Advisory for Indian Nationals: ଭାରତୀୟଙ୍କୁ ଉଦ୍ଧାର ପାଇଁ ଉଦ୍ୟମ:୨୪ ଘଣ୍ଟିଆ କଣ୍ଟ୍ରୋଲ୍‌ ରୁମ୍‌ ଗଠନ କଲା ବୈଦେଶିକ ମନ୍ତ୍ରାଳୟ

ଦିନକୁ ଦିନ ଭୟଙ୍କର ରୂପ ନେଉଛି ଇସ୍ରାଏଲ ଓ ଇରାନ ଯୁଦ୍ଧ । ଉଭୟ ଦେଶ ମଧ୍ୟରେ ସଂଘର୍ଷ ଆଜି ପଞ୍ଚମ ଦିନରେ ପହଞ୍ଚିଛି । ଇରାନ ଉପରେ ଘନଘନ ଏୟାର ଷ୍ଟ୍ରାଇକ କରିଛି ଇସ୍ରାଏଲ । ଇସ୍ରାଏଲର ମଧ୍ୟ ଦୃଢ ଜବାବ ଦେଉଛି ଇରାନ । ଉଭୟ ଦେଶ ପକ୍ଷରୁ ଆକ୍ରମଣ ଜୋରଦାର ହେଉଛି। ଏଯାବତ୍ ଇସ୍ରାଏଲର ଆକ୍ରମଣରେ ୨୨୪ ଜଣଙ୍କ ମୃତ୍ୟୁ ହୋଇଥିବା ବେଳେ ୧୨୦୦ରୁ ଅଧିକ ଲୋକ ଆହତ ହୋଇଛନ୍ତି । ସେହିପରି ଇସ୍ରାଏଲ ଉପରେ ଇରାନର ଆକ୍ରମଣରେ ଇସ୍ରାଏଲରେ ୨୪ ଜଣଙ୍କ ମୃତ୍ୟୁ ଘଟିଛି । ସେପଟେ ଇସ୍ରାଏଲ ଇରାନର ରାଜଧାନୀ ତେହେରାନର ବିଭିନ୍ନ ସ୍ଥାନରେ ରହୁଥିବା ଲୋକମାନଙ୍କୁ ତୁରନ୍ତ ସୁରକ୍ଷିତ ସ୍ଥାନକୁ ଚାଲିଯିବା ପାଇଁ ସତର୍କ ସୂଚନା ଜାରି କରିଥିବା ବେଳେ ଆଜି ଭାରତୀୟ ଦୂତାବାସ ପକ୍ଷରୁ ତେହରାନରେ ରହୁଥିବା ଭାରତୀୟ ନାଗରିକଙ୍କୁ ଆଡଭାଇଜରୀ ଜାରି କରାଯାଇଛି ।

ଅଧିକ ପଢନ୍ତୁ: ନ୍ୟୁକ୍ଲିୟର୍ ଡିଲ୍ ସାଇନ୍ ନକରି, ବଡ଼ ଭୁଲ କରିଛି ଇରାନ: ଟ୍ରମ୍ପ

ସମ୍ଭବ ହେଲେ ତୁରନ୍ତ ତେହରାନ ଛାଡି ବାହାରକୁ ଚାଲି ଯାଆନ୍ତୁ ବୋଲି ଭାରତୀୟ ଦୂତାବାସ କହିଛି । ଭାରତୀୟଙ୍କୁ ଉଦ୍ଧାର ପାଇଁ ଉଦ୍ୟମ ଆରମ୍ଭ ହୋଇଛି । ଏଥିପାଇଁ ଏକ ୨୪ ଘଣ୍ଟିଆ କଣ୍ଟ୍ରୋଲ୍ ରୁମ୍ ଗଠନ କରିଛି ବୈଦେଶିକ ମନ୍ତ୍ରାଳୟ । ଏହା ସହ ଜରୁରୀକାଳୀନ ହେଲ୍ପଲାଇନ ନମ୍ବର ଜାରି କରାଯାଇଛି । ଭାରତର ବୈଦେଶିକ ମନ୍ତ୍ରାଳୟ ପକ୍ଷରୁ ଟୋଲ ଫ୍ରି ନମ୍ବର 1800118797 ଜାରି କରାଯାଇଥିବା ବେଳେ ତିନୋଟି ଲ୍ୟାଣ୍ଡଲାଇନ ନମ୍ବର +91-11-2301 2113, +91-11-2301 4104 ଏବଂ +91-11-2301 7905 ଜାରି କରାଯାଇଛି । ଏକ ହ୍ୱାଟସଆପ୍ ନମ୍ବର +91-99682 91988 ଏବଂ ଇମେଲ ଆଇଡି situationroom@mea.gov.in ଜାରି କରାଯାଇଛି ।

ସେହିପରି ଇରାନରେ ଥିବା ଭାରତୀୟ ନାଗରିକଙ୍କୁ ସହାୟତା କରିବା ଉଦ୍ଦେଶ୍ୟରେ ଭାରତୀୟ ଦୂତାବାସ ପକ୍ଷରୁ ୨୪ ଘଣ୍ଟିଆ ଜରୁରୀକାଳୀନ ନମ୍ବର ଜାରି କରାଯାଇଛି । ଫୋନ କରିବା ପାଇଁ +98 91281 09115 ଏବଂ +98 91281 09109 ନମ୍ବର ଦିଆଯାଇଛି । ହ୍ୱାଟ୍ସଆପ ପାଇଁ +98 90104 45557, +98 90159 93320 ଏବଂ +91 80868 71709 ନମ୍ବର ଦିଆଯାଇଛି । ଆଞ୍ଚଳିକ ସ୍ତରରେ ଯୋଗାଯୋଗ କରିବା ପାଇଁ ନମ୍ବର ଦିଆଯାଇଛି । ବନ୍ଦର ଆବାସରେ +98 91776 99036 ଏବଂ ଜାହେଦାନରେ +98 93963 56649 ନମ୍ବର ସହିତ ଯୋଗାଯୋଗ କରିବା ପାଇଁ ପରାମର୍ଶ ଦିଆଯାଇଛି । cons.tehran@mea.gov.in ଇମେଲ ମାଧ୍ୟମରେ ମଧ୍ୟ ଦୂତାବାସ ସହିତ ଯୋଗାଯୋଗ କରାଯାଇପାରିବ।

ଅନ୍ୟପଟେ ଆଜି ଇରାନରୁ ଆର୍ମେନିଆକୁ ୧୧୦ ଛାତ୍ରଙ୍କୁ ଉଦ୍ଧାର କରି ଅଣାଯାଇଛି । ଇରାନର ଆକାଶପଥ ବନ୍ଦ ଥିବାରୁ ସେମାନଙ୍କୁ ସ୍ଥାଳପଥରେ ଇରାନ ଛାଡିବାକୁ ପଡିଥିଲା । ଆସନ୍ତାକାଲି ସେମାନଙ୍କୁ ଭାରତ ଫେରାଇ ଅଣାଯିବ । ସୂଚନାଯୋଗ୍ୟ, ଇରାନରେ ଫସି ରହିଥିବା ୧୦ ହଜାରରୁ ଅଧିକ ଭାରତୀୟ ଛାତ୍ରଛାତ୍ରୀଙ୍କୁ ସ୍ଥାନାନ୍ତର ପାଇଁ ସୁରକ୍ଷିତ ରାସ୍ତା ଯୋଗାଇ ଦେବାକୁ ନୂଆଦିଲ୍ଲୀ ଅନୁରୋଧ କରିଥିବା ବେଳେ ଇରାନ କହିଥିଲା ଯେ, ଯେହେତୁ, ଇରାନ ତାର ଆକାଶପଥ ବନ୍ଦ କରିଛି, ତେଣୁ ଛାତ୍ରଛାତ୍ରୀମାନେ ସ୍ଥଳପଥ ଦେଇ ଆଜରବାଇଜାନ, ତୁର୍କମେନିସ୍ତାନ ଓ ଆଫଗାନିସ୍ତାନରେ ପ୍ରବେଶ କରିପାରିବେ ।

ଅଧିକ ପଢନ୍ତୁ: ଖବର ପ୍ରସାରଣ ବେଳେ ଷ୍ଟୁଡିଓ ଉପରେ ହମଲା; ଚାଲିଥିଲା ଲାଇଭ୍ ନ୍ୟୁଜ୍, ପଡ଼ିଲା ମିଜାଇଲ୍