କଳାହାଣ୍ଡିରେ ବିଧାୟକଙ୍କୁ ବିରୋଧ; ଗାଁ ମୁଣ୍ଡରୁ ଫେରିଆସିଲେ ଲାଞ୍ଜିଗଡ଼ ବିଧାୟକ

ରାସ୍ତା ପାଇଁ ବିଧାୟକଙ୍କୁ ବିରୋଧ । କଳାହାଣ୍ଡି ଜିଲ୍ଲା ତ୍ରିଲୋଚନପୁରରେ ଖରାପ ରାସ୍ତା ମରାମତି ହୋଇନଥିବାରୁ ଲାଞ୍ଜିଗଡ଼ ବିଧାୟକ ପ୍ରଦୀପ ଦିଶାରୀଙ୍କ ଗାଡ଼ି ଅଟକାଇ ଜବାବ ମାଗିଲେ ସ୍ଥାନୀୟ ଲୋକେ । କଳାହାଣ୍ଡି ଜିଲ୍ଲା ନିୟମଗିରି ପାଦଦେଶରେ ଥିବା ତ୍ରିଲୋଚପୁରରେ ହଟହଟା ହୋଇଛନ୍ତି ବିଧାୟକ ଦିଶାରୀ ।

ତ୍ରିଲୋଚପୁରରେ ନିର୍ମାଣ ହୋଇଥିବା ପାର୍କ ଓ ଛେଳି ହଷ୍ଟେଲର ଉଦଘାଟନ ପାଇଁ ବିଧାୟକ ଯାଉଥିବା ବେଳେ ଗ୍ରାମବାସୀ ରାସ୍ତା ଅବରୋଧ କରିଥିଲେ । ଆଗ ରାସ୍ତା ଓ ପରେ ପାର୍କ ବୋଲି କହି ସ୍ଲୋଗାନ ଦେଇଥିଲେ ସ୍ଥାନୀୟ ଲୋକେ । ଲୋକଙ୍କୁ ବୁଝାଇବାକୁ ଚେଷ୍ଟ କରିଥିଲେ ବି ସଫଳ ହୋଇପାରି ନଥିଲେ ବିଧାୟକ ଦିଶାରୀ ।

ତିନି ବର୍ଷ ହେଲା ଅଭିଯୋଗ ପରେ ବି ରାସ୍ତା କାହିଁକି ନିର୍ମାଣ ହୋଇନି ବୋଲି ଲୋକେ ପ୍ରଶ୍ନ କରିଥିଲେ । କିଛି ଦିନ ଚାଲିବା ପରେ ବି ଲକ୍ଷ୍ମୀବସ ବି ବନ୍ଦ ହୋଇଯିବାରୁ ଯିବା ଆସିବାରେ ଅସୁବିଧା ହେଉଥିବା ଲୋକେ ଅଭିଯୋହ କରିଥିଲେ ।

ଶେଷରେ ଅଞ୍ଚଳବାସୀଙ୍କ ଆକ୍ରୋଶର ଶିକାର ହୋଇ ହଟ ହଟା ହୋଇ ଗାଁ ମୁଣ୍ଡରୁ ଫେରି ଯାଇଥିଲେ ବିଧାୟକ । ତେବେ ଏନେଇ ବିଧାୟକ ପ୍ରଦୀପ ଦିଶାରୀଙ୍କ ପ୍ରତିକ୍ରିୟା ମିଳିପାରିନାହିଁ ।