ଗୁଳିବିଦ୍ଧ ଦନ୍ତାହାତୀର ମୃତ୍ୟୁ, ବାଜିଥିଲା ୬ଟି ଗୁଳି

ବହୁଚର୍ଚ୍ଚିତ ନରସିଂହପୁରରେ ଗୁଳିବିଦ୍ଧ ଦନ୍ତାହାତୀର ଚିକିତ୍ସାଧୀନ ଅବସ୍ଥାରେ ମୃତ୍ୟୁ । ପଶ୍ଚିମ ବନ ବିଭାଗ ଜୟପୁର ଜଙ୍ଗଲରେ ଚିକିତ୍ସା ବେଳେ ମୃତ୍ୟୁ । ହାତୀର ମୃତ୍ୟୁ ନେଇ ସୂଚନା ଦେଲେ ରେଞ୍ଜର ପ୍ରଫୁଲ୍ଲ ଦେହୁରୀ । ୮ ଦିନ ତଳେ ଆହତ ହାତୀ ଠାବ ପରେ ଚିକିତ୍ସା ଆରମ୍ଭ ହୋଇଥିଲା । ହାତୀର ଶରୀରରେ ମୋଟ ୬ଟି ଗୁଳି ବାଜିଥିବା ଜଣାପଡ଼ିଥିଲା ।

ଭୀଷଣ କଷ୍ଟରେ ଛଟପଟ ହେଉଥିଲା ଦନ୍ତା । ନା ଖାଉଥିଲା, ନା କିଛି ପିଉଥିଲା । ଗତ କିଛି ଦିନ ଧରି କଟକ ନରସିଂହପୁର ଜଙ୍ଗଲରେ ଦନ୍ତା ହାତୀ ଆହତ ଅବସ୍ଥାରେ ପଡ଼ି ରହିଥିଲା । ବିଶେଷଜ୍ଞ ଟିମ୍ ଚିକିତ୍ସା ପାଇଁ ଲାଗିଥିଲା । ହାତୀ ଖାଇବା ଛାଡ଼ି ଦେଇଥିବାରୁ ଚିନ୍ତା ଅଧିକ ବଢ଼ି ଯାଇଥିଲା । ଆମ୍ବ, ପଣସ, ଆଖୁ, ବାଉଁଶ ପତ୍ର ଭଳି ବିଭିନ୍ନ ଫଳ ତାକୁ ଖାଇବାକୁ ଦିଆଯିବା ସତ୍ତ୍ୱେ ସେ କିଛି ଖାଇ ନଥିଲା । ଡାକ୍ତରୀ ଟିମ୍ ସାଲାଇନ୍ ପରେ ସାଲାଇନ୍‌ ଲଗାଇ ଚାଲିଥିଲେ । ହେଲେ ଆଜି ତାର ପ୍ରାଣ ବାୟୁ ଉଡ଼ି ଯାଇଛି ।

ଗତ କିଛିଦିନ ତଳେ ଶିକାରୀଙ୍କ ଗୁଳିର ଶିକାର ହୋଇଥିଲା ଦନ୍ତା ହାତୀ । ନରସିଂହପୁରରେ ଜୀବନ ସହ ସଂଘର୍ଷ କରୁଥିଲା ଗୁଳିବିଦ୍ଧ ଦନ୍ତା । ଦନ୍ତା ମୁଣ୍ଡରେ ଶିକାରୀର ଗୁଳି ବାଜିଥିଲା ।