Commercial Pilot License Change: ନିୟମରେ ହେବ ବଡ଼ ପରିବର୍ତ୍ତନ, ଏଣିକି କଳା ଓ ବାଣିଜ୍ୟ ଛାତ୍ରଛାତ୍ରୀ ବି ହୋଇପାରିବେ ପାଇଲଟ୍‌ !

ଏଣିକି ଆଉ କେବଳ ବିଜ୍ଞାନ ଛାତ୍ରଛାତ୍ରୀ ବିମାନ ଉଡ଼ାଇବେ ନାହିଁ । ଭାରତରେ ପାଇଲଟ୍ ହେବା ପାଇଁ ଥିବା ନିୟମରେ ଏକ ବଡ଼ ପରିବର୍ତ୍ତନ ହେବାକୁ ଯାଉଛି । ଡିଜିସିଏ (ସିଭିଲ ଏଭିଏସନ୍ ମହାନିର୍ଦ୍ଦେଶାଳୟ) ଏବେ ଏମିତି ଏକ ସୁପାରିଶ କରିଛି, ଯେଉଁଥିରେ କଳା ଏବଂ ବାଣିଜ୍ୟର ଛାତ୍ରଛାତ୍ରୀମାନେ ମଧ୍ୟ କମର୍ସିଆଲ୍‌ ପାଇଲଟ୍ ଲାଇସେନ୍ସ (ସିପିଏଲ୍) ପାଇଁ ତାଲିମ ନେଇପାରିବେ ବୋଲି ରହିଛି । ତେବେ ବର୍ତ୍ତମାନ ପର୍ଯ୍ୟନ୍ତ କମର୍ସିଆଲ୍‌ ପାଇଲଟ୍‌ ହେବାର ସୁଯୋଗ କେବଳ ଦ୍ୱାଦଶ ଶ୍ରେଣୀରେ ପଦାର୍ଥ ବିଜ୍ଞାନ ଏବଂ ଗଣିତ ପଢ଼ିଥିବା ଛାତ୍ରଛାତ୍ରୀମାନଙ୍କ ପାଇଁ ଉପଲବ୍ଧ ଥିଲା।

ଅଧିକ ପଢ଼ନ୍ତୁ: ପ୍ରବଳ ବର୍ଷାରେ ଉବୁଟୁବୁ ମୁମ୍ବାଇ, ରାସ୍ତାରେ ଚାଲୁଛି ଆଣ୍ଠୁଏ ଉଚ୍ଚର ପାଣି

ଡିଜିସିଏ ଏହି ସୁପାରିଶକୁ ବେସାମରିକ ବିମାନ ଚଳାଚଳ ମନ୍ତ୍ରଣାଳୟକୁ ପଠାଇଛି। ମନ୍ତ୍ରଣାଳୟରୁ ଅନୁମୋଦନ ପାଇବା ପରେ, ଏହି ପ୍ରସ୍ତାବ ଆଇନ ମନ୍ତ୍ରଣାଳୟକୁ ଯିବ । ଏହା ପରେ ହିଁ ଏହି ନୂତନ ନିୟମ କାର୍ଯ୍ୟକାରୀ ହେବ। ନିୟମ ପରିବର୍ତ୍ତନ ପରେ, ଡାକ୍ତରୀ ଫିଟନେସ୍ ଏବଂ ଅନ୍ୟାନ୍ୟ ପରୀକ୍ଷାରେ ପାସ୍ କରିଥିବା ଯେକୌଣସି ଦ୍ୱାଦଶ ପାସ୍ ଛାତ୍ରଙ୍କୁ ପାଇଲଟ୍ ହେବା ପାଇଁ ଯୋଗ୍ୟ ବିବେଚନା କରାଯିବ।

୧୯୯୦ ଦଶକର ମଧ୍ୟଭାଗରୁ ଏପର୍ଯ୍ୟନ୍ତ ଭାରତରେ CPL ତାଲିମ କେବଳ ବିଜ୍ଞାନ ଷ୍ଟ୍ରିମ୍ ଛାତ୍ରଛାତ୍ରୀମାନଙ୍କ ପାଇଁ ଥିଲା । ଏହା ପୂର୍ବରୁ, କେବଳ ଦଶମ ପାସ୍ କରିବା ଯଥେଷ୍ଟ ଥିଲା । ଅନେକ ବରିଷ୍ଠ ପାଇଲଟ ଏହାକୁ ଏକ ପୁରୁଣା ଏବଂ ଅଦରକାରୀ ନିୟମ ବୋଲି ବର୍ଣ୍ଣନା କରିଛନ୍ତି। ସେ ବିଶ୍ୱାସ କରନ୍ତି ଯେ ଜଣେ ପାଇଲଟ୍ ପାଇଁ ଆବଶ୍ୟକ ସମସ୍ତ ପଦାର୍ଥ ବିଜ୍ଞାନ ଏବଂ ଗଣିତ ସ୍କୁଲର ପ୍ରାରମ୍ଭିକ ବର୍ଷଗୁଡ଼ିକରେ ଉପଲବ୍ଧ। ଏହି କାରଣରୁ ଗତ କିଛି ବର୍ଷ ମଧ୍ୟରେ ହଜାର ହଜାର କଳା ଏବଂ ବାଣିଜ୍ୟ ଛାତ୍ରଛାତ୍ରୀଙ୍କୁ CPL ପାଇଁ ତାଲିମ ପାଇବା ପାଇଁ ଓପନ୍ ସ୍କୁଲରୁ ପଦାର୍ଥ ବିଜ୍ଞାନ ଏବଂ ଗଣିତ ପରୀକ୍ଷା ପୁନଃ ଦେବାକୁ ପଡିଥିଲା।

ସେପଟେ ଦିନକୁ ଦିନ ଦେଶରେ ଏୟାରଲାଇନ୍ ଶିଳ୍ପର ଦ୍ରୁତ ଅଭିବୃଦ୍ଧି ଘଟୁଛି । ଆଗକୁ ମଧ୍ୟ ବଢ଼ିବ । ତେଣୁ ଆବଶ୍ୟକୀୟ ମାନବ ସମ୍ୱଳ ପାଇଁ ଏହି ନିୟମ କୋହଳ କରାଯିବାର ଆବଶ୍ୟକତା ଥିବାର ଏହି ଶିଳ୍ପ ସହ ଜଡିତ ଜଣେ ବ୍ୟକ୍ତି କହିଛନ୍ତି । ବିଜ୍ଞାନ ବିଷୟ ବାଧ୍ୟତାମୂଳକ ଥିବାରୁ ଅନେକ ଛାତ୍ରଛାତ୍ରୀ ସିପିଏଲ୍ ଟ୍ରେନିଂ ପାଇଁ ବିଦେଶକୁ ଯାଉଛନ୍ତି । ଭାରତରେ ନିୟମରେ ପରିବର୍ତ୍ତନ ହେଲେ କଳା ଓ ବାଣିଜ୍ୟ ବିଷୟ ରଖିଥିବା ଛାତ୍ରଛାତ୍ରୀ ବିଦେଶ ନଯାଇ ଆମ ଦେଶରେ ସିପିଏଲ୍ ଟ୍ରେନିଂ ନେବାର ସୁଯୋଗ ପାଇବେ । ଭାରତରେ ଥିବା ଫ୍ଲାଇଂ ସ୍କୁଲଗୁଡିକର ରାଙ୍କିଂ କରିବାକୁ ମଧ୍ୟ ଯୋଜନା କରୁଛି DGCA ।

ଅଧିକ ପଢ଼ନ୍ତୁ: ସରିଲା ସ୍ପାଏ ୟୁଟ୍ୟୁବର ଜ୍ୟୋତି ମଲହୋତ୍ରାଙ୍କ ରିମାଣ୍ଡ, କୋର୍ଟରେ କରାଯିବ ହାଜର