Mo Bus: ୮ ମାସରେ ୬ ଜୀବନ ନେଲାଣି ମୋ ବସ୍, ୧୮ ଆହତ

୮ ମାସରେ ୬ ମୁଣ୍ଡ ନେଲାଣି ମୋ ବସ୍ । ଜୁନ୍ ୨୦୨୪ ଠାରୁ ଏ ଯାଏଁ କଟକ, ପୁରୀ ଓ ଭୁବନେଶ୍ୱରରେ ମୋ ବସ୍ ଦ୍ୱାରା ୧୯ଟି ଦୁର୍ଘଟଣା ହୋଇଛି । ଏଥିରେ ୧୮ ଜଣ ଆହତ ହୋଇଥିବା ବେଳେ ୬ ଜଣ ପ୍ରାଣ ହରାଇଛନ୍ତି । ବିଜେଡି ବିଧାୟକ ଅରୁଣ ସାହୁଙ୍କ ପ୍ରଶ୍ନରେ ନଗର ଉନ୍ନୟନ ମନ୍ତ୍ରୀ କୃଷ୍ଣ ମହାପାତ୍ର ଆଜି ବିଧାନସଭାରେ ଏହି ସୂଚନା ଦେଇଛନ୍ତି  । 

ଅଧିକ ପଢ଼ନ୍ତୁ: ଗୃହ ଆରମ୍ଭରୁ ହୁଲସ୍ତୁଲ; ହାତାହାତି ହେଲେ ଜୟନାରାୟଣ-ତାରା, ଏମିତି କେବେ ହୋଇନଥିଲା କହିଲା ବିଜେଡି

ମନ୍ତ୍ରୀ ଗୃହରେ ଜଣାଇଛନ୍ତି, କେବଳ ଦୁଇଟି ଦୁର୍ଘଟଣା ଘଟଣାରେ ମୃତକଙ୍କ ପରିବାରକୁ ୩ ଲକ୍ଷ ୫ ହଜାର ଟଙ୍କା କ୍ଷତିପୂରଣ ଦିଆଯାଇଛି । ଦୁର୍ଘଟଣା ରୋକିବା ପାଇଁ ଅନେକ ପଦକ୍ଷେପ ନିଆଯାଇଛି । ଡିଜେଲ ବସର ସ୍ପିଡ୍ ଲିମିଟ ଘଣ୍ଟା ପ୍ରତି ୪୦ କିଲୋମିଟର ଓ ଇଲେକ୍ଟ୍ରିକ୍ ବସର ଘଣ୍ଟାପ୍ରତି ବେଗ ୩୫ କିଲୋମିଟର ପାଇଁ ନିର୍ଦ୍ଦେଶ ଦିଆଯାଇଛି । 

ବସରେ ଆଡାସ ବା ସ୍ୱୟଂକ୍ରିୟ ଚାଳକ ସହାୟକ ବ୍ୟବସ୍ଥା ଲଗାଇବାକୁ ଯୋଜନା କରାଯାଇଛି । ଦୁର୍ଘଟଣାର ସମୀକ୍ଷା ପାଇଁ କମିଟି ଗଠନ ହୋଇଛି ବୋଲି ବିଧାନସଭାରେ ସୂଚନା ଦେଇଛନ୍ତି ନଗର ଉନ୍ନୟନ ମନ୍ତ୍ରୀ କୃଷ୍ଣ ମହାପାତ୍ର । 

ଏଠାରେ ଉଲ୍ଲେଖଯୋଗ୍ୟ, କିଛି ଦିନ ହେଲା ରାଜ୍ୟରେ ବାରମ୍ବାର ମୋ ବସ୍ ଦୁର୍ଘଟଣାକୁ ନେଇ ତେଜୁଛି ଅସନ୍ତୋଷ । ରାସ୍ତାରେ ମୋ ବସ୍ ଦେଖିଲେ ଯମ ଆସୁଛି ବାଟ ଛାଡ କହୁଛନ୍ତି ଲୋକେ । କେତେବେଳେ ସ୍କୁଟିକୁ ଘୋଷାଡି ନେଉଛି ତ ଆଉ କେତେବେଳେ ଲୋକଙ୍କ ଉପରେ ମାଡ଼ି ଯାଉଛି । ବାରମ୍ବାର ମୋ ବସ ଦୁର୍ଘଟଣା ବଢିବାକୁ ନେଇ ଡ୍ରାଇଭରଙ୍କୁ କ୍ରୁଟ ପକ୍ଷରୁ ପ୍ରଶିକ୍ଷଣ ମଧ୍ୟ ଦିଆଯାଉଛି । ହେଲେ ସ୍ଥିତି ବଦଳିବାର ନାଁ ନେଉନି । ଯାହାକୁ ନେଇ ଟ୍ୱିନସିଟିରେ ଜନ ଅସନ୍ତୋଷ ବଢିବାରେ ଲାଗିଛି ।

ଅଧିକ ପଢ଼ନ୍ତୁ: ନବୀନ ନିବାସରେ ପାଣ୍ଡିଆନଙ୍କୁ ଭେଟୁଛନ୍ତି ବିଜେଡି ନେତା, ପୁଣି ଆଗ ଭଳି…