LIVE TV
ବଡ଼ ଖବର । ୨୦୦ କି ୫୦୦ ନୁହେଁ କି ୧୦୦୦ ନୁହେଁ । ମାତ୍ର ୭୫ ଟଙ୍କାରେ ସିନେମା ଦେଖିବେ ଦର୍ଶକ । ମଲ୍ଟି ପ୍ଲେକ୍ସ ହେଉ ଅବା ସିଙ୍ଗେଲ ସ୍କ୍ରିନ ସବୁଠି ସମାନ ଦର । ସାରା ଭାରତ ବର୍ଷରେ ପାଳନ ହେବ ଜାତୀୟ ସିନେମା ଦିବସ । ଏନେଇ ଦର୍ଶକଙ୍କ ପାଇଁ ଏକ ନିଆରା ଅନୁଭୂତି ଦେବାକୁ ଏପରି ପ୍ରୟାସ କରିଛନ୍ତି ମଲ୍ଟି ପ୍ଲେକ୍ସ ମାଲିକ ସଂଘ । PVR, INOX, CINEPOLIC, Cineplex ସମେତ ସମସ୍ତ ବଡ଼ ସିନେମା ଥିଏଟରରେ ଯେକୌଣସି ସୋ'ର ଟିକେଟ ଦର ୭୫ ଟଙ୍କା ରହିବ ବୋଲି ନିଷ୍ପତି ହୋଇଛି । ଖାଲି ମଲ୍ଟି ପ୍ଲେକ୍ସ ନୁହେଁ ସାଧାରଣ ହଲ୍ ବା ଯାହାକୁ ସିଙ୍ଗିଲ ସ୍କ୍ରିନ କୁହାଯାଏ ସେଠି ବି ୭୫ ଟଙ୍କା ରହିବ ଟିକେଟ ମୂଲ୍ୟ ।
Also Read
ସିନେ ପ୍ରେମୀ ସବୁ ବେଳେ ସିନେମା ହଲକୁ ଯାଇ ଫିଲ୍ମ ଦେଖନ୍ତି । ବହୁ ବର୍ଷ ଧରି ଅନେକ ସିନେମା ଦର୍ଶକ ଥିଏଟରରେ ଦେଖୁଛନ୍ତି । ତେଣୁ ଦର୍ଶକଙ୍କୁ ଧନ୍ୟବାଦ ଜଣାଇବାକୁ ହଲ୍ ମାଲିକମାନେ ଏପରି ନିଷ୍ପତି ନେଇଛନ୍ତି । କରୋନା ପରେ ଭାଙ୍ଗି ଯାଇଥିବା ସିନେମା ଶିଳ୍ପ ପୁଣି ଥରେ ଅଣ୍ଟା ସଲଖି ଛିଡ଼ା ହେବାକୁ ଚେଷ୍ଟା କରୁଛି । ପୁଷ୍ପା, RRR, KGF2 ଆଉ ଏବେ ବ୍ରହ୍ମାସ୍ତ୍ର ଭଳି ଫିଲ୍ମ, ହଲକୁ ପୁଣି ଚଳଚଞ୍ଚଳ କରିଛି । ଅନେକ ଲୋକଙ୍କୁ ରୋଜଗାର ଦେଇଛି । ତେଣୁ ଦର୍ଶକଙ୍କୁ ଏଥିପାଇଁ ଧନ୍ୟବାଦ ଜଣାଇ ପ୍ରଥମେ ଆମେରିକାରେ ସେପ୍ଟେମ୍ବର ୩ ତାରିଖକୁ ଜାତୀୟ ସିନେମା ଦିବସ ଭାବେ ପାଳନ କରାଯାଇଛି । ସାଧାରଣତଃ ଆମେରିକାରେ ଟିକେଟ ଦର ୭ ଡଲାର ଥିବା ବେଳେ ଏହାକୁ ୩ ଡଲାରକୁ ଖସାଇ ସେଲିବ୍ରେଟ ହେଇଛି ଜାତୀୟ ସିନେମା ଦିବସ । ଏହାକୁ ଅନୁସରଣ କରି ଭାରତରେ ବି ଏପରି ପାଳନ ହେବ ସିନେମା ଦିବସ ।
ଆସନ୍ତାକାଲି ରିଲିଜ୍ ହେଉଛି ବଲିଉଡର ଦୁଇଟି ଦମଦାର ସିନେମା । ନିକଟରେ ସୀତା ରାମ ଭଳି ବଡ଼ ହିଟ୍ ଦେଇ ପାନ୍ ଇଣ୍ଡିଆରେ ଚର୍ଚ୍ଚାକୁ ଆସିଥିବା ଷ୍ଟାର ଦୁଲକର ସଲମାନ ଓ ସନି ଦେଓଲଙ୍କ କ୍ରାଇମ ସସପେନ୍ସ 'ଚୁପ୍' ଏବଂ ମାଧବନଙ୍କ ଫିଲ୍ମ ‘ଧୋକା’ । ତାସହ ଅନେକ ଆଞ୍ଚଳିକ ଭାଷାର ସିନେମା ବି ରିଲିଜ୍ ହେଉଛି । ମଲ୍ଟି ପ୍ଲେକ୍ସର କିଛି ଆରାମଦାୟକ ଓ ସ୍ଵତନ୍ତ୍ର ସିଟର ଦର କିନ୍ତୁ ପୂର୍ବ ଭଳି ରହିବ । ଏହାବ୍ୟତୀତ ଅନ୍ୟ ସମସ୍ତ ସିଟ୍ ୭୫ ଟଙ୍କାରେ ପାଇ ପାରିବେ ଦର୍ଶକ ।
