Devotees Cheated on Khaja Weight: ସାବଧାନ ! ପୁରୀରୁ ଖଜା କିଣୁଛନ୍ତି  କି ? ହୋଇପାରନ୍ତି ଠକେଇର ଶିକାର...

ପୁରୀ ଯାଉଛନ୍ତି, ଦିଅଁ ଦର୍ଶନ କରୁଛନ୍ତି ଆଉ ଘର ପାଇଁ ଖଜା କିଣୁଛନ୍ତି  କି ? ତେବେ ସାବଧାନ, ଆପଣ ଓଜନ ଠକେଇର ଶିକାର ହୋଇପାରନ୍ତି । ଏବେ ଏଭଳି ଏକ ଅଭିଯୋଗ ଆସିବା ପରେ ଏହାକୁ ନେଇ ଚର୍ଚ୍ଚା ।  

ପୁରୀ ବଡ଼ ଦାଣ୍ଡରେ ଖଜା କିଣି ହଟହଟା ହେଲେ ଭକ୍ତ। ଓଜନରେ ଠକେଇର ଶିକାର ହୋଇଛନ୍ତି । ଗୋଟେ କିଲୋ ଜାଗାରେ ଗ୍ରାହକଙ୍କୁ ୭ ଶହ ଗ୍ରାମ ଦେଇ ଠକୁଛନ୍ତି । ବ୍ରହ୍ମପୁରରୁ ଆସିଥିବା କିଛି ଭକ୍ତ ଏନେଇ ଅଭିଯୋଗ ଆଣିଛନ୍ତି । ମହାପ୍ରଭୁଙ୍କୁ ଦର୍ଶନ କରିବା ପରେ ଘର ଓ ବନ୍ଧୁମାନଙ୍କ ପାଇଁ ପୁରୀ ଖଜା ନେବାକୁ ବୁଲୁଥିବା ବେଳେ ଶ୍ରୀମନ୍ଦିର କାର୍ଯ୍ୟାଳୟ ନିକଟ ଗଳିରେ ଥିବା ଖଜା ଦୋକାନରୁ ୨୦ କିଲୋ ଖଜା କିଣିଥିଲେ ।  ହେଲେ ତାକୁ ପରବର୍ତ୍ତୀ ସମୟରେ ଅନ୍ୟ ଏକ ଦୋକାନରେ ଓଜନ କରିବାରୁ  ୧୪ କିଲୋ ଖଜା ଜଣା ପଡ଼ିଥିଲା। ଅର୍ଥାତ ଖଜା କିଲୋଗ୍ରାମ ପିଛା ୩୦୦ ଗ୍ରାମ କମ । ଏହାକୁ ନେଇ ଖଜା ଦୋକାନୀଙ୍କ ସହ ଗ୍ରାହକଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । 

ଅଧିକ ପଢ଼ନ୍ତୁ: ଦେଶ ଭକ୍ତି ପାଇଁ ବାଧା ଦିଏନି ବୟସ; ପ୍ରମାଣିତ କଲେ କୁନି ଯୋଦ୍ଧା

ତେବେ ଘଟଣାସ୍ଥଳରେ ପୋଲିସ ପହଞ୍ଚି ଖଜା ଦୋକାନୀ , ଖଜା ଏବଂ ମେସିନକୁ ଜବତ କରିବା ସହ ସିଂହଦ୍ୱାର ଥାନାରେ ଅଟକ ରଖିଥିଲେ । କେବଳ ଓଜନରେ ଠକେଇ ନୁହେଁ ତଳେ ପଡିଥିବା ଖଜାକୁ ବି ପ୍ୟାକିଂ କରି ବିକ୍ରି ହେଉଥିବା ଜଣାପଡ଼ିଛି ।  

ଅନ୍ୟପଟେ ପୁରୀରେ ଏହିଭଳି ଚାଲିଥିବା ବେଳେ ପ୍ରଶାସନ ପକ୍ଷରୁ ଓଜନ ମେସିନ ଚଢାଉ ଦେଖିବାକୁ ମିଳୁନଥିବାରୁ ଅସନ୍ତୋଷ ପ୍ରକାଶ ପାଇଛି।