ଭୁବନେଶ୍ୱର ସୈନିକ ସ୍କୁଲ ନାନ୍ତରଣ ପ୍ରସ୍ତାବକୁ ବିରୋଧ କରି ଏକାଠି ହେଲେ ସ୍ଥାନୀୟ ଗାଡ଼କଣ ଗ୍ରାମବାସୀ, ସୈନିକ ସ୍କୁଲ ଅଭିଭାବକ ସଂଘ ଏବଂ ଓଡ଼ିଶା ଅଭିଭାବକ ସଂଘ । ‘ସୈନିକ ସ୍କୁଲ ବଞ୍ଚାଅ’ ଅଭିଯାନ ଅଧୀନରେ ଆଜି ସ୍ଥାନୀୟ ଦାଶରାଜା ମନ୍ଦିର ପ୍ରାଙ୍ଗଣରେ ଏକାଠି ହୋଇ ଅଭିଯାନର ଆଗାମୀ ରଣନୀତି ନେଇ ଆଲୋଚନା କରିଛନ୍ତି । ତେବେ ନିକଟ ଅତୀତରେ ସ୍ଥାପିତ ଏକ ଡମ୍ପିଂୟାର୍ଡ ପାଇଁ ୧୯୬୨ ମସିହାରୁ ରାଜ୍ୟର ଗୌରବ ବଢ଼ାଇ ବହୁ ସଂଖ୍ୟକ ସେନା ଅଧିକାରୀ, ପ୍ରଶାସନିକ ଅଧିକାରୀ ଓ ରାଜନେତା ସୃଷ୍ଟି କରିଥିବା ସୈନିକ ସ୍କୁଲ ସ୍ଥାନାନ୍ତରଣକୁ ସଭିଏଁ ବିରୋଧ କରିଛନ୍ତି ।
ଗାଡ଼କଣ ଗ୍ରାମବାସୀ କହିଛନ୍ତି, ଡମ୍ପିଂୟାର୍ଡ଼ ହଟାଇବା ପାଇଁ ଏକଦା BJP ଏଠାରେ ସତ୍ୟାଗ୍ରହ କରୁଥିଲା । ଆଜି ଡମ୍ପିଂୟାର୍ଡ ନ ହଟାଇ ସୈନିକ ସ୍କୁଲକୁ ହଟାଉଛନ୍ତି। ଏହା କାହା ସ୍ୱାର୍ଥରେ ବୋଲି ସେମାନେ ପ୍ରଶ୍ନ କରିଛନ୍ତି । ଏମିତିକି ଚେତାବନୀ ଦେଇଛନ୍ତି ଯଦି ସରକାର ନିଷ୍ପତ୍ତି ନ ବଦଳାନ୍ତି, ଆଗକୁ ଆନ୍ଦୋଳନ ତୀବ୍ର ହେବ । ଏବେ ପ୍ରଶ୍ନ ଉଠୁଛି, କାହା ପାଇଁ ସୈନିକ ସ୍କୁଲକୁ ଦୂରକୁ ଉଠାଯାଉଛି ?
ଅଧିକ ପଢ଼ନ୍ତୁ : ଏହି ଚାଷରେ ବହୁତ ରୋଜଗାର, ଆଦିବାସୀ ଅଧ୍ୟୁଷିତ ଗାଁରେ ଫୁଟିଲା ହସ
ସୈନିକ ସ୍କୁଲର ପୂର୍ବତନ ଶିକ୍ଷକ କହିଛନ୍ତି, ଏଠି ଦିନେ ଜଙ୍ଗଲ ଥିଲା । ଜଙ୍ଗଲ ଭିତରେ ସୈନିକ ସ୍କୁଲ ଆରମ୍ଭ ହୋଇଥିଲା । ଏ ଭିତରେ ଭୁବନେଶ୍ୱର ସୈନିକ ସ୍କୁଲ ଭାରତୀୟ ସେନାକୁ ପ୍ରାୟ ୭୦୦ ସେନା ଅଧିକାରୀ ଦେଇଛି, ୧୦ରୁ ଅଧିକ ଲେଫ୍ଟନାଣ୍ଟ ଜେନେରାଲ ପାହ୍ୟାର ଅଧିକାରୀ ସୃଷ୍ଟି କରିଛି । ଆଜି ଏହା ସହରୀକରଣ ଦ୍ୱାରା ସେଣ୍ଟ୍ରାଲ ପ୍ଲେସ ହୋଇଗଲା ବୋଲି ତାକୁ ୩୦ କିଲୋମିଟର ଦୂରକୁ ଫିଙ୍ଗି ଦେବାକୁ ଚାହୁଁଛନ୍ତି।
ଆଉ କିଛି ବର୍ଷ ପରେ ସେଠି ମଧ୍ୟ ସହର ଗଢ଼ି ଉଠିବ । ପୁଣି ଥରେ ସୈନିକ ସ୍କୁଲକୁ ଆଉ କେଉଁଠି କି ଫିଙ୍ଗିଦେବେ ! ସୈନିକ ସ୍କୁଲ ଛାତ୍ରଛାତ୍ରୀ ଓ କ୍ୟାଡେଟଙ୍କୁ ଫୁଟବଲ୍ ଭଳି କିକ୍ କରିବାକୁ ଚାହୁଁଛନ୍ତି। ଆଉ ଥରେ ପୁନର୍ବିଚାର କରନ୍ତୁ । ନହେଲେ ଏକ ଡମ୍ପିଂୟାର୍ଡ ପାଇଁ ଯଦି ସୈନିକ ସ୍କୁଲକୁ ହଟାଯାଉଛି, ଗନ୍ଧ ହେଉଥିବା କାରଣରୁ ଆଗକୁ ଆଉ କାହା କାହାକୁ ଉଠାଇବେ । ଏମିତି ହେଲେ ଉତ୍କଳ ବିଶ୍ୱବିଦ୍ୟାଳୟକୁ ବି ହଟାଇବାକୁ ପଡ଼ିବ । ଏବେ ଦେଖିବାକୁ ବାକି ରହିଲା, ସୈନିକ ସ୍କୁଲ ସ୍ଥାନାନ୍ତରଣ ପ୍ରସ୍ତାବ ପ୍ରସଙ୍ଗରେ କି ନିଷ୍ପତ୍ତି ଗ୍ରହଣ କରୁଛନ୍ତି ସରକାର ।