LIVE TV
ନଡ଼ିଆ ତେଲ ବିବାଦରେ ପୂର୍ଣ୍ଣଚ୍ଛେଦ ପକାଇଲେ ସୁପ୍ରିମକୋର୍ଟ। ଖାଣ୍ଟି ନଡ଼ିଆ ତେଲ ଖାଇବା ଯୋଗ୍ୟ ନା ଏହାକୁ କେବଳ କେଶ ଓ ଶରୀରରେ ଲଗାଇବା ପାଇଁ ବ୍ୟବହାର କରିବା ଉଚିତ? ସୁପ୍ରିମକୋର୍ଟର ତିନିଜଣିଆ ବିଚାରପତିଙ୍କ ଏକ ବେଞ୍ଚ ୨୦ ବର୍ଷ ପୁରୁଣା ଏହି ମାମଲାର ସମାଧାନ କରିଛନ୍ତି। ପ୍ରଧାନ ବିଚାରପତି ଜଷ୍ଟିସ୍ ସଞ୍ଜୀବ ଖାନ୍ନା, ଜଷ୍ଟିସ ସଞ୍ଜୟ କୁମାର ଏବଂ ଜଷ୍ଟିସ ଆର ମହାଦେବନଙ୍କୁ ନେଇ ଗଠିତ ତିନିଜଣିଆ ଖଣ୍ଡପୀଠ କହିଛନ୍ତି ଯେ, ତେଲର ବ୍ୟବହାର କିମ୍ବା ପ୍ରୟୋଗ ପାଇଁ ବ୍ୟବହୃତ ହେବ, ଏହାର ପ୍ୟାକେଜିଂରେ ଯାହା ଲେଖା ହୋଇଛି ତାହା ଆଧାରରେ ଏକ୍ସାଇଜ୍ ଡ୍ୟୁଟି ଲାଗୁ କରାଯିବ।
ଶୁଦ୍ଧ ନଡ଼ିଆ ତେଲକୁ କେଉଁ ବର୍ଗରେ ରଖାଯିବା ଉଚିତ ତାହା କୋର୍ଟରେ ପ୍ରଶ୍ନ ଥିଲା। ଏହାକୁ ଖାଇବା ତେଲ ଆକାରରେ ରଖି ଏହା ଉପରେ ଡ୍ୟୁଟି ଲାଗୁ କରାଯିବା ଉଚିତ କିମ୍ବା ଡ୍ରଗ୍ସ ଏବଂ କସମେଟିକ୍ସ ଆକ୍ଟ ଅନୁଯାୟୀ ଏହା ଉପରେ ଟିକସ ସଂଗ୍ରହ କରାଯିବା ଉଚିତ୍? ଟିକସ ବିଭାଗର ଆବେଦନକୁ ପ୍ରତ୍ୟାଖ୍ୟାନ କରି ତିନିଜଣିଆ ଖଣ୍ଡପୀଠ ନିଷ୍ପତ୍ତି ନେଇଛି ଯେ ଛୋଟ ପ୍ୟାକେଟରେ ବିକ୍ରି ହୋଇଥିବା ଶୁଦ୍ଧ ନଡ଼ିଆ ତେଲ ଖାଇବା ତେଲ ବର୍ଗରେ ରହିବ।
ଅଧିକ ପଢ଼ନ୍ତୁ: ହସ୍ପିଟାଲ୍ରେ ଚାଲିଛି ପ୍ରତାପ ଷଡଙ୍ଗୀଙ୍କ ଚିକିତ୍ସା, ସଂସଦ ଇତିହାସରେ କଳା ଦିନ
ଦେଶର ବିଭିନ୍ନ ସ୍ଥାନରେ ନଡ଼ିଆ ତେଲକୁ ବିଭିନ୍ନ ଉପାୟରେ ବ୍ୟବହାର କରାଯାଉଛି। କୋର୍ଟ କହିଛନ୍ତି ଯେ ଯେଉଁଭଳି ଭାବରେ କମ୍ପାନୀମାନେ ସେମାନଙ୍କ ତେଲକୁ ବ୍ରାଣ୍ଡ କରିବେ ଏବଂ ଏହାକୁ ବିକ୍ରି କରିବେ, ସେହି ଆଧାରରେ ଟିକସ ନିଆଯିବ। ଏହି ପ୍ରସଙ୍ଗରେ ରାଜସ୍ୱ ବିଭାଗ ଯୁକ୍ତି ଦର୍ଶାଇଥିଲା ଯେ ଶୁଦ୍ଧ ନଡ଼ିଆ ତେଲକୁ ସର୍ବଦା ଖାଇବା ତେଲ ଭାବେ ବିବେଚନା କରାଯିବା ଉଚିତ୍ । ଅଦାଲତ କହିଛନ୍ତି ଯେ ଖାଇବା ତେଲ ଛୋଟ ପାତ୍ରରେ ବିକ୍ରି ହେଉଥିବାର ସୂଚାଏ ନାହିଁ ଯେ ଏହା ହେୟାର ଅଏଲ୍ ଭଳି ଭଳି ବ୍ୟବହାର ହେବ। ଯେ କୌଣସି ବ୍ୟକ୍ତି ତାଙ୍କ ଆବଶ୍ୟକତା ଅନୁଯାୟୀ ଅଳ୍ପ ପରିମାଣରେ ଖାଇବା ତେଲ କିଣି ପାରିବେ ।
୨୦୦୯ର ନିଷ୍ପତ୍ତିକୁ ଚ୍ୟାଲେଞ୍ଜ କରିଥିବା ଏକ୍ସାଇଜ୍ ବିଭାଗର ଆବେଦନ ଉପରେ ଏହି ଶୁଣାଣି ହୋଇଥିଲା। ପୂର୍ବରୁ ଏହି ମାମଲାରେ ତତ୍କାଳୀନ ସିଜେଆଇ ଆର ଭାନୁମତିଙ୍କ ବେଞ୍ଚ ଏକ ବିଭାଜିତ ରାୟ ଦେଇଥିଲେ। ସେହି ବେଞ୍ଚରେ, ନଭେମ୍ବର ୨୦୧୯ ରେ CJI ଭାବରେ ଅବସର ନେଇଥିବା ଜଷ୍ଟିସ୍ ଗୋଗୋଇଙ୍କ ମତ ଥିଲା ଯେ ଛୋଟ ପ୍ୟାକେଜିଂରେ ଥିବା ନଡ଼ିଆ ତେଲକୁ ଉପଯୁକ୍ତ ଭାବରେ ଖାଇବା ତେଲ ଭାବରେ ଶ୍ରେଣୀଭୁକ୍ତ କରାଯିବା ଉଚିତ ଏବଂ ଜଷ୍ଟିସ୍ ଭାନୁମତି କହିଥିଲେ ଛୋଟ ପାତ୍ରରେ ପ୍ୟାକେଜ୍ ହୋଇଥିବା ନଡିଆ ତେଲକୁ କେଶ ପାଇଁ ବ୍ୟବହାର କରାଯିବା ଉଚିତ୍ ।
ପୂର୍ବରୁ କଷ୍ଟମ୍ସ, ଏକ୍ସାଇଜ୍ ଏବଂ ସର୍ଭିସ ଟ୍ୟାକ୍ସ ଆପିଲେଟ୍ ଟ୍ରିବ୍ୟୁନାଲ୍ (ସେଷ୍ଟାଟ) ନିଷ୍ପତ୍ତି ନେଇଥିଲା ଯେ ଛୋଟ ପ୍ୟାକେଜ୍ ହୋଇଥିବା ନଡ଼ିଆ ତେଲକୁ ସେଣ୍ଟ୍ରାଲ୍ ଏକ୍ସାଇଜ୍ ଶୁଳ୍କ ଅଧିନିୟମ, ୧୯୮୫ ଅନୁଯାୟୀ ଖାଇବା ତେଲ ଭାବରେ ଶ୍ରେଣୀଭୁକ୍ତ କରାଯିବ। ତେବେ ସେଣ୍ଟ୍ରାଲ୍ ଏକ୍ସାଇଜ୍ କମିଶନରଙ୍କ ନିଷ୍ପତ୍ତି ସେଷ୍ଟାଟ ଠାରୁ ଭିନ୍ନ ଥିଲା, ଏହି କାରଣରୁ ଦୁଇ ଉତ୍ପାଦକଙ୍କ ଆପତ୍ତି ଥିଲା। ସୁପ୍ରିମକୋର୍ଟ କହିଛନ୍ତି, କିଛି ତେଲରେ ଅଭିନେତ୍ରୀଙ୍କ କେଶ ଲହରାଇବା ଫଟୋ ଅଛି। ମାର୍କେଟିଂ ସମ୍ବନ୍ଧୀୟ ଯୁକ୍ତି ହେଉଛି ବିଜ୍ଞାପନରୁ ଏହା ସ୍ପଷ୍ଟ ହୋଇଛି ଯେ ଏହି ତେଲ କେଶ ପାଇଁ, ଖାଇବା ପାଇଁ ନୁହେଁ। ଅବଶ୍ୟ, ଏହିପରି ବିଜ୍ଞାପନଗୁଡ଼ିକ ନଡିଆ ତେଲକୁ କେଶ ତେଲ ଏବଂ ଖାଇବା ତେଲ ଭାବରେ ଶ୍ରେଣୀଭୁକ୍ତ କରିବା ପାଇଁ ପର୍ଯ୍ୟାପ୍ତ ନୁହେଁ ।
