LIVE TV
ଅମୃତସର ଜାଲିଆଁଓ୍ୱାଲାବାଗ୍ ଗଣହତ୍ୟା କଥା କିଏ ବା ନଜାଣେ । ହେଲେ ଜାଣିଛନ୍ତି କି, ଭାରତର ଦ୍ୱିତୀୟ ଜାଲିଆଁଓ୍ୱାଲାବାଗ୍ କାହାକୁ କୁହାଯାଏ ? ଭଦ୍ରକ ଜିଲ୍ଲା ବାସୁଦେବପୁର ନିକଟସ୍ଥ ଇରମକୁ । ଏକଥା ହୁଏତ ବହୁ ଓଡ଼ିଆଙ୍କୁ ବି ଜଣାନଥିବ । ୧୯୪୨ ମସିହା ସେପ୍ଟେମ୍ବର ୨୮ରେ ଇରମରେ ବ୍ରିଟିଶ ଗୁଳିର ଶିକାର ହୋଇଥିଲେ ବହୁ ଓଡ଼ିଆ ସ୍ୱାଧୀନତା ସଂଗ୍ରାମୀ । ସେଇ ରକ୍ତଭିଜା ମାଟିର କାହାଣୀକୁ ଦର୍ଶକଙ୍କ ଆଗରେ ୱେବସିରିଜ ଭାବେ ଭେଟିଦେବାକୁ ଯାଉଛି ତରଙ୍ଗ ପ୍ଲସ । ଓଟିଟି ପ୍ଲାଟଫର୍ମ ତରଙ୍ଗ ପ୍ଲସରେ ରିଲିଜ ହେବାକୁ ଯାଉଛି ୱେବସିରିଜ ରକ୍ତତୀର୍ଥ । ପୂର୍ବରୁ ଟିଜର୍ ରିଲିଜ୍ ହୋଇ ସାରିଥିବା ବେଳେ ଆଜି ରକ୍ତତୀର୍ଥର ଟ୍ରେଲର୍ ରିଲିଜ୍ ହୋଇଛି ।
ସ୍ୱାଧୀନତା ସଂଗ୍ରାମ ତଥା ଭାରତ ଛାଡ଼ ଆନ୍ଦୋଳନ ପୃଷ୍ଠଭୂମିରେ ଖାଲି ମାଟିର କଥା ନୁହେଁ; ଏକ ମୌଳିକ କାହାଣୀକୁ ନେଇ ଓଟିଟି ପ୍ଲାଟଫର୍ମ ତରଙ୍ଗ ପ୍ଲସରେ ଖୁବଶୀଘ୍ର ରିଲିଜ ହେବାକୁ ଯାଉଛି ତରଙ୍ଗ ସିନେ ପ୍ରଡକସନ୍ ନିର୍ମିତ ୱେବସିରିଜ ରକ୍ତତୀର୍ଥ । ଇରମ୍ ଗଣହତ୍ୟା ଉପରେ ଆଧାରିତ ତରଙ୍ଗ ପ୍ଲସର ଏହି ୱେବସିରିଜରେ ମୁଖ୍ୟ ଭୂମିକାରେ ଅଭିନୟ କରିଛନ୍ତି ଅଭିଷେକ, କୁକିଜ୍ ଓ ରିଷି ପ୍ରମୁଖ କଳାକାର । ମୁଖ୍ୟ କାର୍ଯ୍ୟନିର୍ବାହୀ ପ୍ରଯୋଜକ ଅଛନ୍ତି ଦେବୀଦତ୍ତ ମହାନ୍ତି। ନିର୍ଦ୍ଦେଶନା ଦେଇଛନ୍ତି ସୁଶାନ୍ତ ମଣି ଓ ସିରିଜ୍ର କ୍ରିଏଟିଭ୍ ହେଡ୍ ଦାୟିତ୍ୱରେ ଅଛନ୍ତି ଓଡ଼ିଶା ଟେଲିଭିଜନ୍ ନେଟ୍ୱର୍କର କ୍ରିଏଟିଭ୍ ହେଡ୍ ରଞ୍ଜନ ଶତପଥି ।
Also Read
ଅଧିକ ପଢ଼ନ୍ତୁ: ବର୍ବରତାର କାହାଣୀ କହିବ ‘ରକ୍ତତୀର୍ଥ’
ଆଜିକୁ ୮୦ ବର୍ଷ ତଳର କଥା । ଦେଶସାରା ଜଳୁଥାଏ ଭାରତ ଛାଡ଼ ଆନ୍ଦୋଳନର ବହ୍ନି । ୧୯୪୨ ସେପ୍ଟେମ୍ବର ୨୮ରେ ଇରମରେ ଇଂରେଜ ସରକାର ବିରୋଧରେ ମେଳି କରୁଥାନ୍ତି ୫ହଜାରରୁ ଅଧିକ ସ୍ୱାଧୀନତା ସଂଗ୍ରାମୀ । ହେଲେ ଏହାକୁ ଦମନ କରିବା ପାଇଁ ଚାରିପଟୁ ଘେରି ନିରସ୍ତ୍ର ସଂଗ୍ରାମୀଙ୍କ ଉପରକୁ ଆଖିବୁଜା ଗୁଳି ଚଳାଇଥିଲା କ୍ରୁର ବ୍ରିଟିଶ ପୋଲିସ । ସେଇଠି ଟଳିପଡ଼ିଲେ ଓଡ଼ିଶାର ଏକମାତ୍ର ମହିଳା ସହିଦ ପରି ବେଓ୍ୱାଙ୍କ ସମେତ ୨୯ ଜଣ ଓଡ଼ିଆ ବୀର । ଆହତ ହେଲେ ୫୦ରୁ ଅଧିକ ।
ଏହି ଘଟଣାକୁ ପରଦାରେ ଉତାରିବାକୁ ବେଶ୍ ପରିଶ୍ରମ କରିବାକୁ ପଡ଼ିଛି ରକ୍ତତୀର୍ଥ ଟିମକୁ । ପ୍ରାକ୍-ସ୍ୱାଧୀନ ଭାରତର ପରିବେଶ ଓ ପରିପାଟୀକୁ ଓଡ଼ିଆ ଦର୍ଶକଙ୍କ ଆଗରେ ଅବିକଳ ପରସିବାକୁ ହୋଇଛି ଭରପୁର ପ୍ରୟାସ । ଭିଣ୍ଟେଜ୍ କାର୍, ବ୍ରିଟିଶ ଅମଳର କୋଠା, ଇଂରେଜ ଭୂମିକାରେ ବିଦେଶୀ କଳାକାରଙ୍କୁ ସାମିଲ କରାଯାଇଛି । କାହାଣୀର ମୌଳିକତା ଦୃଷ୍ଟିରୁ ଏହା ଦର୍ଶକଙ୍କ ମନକୁ ଛୁଇଁପାରିବ ବୋଲି ଆଶା ରଖିଛନ୍ତି ନିର୍ମାତା ।
