‘ହରେ କୃଷ୍ଣ ହରେ ରାମ’ ଗୀତ ଗାଉ ଗାଉ ତଳେ ପଡ଼ିଗଲେ, ସବୁଦିନ ପାଇଁ ଚାଲିଗଲେ ଆରପାରିକୁ...

ମୃତ୍ୟୁ କେତେବେଳେ କେମିତି ଆସେ ତାହା କେହିବି କହିପାରିବେନି। କିଏ ଜାଣିଥିଲା ଭଗବାନଙ୍କ ନାମ ଜପୁଥିବା ମଣିଷଟି କିଛି ସମୟ ପରେ ସମସ୍ତଙ୍କୁ ଛାଡ଼ି ଆରପାରିକୁ ଚାଲିଯିବେ। କିଏ ଜାଣିଥିଲା ଏହି ଗୀତ ତାଙ୍କ ଜୀବନର ଶେଷ ଗୀତ ହେବ ? ସତ୍‌ସଙ୍ଗ କାର୍ଯ୍ୟକ୍ରମରେ ରାମ ନାମ କୃଷ୍ଣ ନାମ ଜପୁଥିବା ବେଳେ ଜଣେ ପୂଜକଙ୍କ ଜୀବନ ଚାଲି ଯାଇଛି। ମୃତକ ହେଲେ ଗୋପାଳଜୀ ମନ୍ଦିରର ପୂଜକ କୈଳାଶ ଚନ୍ଦ୍ର ପଣ୍ଡା(୭୧)। ସେ ସୁବର୍ଣ୍ଣପୁର ଜିଲ୍ଲା ବିନିକା ଥାନା ସିନ୍ଦୁରପୁର ଗାଁର ବୋଲି ଜଣାପଡ଼ିଛି।

ଅଧିକ ପଢ଼ନ୍ତୁ: ନାଟକର ଶେଷ ଗୀତ ପାଲଟିଲା ଜୀବନର ଶେଷ ଗୀତ

ଚାଲିଥିଲା ଭଜନକୀର୍ତ୍ତନ, ହଠାତ୍‌ ଚାଲିଗଲା ଜୀବନ#Odisha #OTV pic.twitter.com/624415zzLe

— ଓଟିଭି (@otvkhabar) November 24, 2022

ସୂଚନା ଅନୁସାରେ, ଗତକାଲି ବରଗଡ଼ ଜିଲ୍ଲା ଟୁକୁରାରେ ସତ୍‌ସଙ୍ଗ କାର୍ଯ୍ୟକ୍ରମରେ ପୂଜକ କୈଳାଶ ଚନ୍ଦ୍ର ଯୋଗ ଦେଇଥିଲେ। ମୃଦଙ୍ଗର ତାଳେ ତାଳେ ଗିନି ବଜାଇ ହରେ କୃଷ୍ଣ ହରେ ରାମ ଗୀତରେ ପୁରା ପରିବେଶ କମ୍ପି ଉଠୁଥିଲା। ହେଲେ ଗୀତ ଗାଉ ଗାଉ ହଠାତ୍ କୈଳାଶ ତଳେ ପଡ଼ି ଯାଇଥିଲେ।  ଆଉ ଉଠି ପାରିଲେନି। ସବୁଦିନ ପାଇଁ ଚାଲିଗଲେ ଆରପାରିକୁ। ପୂଜକଙ୍କ ଏଭଳି ମୃତ୍ୟୁ ଦେଖି ସ୍ତବ୍ଧ ହୋଇଯାଇଥିଲେ ସେଠାରେ ଉପସ୍ଥିତ ଥିବା ଲୋକେ।

ପୂଜକ କୈଳାଶଙ୍କ ମୃତ୍ୟୁ ଖବର ଜଣାପଡ଼ିବା ପରେ ସିନ୍ଦୁରପୁର ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା।