LIVE TV
ରାମମନ୍ଦିରକୁ ଆତଙ୍କୀ ଧମକ! ଖଲିସ୍ତାନୀ ଆତଙ୍କବାଦୀ ଗୁରୁପତବନ୍ତ ସିଂ ପନ୍ନୁ ଅଯୋଧ୍ୟାରେ ରାମ ମନ୍ଦିର ସମେତ ଅନେକ ହିନ୍ଦୁ ମନ୍ଦିରକୁ ଟାର୍ଗେଟ କରି ଧମକ ଦେଇଛି । ନିଷିଦ୍ଧ ହୋଇଥିବା ଶିଖ୍ ଫର ଜଷ୍ଟିସ୍ (SFJ) ଦ୍ୱାରା ରିଲିଜ୍ ହୋଇଥିବା ଏକ ଭିଡିଓରେ ପନ୍ନୁ କହିଛି ଯେ, ନଭେମ୍ବର ୧୬ ଏବଂ ୧୭ ରେ ରାମ ମନ୍ଦିର ସମେତ ଅନେକ ହିନ୍ଦୁ ମନ୍ଦିରରେ ଆକ୍ରମଣ ହୋଇପାରେ । କାନାଡାର ବ୍ରମ୍ପଟନ୍ରେ ରେକର୍ଡ ହୋଇଥିବା ଏହି ଭିଡିଓ ଦ୍ୱାରା ଖଲିସ୍ତାନୀ ଆତଙ୍କବାଦୀ ହିନ୍ଦୁ ପୂଜାପାଠ ସ୍ଥାନମାନଙ୍କରେ ଆତଙ୍କ ସୃଷ୍ଟି କରିବାକୁ ଲକ୍ଷ୍ୟ ରଖିଛି ।
ନିକଟରେ ଭାରତ ଓ କାନାଡା ମଧ୍ୟରେ ସମ୍ପର୍କ ତିକ୍ତ ରହିଛି । ଏପରି ସମୟରେ ଆତଙ୍କବାଦୀର ଏପରି ଧମକ ସରକାରଙ୍କ ଚିନ୍ତା ବଢ଼ାଇ ଦେଇଛି । ପନ୍ନୁ ନିଜ ବିବୃତ୍ତିରେ କହିଛି ଯେ, ହିନ୍ଦୁ ଭାବନାର ଜନ୍ମସ୍ଥାନ ଅଯୋଧ୍ୟାର ମୂଳଦୁଆକୁ ବିସ୍ଫୋରଣ ଦ୍ୱାରା ହଲାଇ ଦେବୁ । ଏହା ଭାରତର ଅନ୍ୟତମ ପବିତ୍ର ସ୍ଥାନ । ଉକ୍ତ ଭିଡିଓରେ ପ୍ରଧାନମନ୍ତ୍ରୀ ମୋଦି ଚଳିତ ବର୍ଷ ଜାନୁଆରୀରେ ରାମ ମନ୍ଦିରରେ ପ୍ରାର୍ଥନା କରୁଥିବା ଦୃଶ୍ୟ ଦେଖାଯାଇଛି । ଏହା ସହ ପାନ୍ନୁ କାନାଡାରେ ଥିବା ଭାରତୀୟମାନଙ୍କୁ ମଧ୍ୟ ହିନ୍ଦୁ ମନ୍ଦିର ଉପରେ ହେବାକୁ ଥିବା ଏହି ଆକ୍ରମଣରୁ ଦୂରେଇ ରହିବାକୁ ଚେତାବନୀ ଦେଇଛି ।
ଅଧିକ ପଢ଼ନ୍ତୁ: ଆଜି ଶେଷ ହେଲା ମିଶ୍ରଣ ପ୍ରକ୍ରିୟା; ଆଉ ଉଡ଼ିବ ନାହିଁ ଭିସ୍ତାରା ବିମାନ
Also Read
ଗତମାସରେ ମଧ୍ୟ ପନ୍ନୁ ନଭେମ୍ବର ୧ ରୁ ୧୯ ମଧ୍ୟରେ ଏୟାର ଇଣ୍ଡିଆ ବିମାନରେ ଉଡ଼ାଣ ନକରିବାକୁ ଯାତ୍ରୀମାନଙ୍କୁ ଚେତାବନୀ ଦେଇଥିଲା । ଭାରତୀୟ କୂଟନୀତିଜ୍ଞଙ୍କ ବିରୋଧରେ ହିଂସା ପାଇଁ ପନ୍ନୁ ଆହ୍ୱାନ ଦେଇଛି । ଅଲଗା ଅଲଗା ଦେଶମାନଙ୍କରେ ରହୁଥିବା ଶିଖ୍ମାନଙ୍କୁ ଉତ୍ସାହ କରିବା ପାଇଁ ପନ୍ନୁ SFJ ଜରିଆରେ ଭାରତ ବିରୋଧୀ କାର୍ଯ୍ୟରେ ଜଡିତ ରହିଛି । ସାମ୍ପ୍ରଦାୟିକ ଦଙ୍ଗା ସୃଷ୍ଟି କରିବାକୁ ଅନେକ ସମୟରେ ଉତ୍ତେଜନା ବିବୃତ୍ତି ଦେବାର ନଜିର ରହିଛି ।
ଜୁଲାଇ ୨୦୨୦ ରେ ଅନୈତିକ କାର୍ଯ୍ୟକଳାପ ନିବାରଣ ଆଇନ (UAPA) ଅନୁଯାୟୀ ପନ୍ନକୁ ଆତଙ୍କବାଦୀ ଘୋଷିତ କରାଯାଇଥିଲା । ତାଙ୍କୁ ଗିରଫ କରିବା ପାଇଁ ଭାରତ ସରକାର ମଧ୍ୟ ଏକାଧିକ ୱାରେଣ୍ଟ ଜାରି କରିଛନ୍ତି । ତେବେ ଏହା ସତ୍ତ୍ୱେ ସେ ଆମେରିକା ଓ କାନାଡାରୁ କାମ ଜାରି ରଖିଛି । ନିକଟ ଅତୀତରେ, ହିନ୍ଦୁ ମନ୍ଦିର ଉପରେ ଆକ୍ରମଣ ଏବଂ କାନାଡାର ହିନ୍ଦୁ ସମ୍ପ୍ରଦାୟ ବିରୋଧରେ ଧମକ ଧମକ ବୃଦ୍ଧି ପାଇଛି । ଭଙ୍ଗାରୁଜା କରିବା ସହ ମନ୍ଦିର କାନ୍ଥ ଘୃଣା ଚିତ୍ରିତ କରିବା, ସମାଜ ବିରୋଧରେ ମଧ୍ୟ ଆପତ୍ତିଜନକ ମନ୍ତବ୍ୟ ଦେବା ଜାରି ରଖିଛି ପନ୍ନୁ ।
ଗତ ସପ୍ତାହରେ, ଖାଲିସ୍ତାନୀ ସମର୍ଥକ ବ୍ରମ୍ପଟନ୍ର ହିନ୍ଦୁ ମନ୍ଦିରରେ ଭକ୍ତଙ୍କ ସହ ସଂଘର୍ଷ କରିଥିଲେ । ଏନେଇ ଭାରତ ତରଫରୁ ବାରମ୍ବାର ଉଦ୍ବେଗ ପ୍ରକାଶ ପାଇବା ସତ୍ତ୍ୱେ ଖଲିସ୍ତାନୀ ସମର୍ଥକଙ୍କ ବିରୋଧରେ କାନାଡା କୌଣସି କାର୍ଯ୍ୟାନୁଷ୍ଠାନ ନେଉନାହିଁ । ବାରମ୍ବାର ଦୃଢ଼ ପଦକ୍ଷେପ ନେବାକୁ ଅନୁରୋଧ କରିବା ପରେ ମଧ୍ୟ କାନାଡା ଏହି ଘଟଣା ପ୍ରତି ଉଦାସୀନ ରହିଛି । ଫଳରେ ଭାରତ-କାନାଡା ସମ୍ପର୍କ ତିକ୍ତତାର କେନ୍ଦ୍ରରେ ରହିଛି ।
