Gajapati Reviews Chariot Construction: କେତେ ବାଟ ଗଲା ରଥ କାମ ? ରଥଖଳା ବୁଲିଦେଖିଲେ ଗଜପତି ମହାରାଜା

ରଥ ନିର୍ମାଣର ସମୀକ୍ଷା କଲେ ଗଜପତି ମହାରାଜା । ଆଜି ରଥଖଳା ଯାଇ ବୁଲି ଦେଖିବା ସହ ରଥ ନିର୍ମାଣ ଅଗ୍ରଗତି ନେଇ ମହାରଣା ସେବାୟତଙ୍କ ସହ ଆଲୋଚନା କରିଛନ୍ତି ଗଜପତି ମହାରାଜା ଦିବ୍ୟସିଂହ ଦେବ । ରଥ କାଠ ସମସ୍ୟା ଏବଂ ବର୍ଷା ହେଲେ ଯେଭଳି ରଥ ନିର୍ମାଣ ପ୍ରଭାବିତ ନହେବ ସେନେଇ ଆଲୋଚନା କରିଛନ୍ତି । ରଥକାଠ ଜନିତ ସମସ୍ୟା ନଥିବା ନେଇ ଗଜପତିଙ୍କୁ ଅବଗତ କରିଛନ୍ତି ମହାରଣା ସେବାୟତ । 

ଗତକାଲି ସୁଦ୍ଧା ତିନି ରଥର ୪୨ଟି ଚକ ନିର୍ମାଣ ସରିଥିବାବେଳେ ଗରଗରା, ଚାରି ନାହାକା ନିର୍ମାଣ ଆରମ୍ଭ ହୋଇଛି । ତିନି ରଥର ପାଞ୍ଚଦଣ୍ଡା ଚଉପଟ ପାଇଁ ରଥଖଳାରେ କାଠ ସାଇତା କାର୍ଯ୍ୟ ସରିଛି । ତାଳଧ୍ୱଜ ଓ ଦର୍ପଦଳନ ରଥର ଦୁଇଟି ଲେଖାଏଁ ଗରଗରା ଚଉପଟ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି ।

ଅଧିକ ପଢନ୍ତୁ: ପୁରୀରେ କେନ୍ଦ୍ରମନ୍ତ୍ରୀ ଶିବରାଜ ସିଂହ ଚୌହ୍ୱାନ, 'ବିକଶିତ କୃଷି ସଂକଳ୍ପ ଅଭିଯାନ'ର କରିବେ ଶୁଭାରମ୍ଭ

ନନ୍ଦିଘୋଷ ରଥର ଦୁଇଟି ଗରଗରା ଚଉପଟ କାର୍ଯ୍ୟ ଶେଷ ହୋଇଛି । କୋଣ ଗୁଜ ବା ସାଲ ଗୁଜରେ ସିଂହ ବିରାଳ ରୂପ ଖୋଦେଇ ଶେଷ ହେବା ସହ ରୂପଗୁଡ଼ିକର ପଲିସ୍ କାର୍ଯ୍ୟ ଅନ୍ତିମ ପର୍ଯ୍ୟାୟରେ ପହଞ୍ଚିଛି । 

ଆସନ୍ତା ଜୁନ୍ ୨୭ରେ ପୁରୀରେ ମହାପ୍ରଭୁଙ୍କ ବିଶ୍ୱପ୍ରସିଦ୍ଧ ରଥଯାତ୍ରା । ଏ ବର୍ଷ ରଥଯାତ୍ରା ଦିନ ସକାଳ ୬ଘଟିକା ଠାରୁ ମଙ୍ଗଳ ଆଳତି ନୀତି ଅନୁଷ୍ଠିତ ହେବା ସହ ସକାଳ ୯ଟା ସୁଦ୍ଧା ରଥ ପ୍ରତିଷ୍ଠା ନୀତି କରାଯିବ । ଅପରାହ୍ନ ସାଢେ ୨ଟାରୁ ସାଢେ ୩ଟା ମଧ୍ୟରେ ଛେରାପହଁରା ଓ ଅପରାହ୍ନ ୪ଟାରେ ରଥ ଟଣା ହେବ । ସେହିପରି ଜୁନ ୧୧ରେ ଦେବସ୍ନାନ ପୂର୍ଣ୍ଣିମାର ନୀତି ନିର୍ଘଣ୍ଟ ମଧ୍ୟ ସ୍ଥିରୀକୃତ ହୋଇଛି । ବାହୁଡ଼ା ଦିନ ଅପରାହ୍ନ ୪ଟା ସୁଦ୍ଧା ରଥ ଟାଣିବା ପାଇଁ ନୀତି ନିର୍ଘଣ୍ଟ କରାଯାଇଛି । ଜୁଲାଇ ୬ ତାରିଖ ମହାପ୍ରଭୁଙ୍କର ରଥ ଉପରେ ସନ୍ଧ୍ୟା ୫ଟାରୁ ୬ଟା ୩୦ ମଧ୍ୟରେ ସୁନାବେଶ ଅନୁଷ୍ଠିତ ହେବ ।

ଅଧିକ ପଢନ୍ତୁ : ଚାଷୀଙ୍କ ପାଇଁ ଖୁସି ଖବର, ୬୯ ଟଙ୍କା ବଢିଲା ଧାନର MSP