MahaKumbh 2025: ଅମୃତ ଧାରା ପାଲଟିଛି ତ୍ରିବେଣୀ ସଂଗମ; ପ୍ରୟାଗରେ ଚାଲିଛି ପ୍ରଥମ ସାହି ସ୍ନାନ

ଗଭୀର ଆସ୍ଥା, ବିସ୍ତୃତ ଭକ୍ତି, ଆଉ ମୋକ୍ଷ ପ୍ରାପ୍ତିର ବିଶ୍ବାସ । ଉଛୁଳିଛି ତୀର୍ଥରାଜ ପ୍ରୟାଗ, ଅମୃତର ଧାରା ପାଲଟିଛି ତ୍ରିବେଣୀ ସଂଗମ । ଆଜି ମକର ସଂକ୍ରାନ୍ତି ଉପଲକ୍ଷେ ପ୍ରୟାଗରାଜରେ ଚାଲିଛି ପ୍ରଥମ ସାହି ସ୍ନାନ । ଭୋର ୫ଟା ୧୫ରୁ ବିଭିନ୍ନ ଆଖଡ଼ାର ସାଧୁସନ୍ଥଙ୍କ ସହ ଶ୍ରଦ୍ଧାଳୁଙ୍କ ସ୍ନାନ ଚାଲିଛି। ପ୍ରଥମେ ମହାନିର୍ବାଣୀ ଓ ଅଟଳ ଆଖଡ଼ା ସାଧୁମାନେ ବୁଡ଼ ପକାଇଛନ୍ତି। ତାପରେ ଅନ୍ୟ ଆଖଡ଼ା ଓ ଶ୍ରଦ୍ଧାଳୁଙ୍କୁ ସ୍ନାନ ଅନୁମତି ମିଳିଛି।

ଗତକାଲି ପ୍ରଥମ ଦିନରେ ବୁଡ଼ ପକାଇଥିଲେ ଦେଢ଼ କୋଟିରୁ ଅଧିକ ସାଧୁସନ୍ଥ ଓ ଶ୍ରଦ୍ଧାଳୁ। ଖାଲି ସନାତନୀ ହିନ୍ଦୁ ନୁହଁନ୍ତି ବହୁ ବିଦେଶୀ ମଧ୍ୟ ସଂଗମରେ ସ୍ନାନ କରି ପାଇଛନ୍ତି ଅନନ୍ୟ ଅନୁଭବ। ହୋମ ଯଜ୍ଞ ଓ ଆଳତୀ ସାଙ୍ଗକୁ ବେଦମନ୍ତ୍ରରେ ପ୍ରକମ୍ପିତ ହେଉଛି ପ୍ରୟାଗତୀର୍ଥର ପରିସୀମା। ଆଜି ଶ୍ରଦ୍ଧାଳୁଙ୍କ ସଂଖ୍ୟା ଦୁଇଗୁଣା ହେବା ନେଇ ଅନୁମାନ କରିଛି ଉତ୍ତର ପ୍ରଦେଶ ପ୍ରଶାସନ। ୧୪୪ ବର୍ଷର ପ୍ରତୀକ୍ଷା ପରେ ଗଙ୍ଗା-ଯମୁନା ଓ ସରସ୍ବତୀ ନଦୀଙ୍କ ମିଳନ ସ୍ଥଳୀରେ ଚାଲିଛି ମହାକୁମ୍ଭ।

ଗତକାଲି ପୌଷ ପୂର୍ଣ୍ଣମୀର ବ୍ରାହ୍ମ ମୁହୂର୍ତ୍ତ ଭୋର ୫ଟା ୩ ମିନିଟରୁ ଆରମ୍ଭ ହୋଇଥିଲା ମହାବୁଡ଼। ଏଥିସହ ମହାକୁମ୍ଭ ମେଳାର ମହା ଶୁଭାରମ୍ଭ ହୋଇଥିଲା। ପୁଣ୍ୟୋତ୍ବୟା ତ୍ରିଧାରାଙ୍କ ମିଳନ ସ୍ଥଳୀରେ ବୁଡ ପକାଇ ସମସ୍ତେ ହେଉଥିଲେ ଆନନ୍ଦିତ- କୃତ୍ୟ କୃତ୍ୟ । ଖାତିର ନଥିଲା ହାଡ଼ଭଙ୍ଗା ଶୀତ ରାତିକୁ, ଖାତିର ନଥିଲା ମାଇଲ ମାଇଲ ବାଟ ଚାଲିବାର ପାଦ ଯନ୍ତ୍ରଣାକୁ । ମହାକୁମ୍ଭର ପ୍ରଥମ ସ୍ନାନ ଯୋଗରେ ସାମିଲ ହେବାକୁ ରବିବାର ରାତିରୁ ସଂଗମ ତଟ ମୁହାଁ ହୋଇଥିଲେ ଲକ୍ଷ ଲକ୍ଷ ଶ୍ରଦ୍ଧାଳୁ ।

ଅଧିକ ପଢ଼ନ୍ତୁ: ତଙ୍ଗତୋଡ଼ା ସାଧୁ କିଏ ? ଯାହାଙ୍କୁ IAS ଠାରୁ ମଧ୍ୟ କଠିନ ପରୀକ୍ଷା ଦେବାକୁ ପଡ଼େ

କେବଳ ସନାତନୀ ହିନ୍ଦୁ କି ସାଧୁ-ସନ୍ଥ ନୁହଁନ୍ତି, ଆସ୍ଥାର ମହାକୁମ୍ଭରେ ସାମିଲ ହେବାକୁ ଆମେରିକା, ଫ୍ରାନସ, ରୁଷ ଓ ବ୍ରାଜିଲ ଭଳି ବିଶ୍ବର କୋଣ ଅନୁକୋଣରୁ ବି ମୋକ୍ଷ ପ୍ରଦାୟିନୀ ସଂଗମସ୍ଥଳକୁ ଛୁଟି ଆସିଛନ୍ତି ଅନେକ ବିଦେଶୀ ଶ୍ରଦ୍ଧାଳୁ। ତେବେ ସବୁଠୁ ଅଧିକ ଚର୍ଚ୍ଚାରେ ଅଛନ୍ତି ଆପଲ ଫାଉଣ୍ଡର ଷ୍ଟିଭ୍ ଜବସଙ୍କ ପତ୍ନୀ ଲରେନ୍ ପାୱେଲ ଜବସ୍ । ସେ ସଂଗମରେ ସ୍ନାନ କରି ପାଇଛନ୍ତି ଅନନ୍ୟ ଅନୁଭବ । ମହାକୁମ୍ଭର ପ୍ରଥମ ସ୍ନାନ ତିଥି ପୌଷ ପୂର୍ଣ୍ଣମୀରେ ଦେଢ଼ କୋଟିରୁ ଅଧିକ ଶ୍ରଦ୍ଧାଳୁ ବୁଡ଼ ପକାଇଥିବା ସୂଚନା ଦେଇଛନ୍ତି ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ।

ଅଧିକ ପଢ଼ନ୍ତୁ: ମହାକୁମ୍ଭ ମେଳାରେ ତୀର୍ଥଯାତ୍ରୀଙ୍କ ପାଇଁ AI ସ୍ମାର୍ଟ ପାର୍କିଂ ବ୍ୟବସ୍ଥା, ବିନା ଝିନଝଟରେ ରହୁଛି ଗାଡ଼ି