Lord Jagannath: ଜଗନ୍ନାଥଙ୍କ ପ୍ରତିଛବି ଥିବା ପାପୋଛକୁ ହଟାଇଲା ଚୀନର ଇ-କମର୍ସ ପ୍ଲାଟଫର୍ମ

ଭାରତର ଆରାଧ୍ୟ ଦେବତାଙ୍କୁ ତଳେ ପକାଇ ଟଙ୍କା ରୋଜଗାର କରିବାକୁ ଚାହୁଁଥିଲା ଚୀନ୍‌ର ଇ-କମର୍ସ ପ୍ଲାଟଫର୍ମ ଅଲିଏକ୍ସପ୍ରେସ୍। ହେଲେ ଭାରତରେ ପ୍ରବଳ ବିରୋଧର ସାମନା କରିବା ପରେ ପଛକୁ ହଟିଲା ଚାଇନା ପ୍ଲାଟଫର୍ମ। ଭାରତରେ ବ୍ୟାପକ ଆକ୍ରୋଶ ସୃଷ୍ଟି ହେବା ପରେ ମହାପ୍ରଭୁ ଶ୍ରୀ ଜଗନ୍ନାଥଙ୍କ ପବିତ୍ର ଛବି ଥିବା ଏକ ପାପୋଛ ହଟାଇ ଦେଇଛି ଚୀନର ଇ-କମର୍ସ ପ୍ଲାଟଫର୍ମ।

“ଲର୍ଡ ଜଗନ୍ନାଥ ମଣ୍ଡଳା ଆର୍ଟ ମ୍ୟାଟ୍‌ ଡୋରୱେ” ନାମକ ଏହି ଉତ୍ପାଦର ମୂଲ୍ୟ ଥିଲା ୭୮୭.୬୫ ଟଙ୍କା ଏବଂ ଏଥିରେ ହିନ୍ଦୁଧର୍ମରେ, ବିଶେଷତଃ ଓଡ଼ିଶାର ଆରାଧ୍ୟ ଦେବତା ଜଗନ୍ନାଥଙ୍କ ଛବି ଚିତ୍ରଣ କରାଯାଥିବା ଏହି ମ୍ୟାଟ୍‌ ଉପରେ ଜଣେ ମଡେଲ ଠିଆ ହୋଇଥିବା ଦେଖାଯାଇଥିଲା।

ପ୍ଲାଟଫର୍ମରେ ଥିବା ଏହି ଡୋରମ୍ୟାଟର ତାଲିକାକୁ ଅପମାନଜନକ ଏବଂ ଅସମ୍ମାନଜନକ ଭାବେ ବିବେଚନା କରାଯାଇ ଏହାକୁ କଡା ନିନ୍ଦା କରିଥିଲେ ରାଜନୀତିଜ୍ଞ, କଳାକାର ଏବଂ ସାମାଜିକ ଗଣମାଧ୍ୟମ ବ୍ୟବହାରକାରୀ।

ବିଜୁ ଜନତା ଦଳ (ବିଜେଡି)ର ରାଷ୍ଟ୍ରୀୟ ମୁଖପାତ୍ର ତଥା ସାଂସଦ ଅମର ପଟ୍ଟନାୟକ ସାମାଜିକ ଗଣମାଧ୍ୟମରେ ଏହାକୁ ତୀବ୍ର ନିନ୍ଦା କରିଥିଲେ। “ଅଲିଏକ୍ସପ୍ରେସ୍ ରେ ଭଗବାନ ଜଗନ୍ନାଥଙ୍କ ପବିତ୍ର ଛବି ବିଶିଷ୍ଟ ଡୋରମ୍ୟାଟ୍‌ ବିକ୍ରି କରାଯାଉଥିବା ଏହି ଘୃଣ୍ୟ କାର୍ଯ୍ୟକୁ ମୁଁ ତୀବ୍ର ନିନ୍ଦା କରୁଛି! ଏହି ଅପମାନ ଲକ୍ଷ ଲକ୍ଷ ଭକ୍ତଙ୍କ ଗଭୀର ଭାବନାକୁ ଆଘାତ କରିଛି। ଏହି ସାଂଘାତିକ ଭୁଲକୁ ସଂଶୋଧନ କରିବା ଆବଶ୍ୟକ,” ବୋଲି ସେ ଟ୍ୱିଟ୍‌ କରିଥିଲେ।

ଓଡିଶାର ପ୍ରସିଦ୍ଧ ବାଲୁକାଶିଳ୍ପୀ ସୁଦର୍ଶନ ପଟ୍ଟନାୟକ ମଧ୍ୟ ଏହି ପ୍ଲାଟଫର୍ମକୁ ନିନ୍ଦା କରି ସାମୁହିକ ପଦକ୍ଷେପ ପାଇଁ ଆହ୍ୱାନ ଦେଇଥିଲେ। “ଜୟ ଜଗନ୍ନାଥ। ଆମେ ବିଶ୍ୱବ୍ୟାପୀ ସମସ୍ତ ଭକ୍ତଙ୍କୁ ଏହି ଅଗ୍ରହଣୀୟ କାର୍ଯ୍ୟ ବିରୁଦ୍ଧରେ ସ୍ୱର ଉଠାଇବାକୁ ଅପିଲ କରୁଛୁ। ଅଲିଏକ୍ସପ୍ରେସ୍ ଦ୍ୱାରା ବିକ୍ରି ହେଉଥିବା ମହାପ୍ରଭୁ ଜଗନ୍ନାଥଙ୍କ ପବିତ୍ର ଛବି ବିଶିଷ୍ଟ ଡୋରମ୍ୟାଟ୍‌ ଅତ୍ୟନ୍ତ ଅପମାନଜନକ। ଏହାକୁ ହଟାଅ, କ୍ଷମା ମାଗ ଏବଂ ଏହା ପୁନରାବୃତ୍ତି ନ ହେବା ନିଶ୍ଚିତ କର,” ସେ ପୋଷ୍ଟ କରିଥିଲେ।

ଏହାର ପ୍ରତିକ୍ରିୟାରେ ଅଲିଏକ୍ସପ୍ରେସ୍ ଜନସାଧାରଣଙ୍କ ଆକ୍ରୋଶ ପରେ ପ୍ରତିକ୍ରିୟା ଦେଇଥିଲା। ଏକ୍ସରେ ଏକ ପୋଷ୍ଟରେ ପ୍ଲାଟଫର୍ମ କହିଛି: “ଆପଣଙ୍କ ମତାମତ ପାଇଁ ଧନ୍ୟବାଦ। ଆମେ ରିପୋର୍ଟ ହୋଇଥିବା ଜିନିଷଟିକୁ ସମୀକ୍ଷା କରି ହଟାଇ ଦେଇଛୁ ବୋଲି କହିଛି। ଅଲିଏକ୍ସପ୍ରେସ୍ ଚୀନ୍‌ରେ ଅବସ୍ଥିତ ଏକ ଅନଲାଇନ ରିଟେଲ ସେବା ଏବଂ ଏହା ଆଲିବାବା ଗ୍ରୁପ୍‌ ମାଲିକାନାରେ ଅଛି।

ଅଧିକ ପଢ଼ନ୍ତୁ: ABCD ଶିଖିବା ପାଇଁ ୨.୫ ଲକ୍ଷ! ସ୍କୁଲରେ ନର୍ସରୀ ଫି ଦେଖି ଚିନ୍ତାରେ ବାପା ମାଆ