LIVE TV
କପାଳରେ ଯେତେବେଳେ ଦୁଃଖ ଲେଖାଯାଇଛି,ସେତେବେଳେ ଭାଗ୍ୟ କେମିତି ବା ହାତ ଧରିବ ? ଆଖିକୁ ଦିଶୁନି, କିନ୍ତୁ କଣ୍ଠରେ ଜୀବନ ଯନ୍ତ୍ରଣାର ଧାଡି ଧାଡି ଦୁଃଖ । ତାଙ୍କ ପୂରା ପରିବାରକୁ ଭାଗ୍ୟ ନେଇ ଆସିଛି ଦାଣ୍ଡକୁ । ତଥାପି ଭାଙ୍ଗି ପଡିନାହାନ୍ତି ପାରଳାଖେମୁଣ୍ଡିର ଦିବ୍ୟାଙ୍ଗ ଭିକ୍ଷୁକ ଜି.ଶିବ ।
କେନ୍ଦେରା ଧରି ବାପା ଗୀତ ଗାଉଛି । ବେକରେ ପଡିଥିବା ଗାମୁଛାକୁ ଭିଡି ଭିଡି ଆଗକୁ ବଢୁଛନ୍ତି ଦୁଇ ନାବାଳକ ପୁଅ । ପୁଣି ରାସ୍ତାରେ କାଳେ ଭୋକ ହେବ, ସେଇଥି ଲାଗି ହାତରେ ଧରିଛନ୍ତି ପାଉଁରୁଟି । ଆଉ ଦୁଆର ଦୁଆର ବୁଲି କରୁଛନ୍ତି ଭିକ୍ଷାବୃତ୍ତି । ଦୁଆର ଦୁଆର ବୁଲି ଯାହା ଯେତିକି ରୋଜଗାର ହେଲା, ସେତିକିରେ ପୂରା ପରିବାର ଚଳୁଛି । ଏଠି ଆପଣଙ୍କ ମନରେ ପ୍ରଶ୍ନ ଉଠୁଥିବ, ଦୁଇ ନାବାଳକ ରାଜରାସ୍ତାରେ ବୁଲିବୁଲି କେମିତି ମାଗୁଛନ୍ତି ଭିକ? ଯେତେବେଳେ ଭୋକରେ ପେଟ ପୋଡିଯାଉଥିବ ସେତେବେଳେ ନିୟମକୁ ମାନିବ ବା କିଏ ?
Also Read
ଅଧିକ ପଢ଼ନ୍ତୁ: ପେଟ ପାଇଁ ନାଟ; ଚାଖଣ୍ତେ ପେଟ ପାଇଁ ଦାଦନ ଖଟୁଛନ୍ତି ବ୍ଲକ୍ ଉପାଧ୍ୟକ୍ଷ
ହାତରେ କେନ୍ଦେରା ଧରି ଗୀତ ବୋଲି ବୋଲି ଭିକ୍ଷାବୃତ୍ତି କରୁଥିବା ବ୍ୟକ୍ତି ଜଣକ ହେଲେ ଜି.ଶିବ କୁମାର। ଜନ୍ମବେଳରୁ ଆଖିକୁ ଦିଶୁନି, ତେଣୁ କାମ କରିବେ ବା କେମିତି ? ଆଖିକୁ ଦିଶୁନି ସତ ହେଲେ ପରିବାର ବୋଝକୁ ଆଉ କାହା ଉପରେ ସେ ଲଦିବାକୁ ବି ଚାହୁଁନାହାନ୍ତି । ସେଇଥି ଲାଗି ତ ଦୃଷ୍ଟବାଧିତ ହେବା ପରେ ବି ଦୁଇ ପୁଅଙ୍କ ସାହାଯ୍ୟ ନେଇ ଭିକ୍ଷାବୃତ୍ତି କରୁଛନ୍ତି ।
ସବୁଠୁ ଗୁରୁତ୍ୱପୂର୍ଣ୍ଣ କଥା ହେଲା ରାଜ୍ୟ ସରକାର ବାରମ୍ବାର କହୁଛନ୍ତି, ରାଜ୍ୟରେ କେହି ଭୋକିଲା ରହିବେନି କି ଭିକାରୀ ରହିବେନି। ହେଲେ ଆଶ୍ଚର୍ଯ୍ୟର କଥା ଶିବ କୁମାର ଖୋଦ ମୁଖ୍ୟମନ୍ତ୍ରୀଙ୍କ ଜିଲ୍ଲା ଗଂଜାମ ର ବୋଲି ଜଣାପଡିଛି । କିନ୍ତୁ ସେ ଏବେ ଗଜପତି ପାରଳାଖେମୁଣ୍ଡିରେ ଏମିତି ବୁଲି ବୁଲି କରୁଛନ୍ତି ଭିକ୍ଷାବୃତ୍ତି । ଦିବ୍ୟାଙ୍ଗଙ୍କ ପାଇଁ ଶହଶହ ଯୋଜନା କରିଛନ୍ତି ସରକାର । ସେଇ ଯୋଜନାରେ ସାମିଲ ହେବା ପାଇଁ ବାରମ୍ବାର ଶିବ ଆବେଦନ କରିଛନ୍ତି ସତ, କିନ୍ତୁ ଯୋଜନାର ଲାଭ ପାଇନାହାନ୍ତି ।
ତେବେ କଅଁଳ ଶିଶୁ ରାସ୍ତା ଉପରେ ଭିକ ମାଗିବା ଘଟଣାକୁ ନେଇ ଉଦବେଗ ପ୍ରକାଶ କରିଛନ୍ତି ବୁଦ୍ଧିଜୀବୀ । ସେପଟେ ଏନେଇ ଜିଲ୍ଲା ଶିଶୁ ସୁରକ୍ଷା ଅଧିକାରୀ କହିଛନ୍ତି, ଏ ଘଟଣା ସମ୍ପର୍କରେ ସେ ଏବେ ଜାଣିଲେ । ସେମାନଙ୍କୁ ଖୋଜି ବାହାର କରିବା ପରେ ଗଂଜାମ ପ୍ରଶାସନ ସହ ଯୋଗାଯୋଗ କରି ସେମାନଙ୍କୁ ସବୁ ପ୍ରକାର ସରକାରୀ ସହାୟତା ଯୋଗାଇ ଦେବେ ।
ଶିଶୁ ଓ ଦିବ୍ୟାଙ୍ଗ ପାଇଁ ଯୋଜନାର ଅଭାବ ନାହିଁ। ହେଲେ ଏ ସବୁ ସଫଳ ରୂପାୟନକୁ ନେଇ ସରକାର ଯେଉଁ ବାହାସ୍ଫୋଟ ମାରୁଛନ୍ତି, ତାହା କେବଳ ଦିବାସ୍ୱପ୍ନ ବୋଲି ସାଧାରଣରେ ଚର୍ଚ୍ଚା ହେଉଛି । ତେବେ ଏହି ପରିବାରକୁ କେବେ ସରକାରୀ ସାହାଯ୍ୟ ମିଳିବ, ତା’ ଉପରେ ଏବେ ସମସ୍ତଙ୍କ ନଜର ।
(ରିପୋର୍ଟ- ଆଦର୍ଶ ଦାସ, ଗଜପତି)
