ଶେଷ ହୋଇଛି ପ୍ରଧାନମନ୍ତ୍ରୀ ମୋଦିଙ୍କ ୨ ଦିନିଆ ଫ୍ରାନ୍ସ ଗସ୍ତ। ଗତକାଲି ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରନଙ୍କ ସହ ରାତ୍ରୀଭୋଜନ କରିବା ପରେ AI ସମ୍ମିଟରେ ଯୋଗ ଦେଇଥିଲେ। ଯେଉଁଥିରେ ବିଶ୍ବର ଅନେକ ବଡ଼ ବଡ଼ ଦେଶର ପ୍ରତିନିଧିଙ୍କ ସମେତ ଟେକ୍ନୋଲୋଜି ଦୁନିଆ ସହ ଜଡ଼ିତ ବିଶିଷ୍ଟ ବ୍ୟକ୍ତି ସାମିଲ ହୋଇଥିଲେ । ଏହା ପରେ ପ୍ରଧାନମନ୍ତ୍ରୀ ଓ ଗୁଗୁଲ୍ ସିଇଓ ସୁନ୍ଦର ପିଚାଇଙ୍କ ଆଲୋଚନା ମଧ୍ୟ ହୋଇଛି। ଉଭୟ ଅନେକ ଗୁରୁତ୍ୱପୂର୍ଣ୍ଣ ଦିଗ ଉପରେ ଆଲୋଚନା କରିଛନ୍ତି। ଦେଶର ଡିଜିଟାଲ ପରିବର୍ତ୍ତନକୁ ଆଗକୁ ବଢ଼ାଇବା ପାଇଁ ଗୁଗୁଲ ଏବଂ ଭାରତ ମଧ୍ୟରେ ଗଭୀର ସହଯୋଗ ନେଇ ବୈଠକରେ ଆଲୋଚନା ହୋଇଛି।
ଏଆଇ ଆକ୍ସନ ଶିଖର ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ସାକ୍ଷାତ କରିବା ପରେ ସୁନ୍ଦର ପିଚାଇ କହିଛନ୍ତି, 'ଏଆଇ ଭାରତ ପାଇଁ ଅବିଶ୍ୱସନୀୟ ସୁଯୋଗ ଆଣିଛି। AI ଆକ୍ସନ୍ ଶିଖର ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ସାକ୍ଷାତ କରି ଖୁସି ଲାଗିଲା। ଆମେ ଭାରତରେ AI ଆଣିଥିବା ଅବିଶ୍ୱସନୀୟ ସୁଯୋଗ ଏବଂ ଭାରତର ଡିଜିଟାଲ୍ ପରିବର୍ତ୍ତନ ପାଇଁ ଆମେ ଏକାଠି କାମ କରିପାରିବା ଉପାୟ ନେଇ ଆଲୋଚନା କରିଛୁ"।
ଏଆଇ ଆକ୍ସନ୍ ଶିଖର ସମ୍ମିଳନୀ ପୂର୍ବରୁ, ପ୍ରଧାନମନ୍ତ୍ରୀ ମୋଦି ପ୍ୟାରିସରେ ଭାରତ-ଫ୍ରାନ୍ସ ସିଇଓ ଫୋରମକୁ ସମ୍ବୋଧିତ କରି କହିଥିଲେ ଯେ ଏହି ପ୍ଲାଟଫର୍ମ ଆର୍ଥିକ ସମ୍ପର୍କକୁ ସୁଦୃଢ଼ କରିବା ଏବଂ ନବସୃଜନକୁ ପ୍ରୋତ୍ସାହିତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ। ସେ ଏହା ମଧ୍ୟ କହିଥିଲେ ଯେ ଭାରତ ଏବଂ ଫ୍ରାନ୍ସର ବ୍ୟବସାୟ ନେତାମାନେ ପ୍ରମୁଖ କ୍ଷେତ୍ରଗୁଡ଼ିକରେ ନୂତନ ସୁଯୋଗ ସୃଷ୍ଟି କରିବା ପାଇଁ ଏକାଠି ହେଉଛନ୍ତି। ଯାହା ଭବିଷ୍ୟତ ପିଢ଼ି ପାଇଁ ଅଭିବୃଦ୍ଧି ଏବଂ ନିବେଶକୁ ପ୍ରେରଣା ଦେବ ବୋଲି ତାଙ୍କର ବିଶ୍ୱାସ।
ଏହି କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ମୋଦି କହିଥିଲେ, "ଏହା କେବଳ ଏକ ବ୍ୟବସାୟିକ କାର୍ଯ୍ୟକ୍ରମ ନୁହେଁ, ଏହା ଭାରତ ଏବଂ ଫ୍ରାନ୍ସର ଉଜ୍ଜ୍ୱଳ ମନର ଏକ ସଙ୍ଗମ। ଆପଣ ନବସୃଜନ, ସହଯୋଗ ଏବଂ ପୁନର୍ଜନ୍ମର ମନ୍ତ୍ରକୁ ଗ୍ରହଣ କରୁଛନ୍ତି, ଉଦ୍ଦେଶ୍ୟ ସହିତ ଅଗ୍ରଗତି କରୁଛନ୍ତି। ବୋର୍ଡରୁମ୍ ସଂଯୋଗ ନିର୍ମାଣ କରିବା ବ୍ୟତୀତ, ଆପଣ ଭାରତ ଏବଂ ଫ୍ରାନ୍ସ ମଧ୍ୟରେ ରଣନୈତିକ ସହଭାଗୀତାକୁ ସକ୍ରିୟ ଭାବରେ ମଜବୁତ କରୁଛନ୍ତି।"
ପଢନ୍ତୁ ଏହି ଖବର: ଆପଣ କେତେ ଦିନ ବଞ୍ଚିବେ? AI କହିଦେବ ମୃତ୍ୟୁ ସମୟ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କ ଅଭିଭାଷଣରେ ଆହୁରି କହିଥିଲେ ଯେ ଭାରତ ଏବଂ ଫ୍ରାନ୍ସ ଗଭୀର ବିଶ୍ୱାସ ଏବଂ ସମାନ ମୂଲ୍ୟବୋଧ ବାଣ୍ଟିଛନ୍ତି। ଭାରତ ଏବଂ ଫ୍ରାନ୍ସ କେବଳ ଗଣତାନ୍ତ୍ରିକ ମୂଲ୍ୟବୋଧ ଦ୍ୱାରା ଜଡିତ ନୁହେଁ। ଗଭୀର ବିଶ୍ୱାସ, ନବସୃଜନ ଏବଂ ଲୋକଙ୍କ ପ୍ରତି ସେବା ଆମର ବନ୍ଧୁତାର ସ୍ତମ୍ଭ। ଆମର ସମ୍ପର୍କ କେବଳ ଆମ ଦୁଇ ଦେଶ ପର୍ଯ୍ୟନ୍ତ ସୀମିତ ନୁହେଁ। ଏକାଠି, ଆମେ ବିଶ୍ୱ ସମସ୍ୟାର ସମାଧାନ ପ୍ରଦାନ କରୁଛୁ।
ପ୍ରଧାନମନ୍ତ୍ରୀ ମୋଦି ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରନଙ୍କ ସହ ଏଆଇ ଆକ୍ସନ ଶିଖର ସମ୍ମିଳନୀରେ ସହ-ଅଧ୍ୟକ୍ଷତା କରିଥିଲେ। ସପ୍ତାହବ୍ୟାପୀ ଏହି ଶିଖର ସମ୍ମିଳନୀ ବିଶ୍ୱ ନେତା, ନୀତି ନିର୍ଦ୍ଧାରକ ଏବଂ ଶିଳ୍ପ ବିଶେଷଜ୍ଞଙ୍କ ଯୋଗଦାନ ସହିତ ଶେଷ ହୋଇଥିଲା, ଯେଉଁଥିରେ ଭାରତ ଏବଂ ଫ୍ରାନ୍ସ ମଧ୍ୟରେ ପ୍ରଯୁକ୍ତିବିଦ୍ୟା ଏବଂ ନବସୃଜନ କ୍ଷେତ୍ରରେ ବୃଦ୍ଧି ପାଉଥିବା ସହଯୋଗ ଉପରେ ଆଲୋକପାତ କରାଯାଇଥିଲା।
ଦୁଇଦିନିଆ ପ୍ୟାରିସ ଗସ୍ତ ଶେଷ କରିବା ପରେ ପ୍ରଧାନମନ୍ତ୍ରୀ ଆଜି ରାତିରେ ଆମେରିକା ଅଭିମୁଖେ ଯାତ୍ରା କରିବେ । ସେଠାରେ ସେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ସାକ୍ଷାତ କରିବେ । ୨୦୨୪ ରେ ମୋଦି ପ୍ରଧାନମନ୍ତ୍ରୀ ଭାବେ ଓ ଟ୍ରମ୍ପ ଆମେରିକାର ରାଷ୍ଟ୍ରପତି ଭାବେ ନିର୍ବାଚିତ ହେବା ପରେ ଉଭୟ ରାଷ୍ଟ୍ରମୁଖ୍ୟଙ୍କ ମଧ୍ୟରେ ଏହା ପ୍ରଥମ ଭେଟଘାଟ୍ । ଉଭୟ ଦେଶର ମିଳିତ ପ୍ରସଙ୍ଗ ସହ ବୈଶ୍ବିକ ପ୍ରସଙ୍ଗରେ ମଧ୍ୟ ଉଭୟଙ୍କ ମଧ୍ୟରେ ଆଲୋଚନା ହେବ । ଟ୍ରମ୍ପଙ୍କ ଆକ୍ରମଣାତ୍ମକ ବାଣିଜ୍ୟ ଓ ଇମିଗ୍ରେସନ ନୀତି ମଧ୍ଯରେ ସାରା ବିଶ୍ବ ଭୟଭୀତ ଥିବା ବେଳେ ମୋଦିଙ୍କର ଏହି ଗସ୍ତ ଭୂ-ରାଜନୈତିକ ସ୍ଥିତିରେ ବେଶ ଗୁରୁତ୍ବପୂର୍ଣ୍ଣ ବିଚାର କରାଯାଉଛି ।