Global Terrorist Designation for TRF: TRFକୁ ବାଜିବ ଜାତିସଂଘ ସୁରକ୍ଷା ପରିଷଦର ଛାଟ ! UNSCର ୧୨୬୭ ପ୍ରତିବନ୍ଧକ କମିଟିକୁ ଅବଗତ କଲା ଭାରତ

ପହଲଗାମ୍ ନରସଂହାର ଘଟାଇଥିବା TRFକୁ ବିଶ୍ବ ଆତଙ୍କୀ ସଂଗଠନ ଘୋଷିତ କରିବା ଦିଗରେ ବଡ଼ ପଦକ୍ଷେପ । ଜାତିସଂଘ ସୁରକ୍ଷା ପରିଷଦର ୧୨୬୭ ସାଙ୍କସନ୍ କମିଟି ବା ପ୍ରତିବନ୍ଧକ କମିଟିକୁ TRF ସଂପର୍କରେ ଅବଗତ କଲା ଭାରତ । ଦି ରେଜିଷ୍ଟାନ୍ସ ଫ୍ରଣ୍ଟ୍ ବା TRF ହେଉଛି ପାକିସ୍ତାନୀ ଆତଙ୍କୀ ସଂଗଠନ ଲସ୍କର-ଏ-ତୈଇବାର ପ୍ରକ୍ସି । ଯାହାକି କାଶ୍ମୀରରେ ଲୁଚି ରହି ଆତଙ୍କୀ ଗତିବିଧି ଚଳାଇଥାଏ ।

ଅଧିକ ପଢ଼ନ୍ତୁ: ପେଣ୍ଟାଗନର ପୂର୍ବତନ ଅଧିକାରୀ କହିଲେ, କୁକୁର ଭଳିଆ ହାରିଲା ପାକିସ୍ତାନ

ଜାତୀୟ ଗଣମାଧ୍ୟମର ସୂଚନା ଅନୁସାରେ, ଭାରତର ଏକ ଟେକ୍ନିକାଲ୍ ଟିମ୍ ନ୍ୟୁୟର୍କରେ ୧୨୬୭ ପ୍ରତିବନ୍ଧକ କମିଟି ମନିଟରିଂ ଟିମ୍ ଓ ଅନ୍ୟ ଜାତିସଂଘ ସଦସ୍ୟ ଦେଶଙ୍କ ସହ ଏନେଇ ଆଲୋଚନା କରିଛନ୍ତି । ଏହି ଟିମ୍ ୟୁଏନ୍ ଅଫିସ୍ ଅଫ୍ କାଉଣ୍ଟର୍ ଟେରରିଜିମ୍- UNOCT ଏବଂ କାଉଣ୍ଟର୍ ଟେରରିଜିମ୍ କମିଟି ଏକ୍‌ଜିକ୍ୟୁଟିଭ୍ ଡାଇରେକ୍ଟୋରେଟ୍- CTED ପ୍ରତିନିଧିଙ୍କ ସହ ମଧ୍ୟ ଆଲୋଚନା କରିଥିବା ସୂଚନା ମିଳିଛି ।

ପହଲଗାମ ଆତଙ୍କବାଦୀ ଆକ୍ରମଣରେ TRFର ସଂପୃକ୍ତି ନେଇ UNSCରେ ଭାରତ ଠୋସ୍ ପ୍ରମାଣ ଦାଖଲ କରିବ । TRF ଜାତିସଂଘ ସୁରକ୍ଷା ପରିଷଦ ଦ୍ବାରା ବିଶ୍ବ ଆତଙ୍କୀ ଘୋଷିତ ହେଲେ, ଏଥିସହ ସଂଶ୍ଳିଷ୍ଟ ସମସ୍ତ ଆତଙ୍କବାଦୀଙ୍କ ବ୍ୟକ୍ତିଗତ ଓ ସାଂଗଠନିକ ଆର୍ଥିକ ସଂପତ୍ତି ଅଚଳ ହୋଇଯିବ ଏବଂ କୌଣସି ଜାତିସଂଘ ସଦସ୍ୟ ଦେଶରେ ପାଦ ରଖିବାକୁ ବି ଅନୁମତି ମିଳିବ ନାହିଁ ।