ରକ୍ଷା କର..! ବୈତରଣୀ ଦେଖାଉଛି କରାଳ ରୂପ, ଅଧା ଗାଁ ଗିଳି ସାରିଲାଣି.. ଆଉ ଅଳ୍ପ ବାକି ଅଛି

କୂଳ ଆଡକୁ ମୁହାଁଲାଣି ବୈତରଣୀ। ଚିନ୍ତାରେ ଗାଁ ଲୋକେ । ରୂପ ବଦଳାଉଛି ବୈତରଣୀ । ଦିନକୁ ଦିନ କୂଳ ଖାଉଛି.. ଗାଁ ଲୋକଙ୍କୁ ଡରାଉଛି । ନଇ ପଠା ବି ଆଉ ଦିଶୁନି। ନିଜ ପଠାକୁ ପୁରା ଗିଳି ସାରିଲାରିଣି ବୈତରଣୀ। ସ୍ଥିତି ଏମିତି ହେଲାଣି ଯେ, ଲୋକଙ୍କ ପୈତୃକ ସମ୍ପତ୍ତିରୁ ଅଧିକାଂଶ ଏବେ ବୈତରଣୀ ନଦୀ ଗର୍ଭରେ ମିଶିଗଲାଣି। ଖରାଦିନ କି ଶୀତ ଦିନେ ଯାହା ଯେମିତି ଚଳିଯାଉଛି । ହେଲେ ବର୍ଷା ଦିନେ ବୈତରଣୀ ଯେତେବେଳେ କରାଳ ରୂପ ଦେଖାଉଛି ସେତେବେଳେ ଆତଙ୍କିତ ହେଉଛନ୍ତି ଗାଁ ଲୋକେ ।

ଭଦ୍ରକ ଭଣ୍ଡାରିପୋଖରୀ ମଢିଆଳି ପଂଚାୟତର ଦୃଶ୍ୟ ଦେଖିଲେ ଆପଣ ସହଜରେ ଏହା ଅନୁମାନ କରିପାରିବେ । ପୂର୍ବରୁ ଗାଁଠାରୁ ବହୁ ଦୂରରେ ନଦୀ ପ୍ରବାହିତ ହେଉଥିବା ବେଳେ ଏବେ ଗାଁ ମୁହାଁ ହେଲାଣି ସ୍ରୋତ । ଏମିତିକି ସ୍ଥାୟୀ ପ୍ରତିକାର ନହେଲେ ମାତ୍ର କେଇ ବର୍ଷରେ ବୈତରଣୀ ନଦୀ ଗର୍ଭରେ ଲୀନ ହୋଇଯିବ ମଢିଆଳ ପଂଚାୟତ ।

ଏଇ ପଂଚାୟତର ଅଧିକାଂଶ ଲୋକ ଚାଷ ଉପରେ ନିର୍ଭର କରି ଚଳନ୍ତି । ହେଲେ ପଂଚାୟତବାସୀଙ୍କ ପାଇଁ ବୈତରଣୀ ପାଲଟିଲାଣି ଅଭିଶାପ । ବାତ୍ୟା ଆଶ୍ରୟସ୍ଥଳୀଠାରୁ ଶ୍ମଶାନ ଘାଟ ଯାଏଁ ପ୍ରାୟ ୮୦୦ ମିଟର ପର୍ଯ୍ୟନ୍ତ ନଦୀ ଏବେ ଗାଁ ଆଡକୁ ମାଡି ଆସିଛି । ଉପରମୁଣ୍ଡରେ ଦୁଲାଖାପାଟଣାରୁ ବନ୍ଦାଳୋକୁ ସଂଯୋଗ କରୁଥିବା ନିର୍ମାଣାଧୀନ ସେତୁ ଓ ତଳ ମୁଣ୍ଡରେ ବାଲି ଗୁଳା ପାଇଁ ବୈତରଣୀ ନିଜର ଗତି ବଦଳାଉଥିବା କୁହାଯାଉଛି। ଏମିତିକି ୨୦୨୦ରୁ ବର୍ତ୍ତମାନ ସୁଦ୍ଧା ୩୦ ଫୁଟ୍‌ ଆଡକୁ ମାଡି ଆସିଲାଣି ବୈତରଣୀ।

ନଦୀ ମୋଡ଼ ବଦଳାଉଥିବାରୁ ଗାଁ ଲୋକେ ଏବେ ଆତଙ୍କିତ ଅବସ୍ଥାରେ । ଏନେଇ ଜଳସମ୍ପଦ ବିଭାଗକୁ ମଧ୍ୟ ଅବଗତ କରାଯାଇଛି । ହେଲେ ଲାଭ କିଛି ହେଲାନି । ଏମିତିକି ଏଠାରେ ଶୌଚ ହେବାକୁ ଯାଇ ୪ ଜଣଙ୍କ ପ୍ରାଣ ଗଲାଣି । ହେଲେ ଏ ପର୍ଯ୍ୟନ୍ତ ପ୍ରଶାସନ ପକ୍ଷରୁ ସୂଚନା ଫଳକଟିଏ ବି ଲଗାଯାଇନି ।

ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ନଦୀକୂଳ ସୁରକ୍ଷା ଦାୟିତ୍ୱ ଯାଜପୁର ଜଳସମ୍ପଦ ବିଭାଗ ହାତରେ ରହିଥିବାରୁ ଅଧିକାରୀ ମାନେ ଟାଳଟୁଳ ନୀତି ଅବଲମ୍ବନ କରୁଥିବା ଗ୍ରାମବାସୀ ମାନେ ଅଭିଯୋଗ କରିଛନ୍ତି । ତେବେ ଭଦ୍ରକ ଜିଲ୍ଲାପାଳ କହିଛନ୍ତି ଖୁବଶୀଘ୍ର ବିକଳ୍ପ ବ୍ୟବସ୍ଥା ହେବ । ତେବେ ଦେଖାଯାଉ ଏଇ ପଂଚାୟତବାସୀଙ୍କ ଦୁଃଖ କେବେ ଶୁଣୁଛି ପ୍ରଶାସନ ।

(ରିପୋର୍ଟ-ପାର୍ଥସାରଥୀ ନାୟକ, ଭଦ୍ରକ)