Riverbed Illegal Landfill: ନୂଆନଈ ପଠା ଉପରେ କାହାର ପଡ଼ିଛି ଲୋଲୁପ ଦୃଷ୍ଟି?

ଜବର ଦଖଲକାରୀଙ୍କ କବ୍‌ଜାରେ ନଦୀ ପଠା । ପୁରୀ କୋଣାର୍କ ରାସ୍ତା ନୂଆନଈ ପଠାକୁ ବେଆଇନ ଭାବେ ଜବର ଦଖଲ କରି ଶହ ଶହ ଟ୍ରାକ୍ଟର ମାଟି ଉଠାଯାଉଥିବା ଅଭିଯୋଗ । ପୁରୀ କୋଣାର୍କ ରାସ୍ତାର ବେଲଦଳ ନିକଟରେ ନୂଆନଈ ପଠାରୁ ବେଆଇନ ଭାବେ ମାଟି ଉଠାଯାଉଥିବା ଅଭିଯୋଗ କରିଛନ୍ତି ସ୍ଥାନୀୟ ବାସିନ୍ଦା ।

ଶହ ଶହ ଟ୍ରାକ୍ଟର ମାଟି ଉଠାଇ ନଦୀ ପଠାରୁ ସ୍ବତନ୍ତ୍ର ରାସ୍ତା ନିର୍ମାଣ କରାଯାଇଛି । ସେହି ରାସ୍ତା ଦେଇ ନଦୀର ଅପରପାର୍ଶ୍ବରେ ଥିବା କେନାଲକୁ ପୋତାଚାଲିଛି । ଏକ ରିସୋର୍ଟ ତିଆରି ପାଇଁ ହେକ୍ଟର ହେକ୍ଟର ଜମିକୁ ଜଳସେଚନ କରୁଥିବା କେନାଲକୁ ସଂପୂର୍ଣ୍ଣ ଭାବେ ପୋତି ଦେବାକୁ ଚକ୍ରାନ୍ତ ଚାଲିଥିବା ଅଭିଯୋଗ ହୋଇଛି ।

ତେବେ ଏହି ଜମି ମାଲିକଙ୍କ ଉଦ୍ଦେଶ୍ୟ ଏବଂ ପରିଚୟକୁ ନେଇ ସ୍ଥାନୀୟ ଅଞ୍ଚଳରେ ସନ୍ଦେହ ସୃଷ୍ଟି ହୋଇଛି । ଆଶଙ୍କା କରାଯାଉଛି ଜେସିବି ଓ ଟ୍ରାକ୍ଟର ସାହାଯ୍ୟରେ ନୂଆନଈ ପଠାରୁ ମାଟି ଖୋଳାଯାଉଛି ଓ କେନାଲ୍ ପୋତାଯାଉଛି । ହେଲେ ଚାଞ୍ଚଲ୍ୟକର କଥା ୭ଟି ଟ୍ରାକ୍ଟରରୁ ୬ଟିରେ ନମ୍ବର ପ୍ଲେଟ୍ ନାହିଁ । ଡ୍ରାଇଭରଙ୍କର ବି ଦେଖାଦର୍ଶନ ନାହିଁ । ତେଣୁ କିଏ ଓ କାହିଁକି ଏହି ନମ୍ବର ବିହୀନ ଟ୍ରାକ୍ଟର କାମରେ ଲଗାଇଛି, ତାହା ଜଣା ପଡ଼ିନାହିଁ । ପ୍ରଶ୍ନ ଉଠିଛି, ବେଆଇନ କାରନାମାକୁ ଲୁଚାଇବାକୁ ଏହି ଷଡ଼ଯନ୍ତ୍ର ହୋଇନି ତ?

ନମ୍ବରବିହୀନ ଟ୍ରାକ୍ଟରରେ ମାଟି ଖୋଳାଯିବା ଏବଂ ନଦୀ ପଠାରୁ ମାଟି ଉଠାଇ କେନାଲ୍ ପୋତା ଯିବା ଘଟଣାକୁ ନେଇ ତାତିଲେଣି ବେଲଦଳ ଅଞ୍ଚଳ ବାସିନ୍ଦା । ଆଜି ଘଟଣାସ୍ଥଳରେ ପହଞ୍ଚି ଖୋଲାଖୋଲି ବିରୋଧ ଜାହିର କରିବା ସହ ସେମାନେ ନାରାବାଜି କରୁଥିବା ଦେଖିବାକୁ ମିଳିଛି। ଖବର ପାଇ, ମେରାଇନ ଥାନା ପୋଲିସ ମଧ୍ୟ ଘଟଣାସ୍ଥଳରେ ପହଞ୍ଚିଥିଲା ।

ପୋଲିସ ସେଠାରେ ଥିବା ସମସ୍ତ ନମ୍ବର ବିହୀନ ଟ୍ରାକ୍ଟରକୁ ଜବତ କରିବା ସହ ଘଟଣା ସଂପର୍କରେ ସ୍ଥାନୀୟ RIଙ୍କୁ ମଧ୍ୟ ଅବଗତ କରିଛି । ତେବେ ପ୍ରଶ୍ନ ଉଠୁଛି, ଏତେ ସବୁ କାରନାମା ପରେ ବି କାହିଁକି ନିଦାବିଷ୍ଣୁ ଜଳସେଚନ ଓ ପରିବହନ ବିଭାଗ ? ଏନେଇ ବିଭାଗୀୟ ପ୍ରତିକ୍ରିୟା ମିଳିନଥିବା ବେଳେ, ତମାମ୍ ଘଟଣାର ତଦନ୍ତ କରାଯାଉଥିବା ଜିଲ୍ଲାପାଳ କହିଛନ୍ତି ।

ଅଧିକ ପଢ଼ନ୍ତୁ: ବିଧାନସଭାରେ କେମିତି ରାତି କାଟିଲେ ମନ୍ତ୍ରୀ ଓ ବିଧାୟକ, ଚା' ପିଇ ନିଦ ଭାଙ୍ଗୁଥିଲେ..