LIVE TV
ରାଇରଙ୍ଗପୁରର ଅସୁରଘାଟି ଜଳ ପ୍ରପାତ । ଅବହେଳିତ ଅବସ୍ଥାରେ ପଡ଼ିଛି... ତଥାପି ଖିଲି ଖିଲି ହସୁଛି । ଅଳସୀ ଝରଣା ଝରଝର ଝରିଯାଇ ପର୍ଯ୍ୟଟକଙ୍କୁ ଯେମିତି ହାତଠାରି ଡାକୁଛି । ମୟୂରଭଞ୍ଜ ଜିଲ୍ଲାର ରାଇରଙ୍ଗପୁର ଉପଖଣ୍ଡରେ ରହିଛି ଅସୁରଘାଟି ଜଳ ପ୍ରପାତ । ହେଲେ ପ୍ରଶାସନର ଅଣଦେଖା ହେତୁ ଏଠାରେ ସେମିତି କିଛି ବିକାଶ ହୋଇପାରିନାହିଁ । କିନ୍ତୁ ଏହି ସ୍ଥାନଟି ସବୁଜ ବଣ ଜଙ୍ଗଲ ଘେରା ହୋଇଥିବାରୁ ଲୋକମାନଙ୍କ ପାଇଁ ବେଶ୍ ଆକର୍ଷଣର କେନ୍ଦ୍ର ବିନ୍ଦୁ ସାଜିଛି ।
Also Read
ପ୍ରାକୃତିକ ସୌନ୍ଦର୍ଯ୍ୟରେ ପରିପୂର୍ଣ୍ଣ ଓଡ଼ିଶାର ସବୁ ଜିଲ୍ଲା । ସବୁଜ ବନାନୀ ସାଙ୍ଗକୁ ଉଚ୍ଚ ପର୍ବତ ଶିଖର ଓ ଝରଣାର କୁଳୁକୁଳୁ ନାଦ ପ୍ରକୃତି ପ୍ରେମୀକୁ ସ୍ତବ୍ଧ କରିପକାଏ । ଏହି ଜଳପ୍ରପାତର ଚତୁଃପାର୍ଶ୍ୱର ସବୁଜିମା ଓ ପର୍ବତ ମାଳାର ମନରୋମ ଦୃଶ୍ୟ ସ୍ଥାନୀୟ ପର୍ଯ୍ୟଟକଙ୍କୁ ବେଶ୍ ଆକୃଷ୍ଟ କରୁଛି । ତେଣୁ ପର୍ଯ୍ୟଟନ ଋତୁରେ ଲାଗୁଛି ଏଠାରେ ପର୍ଯ୍ୟଟକଙ୍କ ଗହଳି । ଲୋକମାନେ ଏଠାକୁ ଆସି ପିକ୍ନିକର ମଜା ନେବା ସହ ଏଠାର ପ୍ରକୃତିର ସୌନ୍ଦର୍ଯ୍ୟକୁ ନିଜ ମୋବାଇଲ କ୍ୟାମେରାରେ କଏଦ କରୁଛନ୍ତି ।
ଅଧିକ ପଢ଼ନ୍ତୁ: ଯୌତୁକ ପାଇଁ ଗର୍ଭବତୀ ବୋହୂକୁ ମାରିଦେଲେ !
ତେବେ ଅସୁରଘାଟି ଜଳ ପ୍ରପାତ ନିକଟରେ ନାହିଁ ପର୍ଯ୍ୟଟକଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା । ଏପରିକି ପରିସ୍ରାଗାରଟିଏ ନ ଥିବାରୁ ମହିଳା ଓ ଯୁବତୀମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ସେହିପରି ପିଇବା ପାଣିର ମଧ୍ୟ ଏଠାରେ ବ୍ୟବସ୍ଥା ନାହିଁ । ଜଳ ପ୍ରପାତକୁ ଯିବା ପାଇଁ ବ୍ୟାରିକେଡ୍ ନଥିବାରୁ ଜୀବନ ପ୍ରତି ବିପଦ ମଧ୍ୟ ରହୁଛି । ଆଉ ଅଳିଆ ଆବର୍ଜନାରେ ଭରି ରହିଛି ଆଖପାଖ । ଏସବୁ ଦିଗ ପ୍ରତି ପ୍ରଶାସନ ଦୃଷ୍ଟି ଦେବା ନିହାତି ଆବଶ୍ୟକ ରହିଛି ବୋଲି ପର୍ଯ୍ୟଟକମାନେ କହିଛନ୍ତି । ତେବେ ଦେଖିବାକୁ ବାକି ରହିଲା କେବେ ରାଜ୍ୟ ସରକାର ଓ ପ୍ରଶାସନ ଏହି ଜଳପ୍ରପାତର ସୌନ୍ଦର୍ଯ୍ୟକରଣ ପାଇଁ ପଦକ୍ଷେପ ଗ୍ରହଣ କରୁଛନ୍ତି ଓ କେବେ ପର୍ଯ୍ୟଟକମାନଙ୍କ ସମସ୍ୟା ଦୂର କରୁଛନ୍ତି ।
