସମର୍ଥନ ରହିଛି ।

ଅନ୍ୟପକ୍ଷରେ ବିଜେପି ଓ ସମର୍ଥିତ ଦଳ ପକ୍ଷରେ ଅଛନ୍ତି ୨୯ ବିଧାୟକ । ୮୧ ଆସନ ବିଶିଷ୍ଟ ଝାଡ଼ଖଣ୍ଡରେ ସଂଖ୍ୟା ଗରିଷ୍ଠତା ହାସଲ ପାଇଁ ମ୍ୟାଜିକ ନମ୍ବର ହେଉଛି ୪୧ । ତେଣୁ ଝାଡ଼ଖଣ୍ଡ ରାଜନୀତି ରାତାରାତି କୌଣସି ନାଟକୀୟ ମୋଡ଼ ନନେଲେ ଚମ୍ପାଇ ସରକାର ସହଜରେ ଆସ୍ଥାଭୋଟ୍ ପାସ୍ କରିଯାଇପାରେ ।

ତେବେ JMM ପାଇଁ ଏହା ପ୍ରଥମ ଫ୍ଲୋରଟେଷ୍ଟ ନୁହେଁ । ୨୦୨୨ ସେପ୍ଟେମ୍ବରରେ ମଧ୍ୟ ଦୁର୍ନୀତି ଅଭିଯୋଗ ପାଇଁ ଅଯୋଗ୍ୟ ଘୋଷିତ ହେବାର ଆଶଙ୍କାକୁ ସାମ୍ନା କରିଥିଲେ ହେମନ୍ତ ସୋରେନ ସରକାର । ତେବେ ସେତେବେଳେ ୪୮ ଭୋଟ ସହ ସେ ଆସ୍ଥା ଜିତିଥିଲେ ।