ହକି ବିଶ୍ୱକପ ପାଇଁ ନୋ ହୋର୍ଡିଂ ଜୋନ୍ ଘୋଷଣା କଲା ବିଏମସି

ଆସନ୍ତା ୧୩ ତାରିଖରୁ ହକି ବିଶ୍ୱକପ୍। ଏଥିପାଇଁ କାଉଣ୍ଟଡାଉନ୍ ଆରମ୍ଭ ହୋଇଥିବା ବେଳେ, ସବୁଠି ଏବେ ବିଶ୍ୱକପ୍ ଫିଭର। ଭୁବନେଶ୍ୱର ଓ ରାଉରକେଲା ନୂଆରୂପରେ ସଜେଇ ହେଉଥିବା ବେଳେ, ଏଥିରୁ ବାଦ ପଡିନି ପର୍ଯ୍ୟଟନ ସହର ପୁରୀ। ଏଠାରେ ପ୍ରସ୍ତୁତ କରାଯାଇଛି ୨୨ଫୁଟ ଉଚ୍ଚତାର ହକି ଷ୍ଟିକ୍। ଏହାକୁ ପ୍ରସ୍ତୁତ କରୁଛନ୍ତି ଶିଳ୍ପୀ ମହେଶ୍ୱର ମହାରଣା। ମହେଶ୍ୱର ୧୬ଟି ବିରାଟକାୟ ହକି ଷ୍ଟିକ ପ୍ରସ୍ତୁତ କରିଛନ୍ତି। ଯାହା ଭୁବନେଶ୍ୱର ଓ ରାଉରକେଲା ସହରର ବିଭିନ୍ନ ସ୍ଥାନରେ ପ୍ରଦର୍ଶିତ ହେବ।  

ସେପଟେ ହକି ବିଶ୍ୱକପ ପାଇଁ ସହରର ବିଭିନ୍ନ ଅଞ୍ଚଳକୁ ବିଜ୍ଞାପନ ନିଷେଧାଞ୍ଚଳ ବା ନୋ ହୋର୍ଡିଂ ଜୋନ ଭାବେ ଘୋଷଣା କରିଛି ବିଏମସି। ବିମାନବନ୍ଦରରୁ ଏଜି ଛକ, ଏଜି ଛକରୁ ରାଜଭବନ ଏବଂ ରାଜଭବନରୁ ପାଓ୍ବାର ହାଉସ ଛକ ସବୁ ଅଞ୍ଚଳକୁ ନୋ ହୋର୍ଡିଂ ଜୋନ୍ ଘୋଷଣା କରାଯାଇଛି।

ସେହିଭଳି ରବୀନ୍ଦ୍ରମଣ୍ଡପ ଛକରୁ ୧୨୦ ବାଟାଲିୟନ ଠାରୁ ଆରମ୍ଭ କରି ଏଜି ଛକରୁ ପିଏମଜି ଛକ ଏବଂ ପିଏମଜିରୁ ଜନପଥ ପର୍ଯ୍ୟନ୍ତ ଏ ସମସ୍ତ ଅଞ୍ଚଳ ନୋ ହୋର୍ଡିଂ ଜୋନ ଭିତରେ ଆସିବ। ଏହି ଅଞ୍ଚଳରେ କୌଣସି ହୋର୍ଡି ଲାଗି ପାରିବ ନାହିଁ।

ଅଧିକ ପଢ଼ନ୍ତୁ: ହକି ବିଶ୍ୱକପ୍ ପାଇଁ ବିପଦରେ ସୁନ୍ଦରଗଡ଼ର ୧୫ ହଜାର ଶ୍ରମିକଙ୍କ ଦାନାପାଣି

ଏହି ଅଞ୍ଚଳରେ କୌଣସି ସରକାରୀ ବା ବେସରକାରୀ ବିଜ୍ଞାପନ ହୋର୍ଡିଂ ଲଗାଗଲେ ତାହାକୁ ଜବତ କରାଯିବ। ଏଥିପାଇଁ ବିଏମସି ପକ୍ଷରୁ ଏକ ସ୍କ୍ବାର୍ଡ ଗଠନ କରାଯାଇଛି ବୋଲି କହିଛନ୍ତି ମେୟର ସୁଲୋଚନା ଦାସ।