LIVE TV
ମଧୁପୁର ଗାଁରେ ପକାଘର ଦେଖିନାହାନ୍ତି ଲୋକେ । ପିଢି ପରେ ପିଢି ବିତିଯାଉଛି ସିନା, ନୂଆଣିଆ ଚାଳଛପର ଓ ମାଟିଘରେ ସମୟ ସରିଯାଉଛି । ଭୋଟ୍ ବେଳେ ନେତା ଆସନ୍ତି, ପ୍ରତିଶ୍ରୁତି ଦେଇ, ଚାଲିଯାଆନ୍ତି, ଆଉ ପରେ ଭୁଲିଯାଆନ୍ତି । ତେଣେ ପକ୍କା ଘରକୁ ଅପେକ୍ଷା କରି ଗାଁର ଅନେକ ଲୋକଙ୍କ ମୃତ୍ୟୁ ହୋଇଛି ସିନା ଘର ମିଳିନି ।
Also Read
ସୁନ୍ଦରଗଡ଼ ଲହୁଣୀପଡା ବ୍ଲକର ମଧୁପୁର ଗ୍ରାମରେ ରୁହନ୍ତି ୭୭ ପରିବାର । ଚନ୍ଦ୍ରରେ ଘର କରିବାକୁ ମଣିଷ ଚିନ୍ତା କରୁଥିବାବେଳେ ଏଠି ପକା ଘରଖଣ୍ଡେ ପାଲଟିଛି ସାତ ସପନ । ମାଟି କାନ୍ଥ ଆଉ ତା’ଉପରେ ଆଦିବାସୀ ଅଂଚଳରେ ପ୍ରଚଳିତ ଖପର, ଆଉ ସେଇ ଘରେ ରୁହନ୍ତି ପୁରା ପରିବାର । ଯେଉଁ ଘର ଉପରେ ଖପର ନଥାଏ, ପଲିଥିନ୍ ପକାଇ ମୁଣ୍ଡ ଗୁଞ୍ଜିବାକୁ ପଡ଼େ । କେବଳ ମଣିଷ ନୁହନ୍ତି ସେହି ଘରେ କୁକୁଡ଼ା, ଛେଳି ଆଉ ମଣିଷ ।
ଅଧିକ ପଢ଼ନ୍ତୁ: ଘରର ଛାତ କହିଲେ ଖଣ୍ଡିଏ ପାଲ, ଖଟିଆରେ ସ୍ୱାମୀ...ପ୍ରଶାସନକୁ ଚାହିଁ ବସିଛି ସ୍ତ୍ରୀ
ପଞ୍ଚାୟତ ସମିତି ଘର କିନ୍ତୁ ପକ୍କାଘର। ବଡ଼ ବଡ଼ ଅକ୍ଷରରେ ଲେଖାହୋଇଛି ଗାଁର ନାଁ ମଧୁପୁର । ହେଲେ ଏଠାକାର ଲୋକଙ୍କ ଭାଗ୍ୟରେ ଘରଖଣ୍ଡେ ନାହିଁ । ଗ୍ରାମବାସୀ ନିଜର ସମସ୍ୟା ପ୍ରଶାସନକୁ ଜଣାଇନାହାନ୍ତି ତା ନୁହେଁ । ପଞ୍ଚାୟତ ଠାରୁ ଆରମ୍ଭ କରି ବ୍ଳକ୍ ପର୍ଯ୍ୟନ୍ତ ସବୁଠି ଗୁହାରୀ କରିଛନ୍ତି ହେଲେ ଫଳ ଶୂନ । ଗାଁକୁ ଘର ଆସୁଛି ବୋଲି ଶୁଣିବାକୁ ମିଳେ, ହେଲେ ଘର କୁଆଡେ ଯାଏ ଆମେ ଜଣିପାରିନୁ କହିଛନ୍ତି ଗାଁ ଲୋକେ । ସରକାର ଆମ ଗ୍ରାମକୁ କାହିଁକି ଏତେ ଅବହେଳା ବୋଲି ପ୍ରଶ୍ନ କରିଛନ୍ତି ଗ୍ରାମବାସୀ ।
ପକ୍କା ଘର ପାଇଁ ସରକାର କେତେ କଣ ଯୋଜନା କରୁଛନ୍ତି, ହେଲେ ଦୀପ ତଳ ଅନ୍ଧାର ପରି ଯୋଜନାର ବାସ୍ତବ ଚିତ୍ର ମଧୁପୁର ଗାଁ ବୟାନ କରୁଛି । ସେପଟେ ଲହୁଣୀପଡା ବିଡିଓ କହିଛନ୍ତି, ଅଭିଯୋଗ ପାଇନୁ। ତଦନ୍ତ ପରେ ଯୋଗ୍ୟ ହିତାଧିକାରୀଙ୍କୁ ଘର ମିଳିବ ।
