ଧମକପୂର୍ଣ୍ଣ କଲ ଓ ମେସେଜ ଆସିବା ଏକ ସାଧାରଣ ଘଟଣାରେ ପରିଣତ ହେଲାଣି। ଏମିତି ଏକ ଘଟଣା ପୁଣି ଥରେ ଦେଖିବାକୁ ମିଳିଛି। ଶୁକ୍ରବାର ଏକ ପାକିସ୍ତାନୀ ନମ୍ବରରୁ ମହାରାଷ୍ଟ୍ରର ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଉପରେ ଆକ୍ରମଣ କରିବାକୁ ଧମକ ମିଳିଛି। ମୁମ୍ବାଇ ପୋଲିସକୁ ଏକ ପାକିସ୍ତାନୀ ନମ୍ବରରୁ ଏହି ଧମକପୂର୍ଣ୍ଣ ମେସେଜ ମିଳିଛି। ମୁମ୍ବାଇ ପୋଲିସର ଅଧିକାରୀମାନେ କହିଛନ୍ତି ଯେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଉପରେ ଆକ୍ରମଣ କରିବାକୁ ଧମକପୂର୍ଣ୍ଣ ବାର୍ତ୍ତା ଏକ ପାକିସ୍ତାନୀ ନମ୍ବରରୁ ହ୍ବାଟ୍ସଆପ ଜରିଆରେ ଆସିଥିଲା।
ଅଧିକ ପଢ଼ନ୍ତୁ: ଦୁଷ୍କର୍ମ ପରେ ବୀଭତ୍ସ ହତ୍ୟା, ପେଟରୁ ଅନ୍ତବୁଜୁଳା କାଢ଼ି ପଥରରେ ଛେଚିଦେଲେ
ଏହି ମେସେଜ ମିଳିବା ପରଠାରୁ ମୁମ୍ବାଇ ପୋଲିସ ହାଇ ଆଲର୍ଟରେ ଅଛି। ମେସେଜ ପଠାଇଥିବା ବ୍ୟକ୍ତି ନିଜକୁ ମଲିକ ଶାହବାଜ ହୁମାୟୁନ ରାଜା ଦେବ ବୋଲି ପରିଚୟ ଦେଇଛି। ମୁମ୍ବାଇ ଟ୍ରାଫିକ ପୋଲିସକୁ ମଧ୍ୟ ସମାନ ନମ୍ବରରୁ ମେସେଜ ଆସିଛି। ଏହି ଘଟଣା ପରେ ମୁମ୍ବାଇ ପୋଲିସ ଏକ ମାମଲା ରୁଜୁ କରିଛି। ଏକ ଅଜଣା ନମ୍ବରରୁ ମେସେଜ ପାଇବା ପରେ ପୋଲିସ ଏବଂ ଗୁଇନ୍ଦା ସଂସ୍ଥାଗୁଡ଼ିକ ସତର୍କ ହୋଇଯାଇଛନ୍ତି। ମୁମ୍ବାଇ ପୋଲିସ ବର୍ତ୍ତମାନ ହାଇ ଆଲର୍ଟରେ ଥିବା ବେଳେ ମାମଲାର ତଦନ୍ତ କରୁଛି।
ଗତ ସପ୍ତାହରେ, ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କୁ ମଧ୍ୟ ହତ୍ୟା ଧମକ ମିଳିଥିଲା। ମୁମ୍ବାଇର ଗୋରେଗାଓଁ ପୋଲିସକୁ ଏକ ଧମକପୂର୍ଣ୍ଣ ଇମେଲ ଜରିଆରେ କେହି ଜଣେ ଅଜଣା ବ୍ୟକ୍ତି ଚେତାବନୀ ଦେଇଥିଲେ। ଶିନ୍ଦେଙ୍କ କାରକୁ ବୋମାରେ ଉଡ଼ାଇ ଦିଆଯିବ ବୋଲି ଇମେଲରେ ଧମକ ମିଳିଥିଲା। ରାଜ୍ୟ ସଚିବାଳୟ ଏବଂ ଜେଜେ ମାର୍ଗ ପୋଲିସ ଷ୍ଟେସନକୁ ମଧ୍ୟ ସମାନ ଧମକପୂର୍ଣ୍ଣ ମେସେଜ ମିଳିଥିଲା। ଶିନ୍ଦେଙ୍କୁ ପଠାଯାଇଥିବା ଧମକପୂର୍ଣ୍ଣ ବାର୍ତ୍ତାର ତଦନ୍ତ କରିବା ପରେ, ଏହା ଏକ ନକଲି ଇମେଲ ଥିଲା ମୁମ୍ବାଇ ପୋଲିସ ସ୍ପଷ୍ଟ କରିଥିଲା।
ଜଣେ ଅଧିକାରୀଙ୍କ ସୂଚନା ଅନୁଯାୟୀ, ଫେବୃଆରୀ ୨୦ ତାରିଖରେ ସହରର ଗୋରେଗାଓଁ ଏବଂ ଜେଜେ ମାର୍ଗ ପୋଲିସ ଷ୍ଟେସନରେ ଶିନ୍ଦେଙ୍କ କାରକୁ ବୋମା ମାଡ଼ କରିବାକୁ ଧମକପୂର୍ଣ୍ଣ ଇମେଲ ମିଳିଥିଲା। ଏହା ପରେ ମାମଲାର ତଦନ୍ତ ଆରମ୍ଭ ହୋଇଥିଲା। ସାଧାରଣ ଲୋକଙ୍କୁ କ୍ଷତି ପହଞ୍ଚାଇବା ପାଇଁ ବୟାନ ଦେବା କାରଣରୁ ଭାରତୀୟ ନ୍ୟାୟ ସଂହିତା (IPC)ର ଧାରା ୩୫୧(୩) ଏବଂ ୩୫୩(୨) ଅନୁଯାୟୀ ଜଣେ ଅଜ୍ଞାତ ବ୍ୟକ୍ତିଙ୍କ ବିରୁଦ୍ଧରେ ମୁମ୍ବାଇ ଉପକଣ୍ଠ ଗୋରେଗାଓଁ ପୋଲିସ ଷ୍ଟେସନରେ ଏଫଆଇଆର ରୁଜୁ କରାଯାଇଥିଲା। ପୋଲିସ ବୁଲଧାନା ଜିଲାର ମଙ୍ଗେଶ ଭାୟାଲ ଏବଂ ଅଭୟ ଶିଙ୍ଗନେଙ୍କୁ ଗିରଫ କରିଥିଲା।