ସେଲଫି ହେଲା କାଳ; ନଦୀରେ ବୁଡ଼ିଯାଇ ୩ ଛାତ୍ରଙ୍କ ମୃତ୍ୟୁ

ସେଲଫି ହେଲା କାଳ । ନଦୀରେ ଗାଧୋଉଥିବା ବେଳେ ସେଲଫି ନେବାକୁ ଯାଇ ତିନିଜଣ ଛାତ୍ରଙ୍କ ଜୀବନ ଯାଇଛି । ଗତକାଲି ଜଗତସିଂହପୁର ମାଛଗାଁ ନିକଟ ଦେବୀ ନଦୀ ଘାଟକୁ ଚାରିଜଣ ସାଙ୍ଗ ଗାଧୋଇବାକୁ ଯାଇଥିଲେ ।

ଘାଟରେ ସେଲଫି ନେବା ବେଳେ କାହ୍ନୁ ବାରିକଙ୍କ ଗୋଡ ଖସି ଯାଇଥିଲା । ତାଙ୍କୁ ଉଦ୍ଧାର କରିବାକୁ ଶୁଭମ୍ ପାତ୍ର ଓ ବବୁଲ ବାରିକ ପାଣି ଭିତରକୁ ଯାଇ ଭାସି ଯାଇଥିଲେ । ତିନି ସାଙ୍ଗ ବୁଡି ଯିବାର ଦେଖି ସେଠାରେ ଉପସ୍ଥିତ ଥିବା ତପନ ସାହାଯ୍ୟ ପାଇଁ ଲୋକଙ୍କୁ ଡାକିଥିଲେ ବୋଲି ବାଲିକୁଦା ଥାନା ଆଇଆଇସି ସୂଚନା ଦେଇଛନ୍ତି ।

ତିନି ଛାତ୍ର ବୁଡି ଯାଇଥିବା ଖବର ପାଇ ଅଗ୍ନିଶମ ବାହିନୀ ଓ ଓଡ୍ରାଫ୍ ଟିମ୍ ଘଟଣାସ୍ଥଳରେ ପହଞ୍ଚି ଖୋଜାଖୋଜି କରିଥିଲେ । ଖୋଜାଖୋଜି ପରେ ଗତକାଲି ଦୁଇଜଣଙ୍କ ମୃତଦେହ ଉଦ୍ଧାର ହୋଇଥିଲା । ଆଜି ସକାଳୁ ଆଉ ଜଣଙ୍କ ମୃତଦେହ ଉଦ୍ଧାର ହୋଇଛି । ତିନି ଛାତ୍ରଙ୍କ ମୃତଦେହ ଉଦ୍ଧାର ହେବା ପରେ ଘଟଣାସ୍ଥଳରେ ଶୋକାକୁଳ ପରିବେଶ ସୃଷ୍ଟି ହୋଇଛି ।