LIVE TV
ମୌନୀ ଅମାବାସ୍ୟା ଶାହି ସ୍ନାନ ପାଇଁ ଉଛୁଳୁଛି ପ୍ରୟାଗରାଜ ମହାକୁମ୍ଭ । ତ୍ରିବେଣୀ ସଂଗମରେ କୋଟି କୋଟି ସାଧୁସନ୍ଥ ଓ ଶ୍ରଦ୍ଧାଳୁଙ୍କ ଅମୃତ ସ୍ନାନ ଜାରି ରହିଛି । ଏବେ ସୁଦ୍ଧା ବୁଡ଼ ପକାଇଲେଣି ୬ କୋଟିରୁ ଅଧିକ ଶ୍ରଦ୍ଧାଳୁ । ତେବେ ବ୍ରାହ୍ମ ମୁହୂର୍ତ୍ତରେ ଶାହିସ୍ନାନର ଦୁର୍ବାର ଇଚ୍ଛା ଭିତରେ ଗତରାତିରେ ଉପୁଜିଥିଲା ଦଳାଚକଟା ଭଳି ସ୍ଥିତି । ଏଥିରେ ୩୦ ଜଣଙ୍କ ମୃତ୍ୟୁ ଘଟିଥିବା ଏବଂ ୬୦ ଜଣ ଆହତ ହୋଇଥିବା ସୂଚନା ମିଳିଛି । ତେବେ ବର୍ତ୍ତମାନ ସ୍ଥିତି ନିୟନ୍ତ୍ରଣାଧୀନ ଥିବା କହିଛନ୍ତି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ । ସେପଟେ ଏହାକୁ ଅତ୍ୟନ୍ତ ଦୁଃଖଦ ଘଟଣା ବୋଲି କହିବା ସହ ମୃତାହତଙ୍କ ପରିବାରକୁ ସମବେଦନା ଜଣାଇଛନ୍ତି ପ୍ରଧାନମନ୍ତ୍ରୀ ମୋଦି ।
Also Read
ଅସମ୍ଭବ ଭିଡ଼... ଅସମ୍ଭାଳ ଭିଡ଼... ମହାକୁମ୍ଭରେ ମୌନୀ ଅମାବାସ୍ୟା ଶାହି ସ୍ନାନ ପାଇଁ ମଙ୍ଗଳବାର ରାତିରୁ ସଙ୍ଗମ କ୍ଷେତ୍ରକୁ ଛୁଟିଥିଲା ଶ୍ରଦ୍ଧାଳୁଙ୍କ ସୁଅ । ବଡ଼ ବଡ଼ ଶୋଭାଯାତ୍ରା କରି ପହଞ୍ଚିଥିଲେ ବିଭିନ୍ନ ଆଖଡ଼ାର ସାଧୁସନ୍ଥ । ରାତି ଗୋଟାଏରୁ ୨ଟା ଭିତରେ ଆଖଡ଼ା ମାର୍ଗ ବ୍ୟାରିକେଡ୍ ଭାଙ୍ଗି ତ୍ରିବେଣୀ ସଙ୍ଗମ ଘାଟରେ ବୁଡ଼ ପକାଇବାକୁ ମାଡ଼ିଯାଇଥିଲେ ଲୋକେ । ଦଳାଚକଟା ଭଳି ସ୍ଥିତିରେ ମୃତାହତଙ୍କ ସଂଖ୍ୟା ସ୍ପଷ୍ଟ ହୋଇନଥିବା ବେଳେ, ଅନେକ ବିପନ୍ନଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ମହାକୁମ୍ଭ ସ୍ବାସ୍ଥ୍ୟକେନ୍ଦ୍ରକୁ ନିଆଯାଉଥିବା ଦେଖିବାକୁ ମିଳିଥିଲା ।
ଅଧିକ ପଢ଼ନ୍ତୁ: ମହାକୁମ୍ଭ ପାଇଁ ବିମାନ ଭଡ଼ା ଆକାଶ ଛୁଆଁ; ଚିନ୍ତାରେ ଯାତ୍ରୀ, ଜାଣନ୍ତୁ ଭୁବନେଶ୍ବରରୁ କେତେ ଅଛି ଦର...
ଉତ୍ତରରେ ଗଙ୍ଗା, ଦକ୍ଷିଣରେ ଯମୁନା ଓ ରହସ୍ୟମୟୀ ସରସ୍ବତୀର ମିଳନସ୍ଥଳରେ ରହିଛି ତ୍ରିକୋଣଭୂମି 'ସଙ୍ଗମ ନୋଜ୍' । ଘଣ୍ଟାପ୍ରତି ପ୍ରାୟ ୨ ଲକ୍ଷ ଲୋକ ଯେପରି ସଙ୍ଗମ ନୋଜରେ ବୁଡ଼ ପକାଇପାରିବେ, ସେଥିପାଇଁ ଏହି ଜାଗାକୁ ଆହୁରି ୨୬ ହେକ୍ଟର ବଢ଼ାଇଛନ୍ତି ୟୁପି ସରକାର । ତଥାପି ଏହା ମଧ୍ୟ ନିଅଣ୍ଟ ପଡ଼ିଗଲା ଜନସମୁଦ୍ର ଆଗରେ । ମହାକୁମ୍ଭରେ ଅନ୍ୟାନ୍ୟ ସ୍ଥାୟୀ ଓ ଅସ୍ଥାୟୀ ଘାଟ ଥିଲେ ମଧ୍ୟ, ତ୍ରିବେଣୀ ସଂଗମରେ ବ୍ରାହ୍ମ ମୁହୂର୍ତ୍ତରେ ଶାହିସ୍ନାନ କରିବାର ଦୁର୍ବାର ଆଶା, ଏହି ଦଳାଚକଟା ସ୍ଥିତିର କାରଣ ବୋଲି କୁହାଯାଉଛି ।
ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସ୍ଥିତି ସମୀକ୍ଷା କରିବା ସହ, ଏବେ ଏହା ନିୟନ୍ତ୍ରଣାଧୀନ ଅଛି ବୋଲି କହିଛନ୍ତି । କୌଣସି ଗୁଜବରେ ବିଶ୍ବାସ ନକରିବାକୁ ଏବଂ ଶ୍ରଦ୍ଧାଳୁଙ୍କୁ ନିକଟସ୍ଥ ଘାଟରେ ସ୍ନାନ କରିବାକୁ ନିବେଦନ କରିଛନ୍ତି ଯୋଗୀ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କ ସହ କଥା ହେବା ସହ ଘଟଣାକୁ ଦୁଃଖଦ ବୋଲି କହିଛନ୍ତି । ଏଥିସହ ଦିଲ୍ଲୀ ନିର୍ବାଚନୀ ରାଲିରେ ଉଦବୋଧନ ବେଳେ ଶୋକ ପ୍ରକାଶ କରିଛନ୍ତି ପ୍ରଧାନମନ୍ତ୍ରୀ ।
ଅଘଟଣ ପରେ, ଭକ୍ତଙ୍କ ପ୍ରବଳ ଭିଡ଼କୁ ଦେଖି ଆଖଡ଼ା ପରିଷଦ ପକ୍ଷରୁ ଆଜିର ଶାହି ସ୍ନାନକୁ ସାମୟିକ ବାତିଲ କରାଯାଇଥିଲା । ପ୍ରଥମେ ବୁଡ଼ ପକାଇଥିଲେ ଅଗଣିତ ଶ୍ରଦ୍ଧାଳୁ । ତେବେ ଦିନ ବଢ଼ିବା ସହ ଗହଳି ହ୍ରାସ ପାଇବାରୁ ପୁଣି ବିଭିନ୍ନ ଆଖଡ଼ା ପକ୍ଷରୁ ଅମୃତ ସ୍ନାନ ଆରମ୍ଭ ହୋଇଛି । ବଡ଼ ଶୋଭାଯାତ୍ରା ନକରି, ବିଭିନ୍ନ ଆଖଡ଼ାରୁ ଅଳ୍ପ ଅଳ୍ପ ସଂଖ୍ୟାରେ ସାଧୁସନ୍ଥମାନେ ପର୍ଯ୍ୟାୟକ୍ରମେ ଆସି ଶାହି ସ୍ନାନ କରୁଛନ୍ତି । ସୁରକ୍ଷା ଓ ଭିଡ଼ ନିୟନ୍ତ୍ରଣ ବନ୍ଦୋବସ୍ତ ଆହୁରି କଡ଼ା କଡ଼ି ହୋଇଥିବା ବେଳେ, ଆକାଶରୁ ପୁଷ୍ପବୃଷ୍ଟି କରୁଛି ହେଲିକପ୍ଟର । ଆଜି ୧୦ କୋଟିରୁ ଅଧିକ ଶ୍ରଦ୍ଧାଳୁ ବୁଡ଼ ପକାଇବେ ବୋଲି ଆକଳନ କରାଯାଉଛି ।
ମକର ସଂକ୍ରାନ୍ତି ଓ ମୌନୀ ଅମାବାସ୍ୟା ଶାହି ସ୍ନାନ ପରେ, ବସନ୍ତ ପଞ୍ଚମୀରେ ରହିଛି ତୃତୀୟ ତଥା ଚଳିତ ମହାକୁମ୍ଭର ଅନ୍ତିମ ଶାହି ସ୍ନାନ ସୁଯୋଗ। ଏଥିସହ ଫେବୃଆରୀ ୧୨ ମାଘ ପୂର୍ଣ୍ଣିମା ଓ ଫେବୃଆରୀ ୨୬ ମହାଶିବରାତ୍ରିରେ ବି ରହିଛି ମହାକୁମ୍ଭ ସ୍ନାନ ପାଇଁ ପବିତ୍ର ତିଥି ।
