Illegal Ganja: ଗଞ୍ଜେଇ କାରବାର ଅଭିଯୋଗ, ଦାରିଙ୍ଗବାଡି ଆସି ଗିରଫ କଲା ହରିୟାଣା ପୋଲିସ୍

ଗଞ୍ଜେଇ କାରବାର ଅଭିଯୋଗରେ ୧୫ ଶହ କିଲୋମିଟର ଦୂର ଆସି ହରିୟାଣା ପୋଲିସ ଜଣେ ବେପାରୀକୁ ଦାରିଙ୍ଗବାଡ଼ି ଅଞ୍ଚଳରୁ ଉଠାଇ ନେଇଛି । ଏହି ବେପାରୀକୁ ଧରିବା ପାଇଁ ହରିୟାଣାର ଫରିଦାବାଦ ପୋଲିସ ଗତ ଦୁଇ ଦିନ ଧରି ଦାରିଙ୍ଗବାଡ଼ିରେ ଡେରା ପକାଇଥିଲା । ଫରିଦାବାଦରେ ଗିରଫ ହୋଇଥିବା ଗଞ୍ଜାମ ଜିଲ୍ଲା ପୁରୁଷୋତ୍ତମ ଅଂଚଳର ପ୍ରଦୀପ ବିଷୋୟୀ ନାମକ ଗଞ୍ଜେଇ ମାଫିଆକୁ ଧରି ହରିଆଣା ପୋଲିସ କନ୍ଧମାଳ ଜିଲ୍ଲାର ଦାରିଙ୍ଗବାଡ଼ିରେ ପହଞ୍ଚିଥିଲା । ଗଞ୍ଜେଇ କାରବାରରେ ସେ କାହାଠାରୁ ଗଞ୍ଜେଇ କିଣିଥିଲା ଏବଂ କାରବାରର ମୂଳ ଉତ୍ସ କେଉଁଠି ସେ ନେଇ ସ୍ଥାନୀୟ ପୋଲିସ ସହାୟତାରେ ଖୋଜି ବାହାର କରିଛି ।

ପ୍ରଦୀପ ବିଷୋୟୀକୁ ଗିରଫ କରାଯିବା ପରେ ଏବେ ଦାରିଙ୍ଗବାଡ଼ି ଥାନା ଅନ୍ତର୍ଗତ ଗସାପାଙ୍ଗା ଅଂଚଳର ବେଲାଳସେନ ରୂପା ମାଝୀଙ୍କୁ ପୋଲିସ ଗିରଫ କରିଛି । ବାହାର ରାଜ୍ୟର ପୋଲିସ କାହିଁକି ଦାରିଙ୍ଗବାଡି ଆସିଛି, ସେ ନେଇ ହଠାତ୍ କେହି କିଛି ବୁଝିପାରିନଥିଲେ । ତେବେ ଜଣକୁ ଗିରଫ କରାଯିବା ପରେ ପୋଲିସ ଆସିବାର କାରଣ ଜଣାପଡିଥିଲା । ମାଓ ଉପଦ୍ରୁତ ଆଦିବାସୀ ଅଧ୍ୟୁଷିତ ଅଞ୍ଚଳରୁ ଅଭିଯୁକ୍ତକୁ ଉଠାଇ ନେବା ଘଟଣାରେ ଅଞ୍ଚଳବାସୀ ଚକିତ ହୋଇ ପଡିଛନ୍ତି । ଅଭିଯୁକ୍ତମାନେ ଗିରଫ ହେବା ପରେ ଗ୍ରାମବାସୀ ଦାରିଙ୍ଗବାଡ଼ି ଥାନାକୁ ଆସି ଅଭିଯୁକ୍ତକୁ ଛାଡି ଦେବା ଲାଗି ପୋଲିସ ନିକଟରେ ନେହୁରା ହୋଇଥିଲେ ।

ଅଧିକ ପଢ଼ନ୍ତୁ: କନ୍‌ଷ୍ଟେବଳଙ୍କୁ ୨୦ ବର୍ଷ ଜେଲ୍‌, ଜରିମାନା 

ହରିୟାଣା ପୋଲିସ ସମ୍ପୃକ୍ତ ଯୁବକକୁ ଗିରଫ କରି ସାଥିରେ ନେଇଯାଇଛି । ୧୧ କିଲୋଗ୍ରାମ ଗଞ୍ଜେଇ କାରବାର ଅଭିଯୋଗରେ ହରିୟାଣା ଫରିଦାବାଦ ପୋଲିସ ଏକ ସ୍କୋର୍ପିଓରେ ଆସିଥିଲେ । ଦୀର୍ଘ ୧୫ ଶହରୁ ଉର୍ଦ୍ଧ୍ୱ କିଲୋମିଟର ଦୂର ଅତିକ୍ରାନ୍ତ କରି ଆସିଥିଲା ପୋଲିସ । ପ୍ରଦୀପ ବିଷୋୟୀ ଫରିଦାବାଦରେ ଗଞ୍ଜେଇ କାରବାର କରିବା ବେଳେ ପୋଲିସ ହାତରେ ଧରା ପଡିଥିଲା । ସେ କେବେ ଠାରୁ ଏବଂ କେଉଁ ଅଞ୍ଚଳରୁ ଗଞ୍ଜେଇ ଆଣି ହରିୟାଣା ରାଜ୍ୟରେ କାରବାର କରୁଥିଲା ସେ ନେଇ ସମସ୍ତ ତଥ୍ୟ ଜାଣିବା ପରେ ହରିୟାଣା ପୋଲିସ କନ୍ଧମାଳ ଲିଙ୍କ ଥିବା ଜାଣିବାକୁ ପାଇଥିଲା । ପରେ ଦାରିଙ୍ଗବାଡି ଆସି ଅଭିଯୁକ୍ତକୁ ଗିରଫ କରିବାରେ ସକ୍ଷମ ହୋଇଛି ।

ଅଧିକ ପଢ଼ନ୍ତୁ: ଏହି ଚାଷରେ ବହୁତ ରୋଜଗାର, ଆଦିବାସୀ ଅଧ୍ୟୁଷିତ ଗାଁରେ ଫୁଟିଲା ହସ