S Jaishankar: ଚୀନ୍ ଉପରାଷ୍ଟ୍ରପତିଙ୍କୁ ଭେଟିଲେ ବୈଦେଶିକ ମନ୍ତ୍ରୀ; କହିଲେ ଦ୍ୱିପାକ୍ଷିକ ସମ୍ପର୍କ ସୁଧାର ହେଲେ ଉଭୟ ଦେଶ ପାଇଁ ଲାଭଦାୟକ

ଚାଇନାରେ ସାଂଘାଇ କୋପରେସନ ଅର୍ଗାନାଇଜେସନ (ଏସସିଓ) ବୈଠକରେ ଯୋଗ ଦେବା ପାଇଁ ଚୀନ୍ ଗସ୍ତରେ ଅଛନ୍ତି ବୈଦେଶିକ ମନ୍ତ୍ରୀ ଏସ ଜୟଶଙ୍କର । ଏହି ଅବସରରେ ଚାଇନାର ଉପରାଷ୍ଟ୍ରପତି ହାନ ଝେଙ୍ଗଙ୍କୁ ଭେଟିଛନ୍ତି ଜୟଶଙ୍କର । ସାମ୍ପ୍ରତିକ ବିଶ୍ୱ ପରିସ୍ଥିତିକୁ ନେଇ ସେ ଦୁଇ ଦେଶ ମଧ୍ୟରେ ଖୋଲା ଆଲୋଚନା କରିବା ପାଇଁ ଆହ୍ୱାନ କରିଛନ୍ତି । ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ସମ୍ପର୍କରେ ଉନ୍ନତି ଆସିବ ବୋଲି ଜୟଶଙ୍କର ଆଶା ବ୍ୟକ୍ତ କରିଛନ୍ତି । 

ଏହି ବୈଠକ ସମ୍ପର୍କରେ ଏସ୍ ଜୟଶଙ୍କର ଏକ୍ସରେ କହିଛନ୍ତି, “ଏସସିଓ ବୈଦେଶିକ ମନ୍ତ୍ରୀଙ୍କ ବୈଠକରେ ଚାଇନାର ଉପରାଷ୍ଟ୍ରପତି ହାନ ଝେଙ୍ଗଙ୍କୁ ଭେଟି ଖୁସି ଅନୁଭବ କରୁଛି । ଏସସିଓରେ ଚାଇନାର ସଭାପତିତ୍ୱ ନେଇ ଭାରତ ପୂର୍ଣ୍ଣ ସମର୍ଥନ କରୁଛି । ଗତ ବର୍ଷ ଅକ୍ଟୋବରରେ କାଜାନରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଚାଇନାର ରାଷ୍ଟ୍ରପତି ସି ଜିନପିଙ୍ଗଙ୍କ ମଧ୍ୟରେ ଭେଟ ହେବା ପରେ ଉଭୟ ଦେଶର ସମ୍ପର୍କରେ ସୁଧାର ଆସିଛି । ଏହା ସହିତ ତାଙ୍କର ଚାଇନା ଗସ୍ତ ମଧ୍ୟ ସକରାତ୍ମକ ରହିବ ।”

ଏତଦ୍‌ବ୍ୟତୀତ, ଜୟଶଙ୍କର ଆହୁରି ମଧ୍ୟ କହିଛନ୍ତି ଯେ, “ଚଳିତ ବର୍ଷ ଆମେ ଚାଇନା ସହିତ କୂଟନୈତିକ ସମ୍ପର୍କର ୭୫ତମ ବାର୍ଷିକୀ ପାଳନ କରୁଛି । କୈଳାସ ମାନସରୋବର ଯାତ୍ରା ପୁଣି ଆରମ୍ଭ ହୋଇଥିବାରୁ ଭାରତୀୟମାନେ ଖୁସିବ୍ୟକ୍ତ କରିଛନ୍ତି । ଉଭୟ ଦେଶ ମଧ୍ୟରେ ସମ୍ପର୍କ ସ୍ୱାଭାବିକ ରହିବା ଦ୍ୱାରା ପରସ୍ପର ପାଇଁ ଲାଭଦାୟକ ହେବ । ଦୁଇ ପଡୋଶୀ ଦେଶ ନିଜର ଦୃଷ୍ଟିକୋଣର ଖୋଲା ଆଦାନପ୍ରଦାନ କରିବା ଉଚିତ୍ ।”

ଅଧିକ ପଢନ୍ତୁ: ରେଡ୍ ରିଭର ଉପରୁ ଭଙ୍ଗାଗଲା ୩୦୦ ଡ୍ୟାମ; ୩୪୨ ହାଇଡ୍ରୋପାୱାର ଷ୍ଟେସନର କାର୍ଯ୍ୟକ୍ଷମ ବନ୍ଦ