Plane Crash: ପତ୍ନୀଙ୍କ ଚିତାଭସ୍ମ ଧରି ଆସିଥିଲେ, ଶବ ହୋଇଗଲେ

ଠିକ୍ ସପ୍ତାହକ ତଳେ ପ୍ରାଣ ହରାଇଥିଲେ ପତ୍ନୀ । ବିମାନ ଦୁର୍ଘଟଣାରେ ଚାଲିଗଲା ସ୍ୱାମୀଙ୍କ ଜୀବନ । ବାପାମାଆଙ୍କ ମତ୍ୟୁ ପରେ ଏବେ ତାଙ୍କ ପରିବାରରେ କେବଳ ଦୁଇ ଝିଅ । ଏହି ଅନାଥ ଦୁଇ ଝିଅଙ୍କ ମଧ୍ୟରୁ ଜଣକର ବୟସ ୮ ବର୍ଷ ଓ ଅନ୍ୟ ଜଣକର ବୟସ ୪ ବର୍ଷ । ଏବେ ଅସହାୟ ହୋଇପଡିଛନ୍ତି ଏହି ଦୁଇ ଶିଶୁ ।

ବିମାନ ଦୁର୍ଘଟଣାରେ ମୃତ୍ୟୁବରଣ କରିଛନ୍ତି ଲଣ୍ଡନର ଅର୍ଜୁନ ପାଟୋଲିଆ । ସେ ଲଣ୍ଡନରେ ରୁହନ୍ତି । ଏକ ସପ୍ତାହ ତଳେ ତାଙ୍କ ପତ୍ନୀଙ୍କର ଦେହାନ୍ତ ହୋଇଥିଲା । ହେଲେ ବଞ୍ଚିଥିବା ବେଳେ ପତ୍ନୀ ତାଙ୍କ ସ୍ୱାମୀଙ୍କୁ ଗୋଟିଏ ଅନୁରୋଧ କରିଥିଲେ । ମୋର ଦେହାନ୍ତ ପରେ ମୋ ଚିତାଭସ୍ମକୁ ଗୁଜରାଟର ଆମରେଲି ଜିଲ୍ଲାରେ ଥିବା ଆମ ଗାଁରେ ମୋ ଜନ୍ମସ୍ଥାନରେ ନେଇ ସଂସ୍କାର କରାଇବ ବୋଲି କହିଥିଲେ ପତ୍ନୀ ଭାରତୀବେନ୍ । ପରଲୋକଗତ ପତ୍ନୀଙ୍କ କଥା ରକ୍ଷା କରିବାକୁ ତାଙ୍କ ସ୍ୱାମୀ ଅର୍ଜୁନ ଲଣ୍ଡନରୁ ଗୁଜରାଟ ଆସିଥିଲେ । ଚିତାଭସ୍ମ ପାତ୍ରକୁ ଫୁଲରେ ସଜାଇ ଆଣିଥିଲେ ଗୁଜରାଟର ଆମରେଲିକୁ । ତାଙ୍କ ଗାଁକୁ ଯାଇ ଆତ୍ମୀୟସ୍ୱଜନଙ୍କ ସହ ମିଶି ସଂସ୍କାର ବି କରିଥିଲେ । ଗାଁରେ ସବୁ କାମ ସରିବା ପରେ ସେ ଫେରୁଥିଲେ ଲଣ୍ଡନ ।

ଅଧିକ ପଢ଼ନ୍ତୁ: ଲକି ନମ୍ବର ହିଁ ପାଲଟି ଗଲା ବିଜୟ ରୂପାନୀଙ୍କ ପାଇଁ ସବୁଠୁ ଅନଲକି, ଜାଣନ୍ତୁ କେମିତି...

ସେ ଭାରତ ଆସିବା ବେଳେ ତାଙ୍କ ଦୁଇ ଝିଅଙ୍କୁ ସାଙ୍ଗରେ ଆଣିନଥିଲେ । କହିଥିଲେ, ତୁମେ ରୁହ, ମୁଁ କାମ ସାରି ଫେରିଆସିବି । ଅର୍ଜୁନ ପତ୍ନୀଙ୍କ କଥା ରଖି ଭାରତ ଆସିଥିଲେ । ହେଲେ ଲଣ୍ଡନ ଫେରିଯିବେ ବୋଲି ଦୁଇ ଝିଅଙ୍କୁ ଦେଇଥିବା କଥା ରଖିପାରିଲେନି । ଜୁନ୍ ୧୨ ତାରିଖରେ ଅହମଦାବାଦରେ ଘଟିଥିବା ଏୟାର ଇଣ୍ଡିଆ ବିମାନ ଦୁର୍ଘଟଣାରେ ସେ ପ୍ରାଣ ହରାଇଛନ୍ତି ।

ସେହିପରି ରାଜସ୍ଥାନର ପ୍ରତୀକ ଯୋଶୀ ଗତ ୬ ବର୍ଷ ଧରି ଲଣ୍ଡନରେ ସଫ୍ଟୱେର ଇଞ୍ଜିନିୟର ଭାବେ କାମ କରୁଥିଲେ। ସ୍ୱାମୀଙ୍କ ସହ ଲଣ୍ଡନରେ ରହିବାକୁ ସ୍ତ୍ରୀ ଡାକ୍ତର କୋମି ଦାସ୍ ଦୁଇଦିନ ତଳେ ଚାକିରିରୁ ଇସ୍ତଫା ଦେଇଥିଲେ। ତିନି ପିଲାଙ୍କୁ ନେଇ ଅହମ୍ମଦାବାଦରୁ ଲଣ୍ଡନ ଯାଉଥିଲେ ପୂରା ପରିବାର । ହେଲେ ଭୟଙ୍କର ଦୁର୍ଘଟଣାରେ ପ୍ରତୀକଙ୍କ ପରିବାରର ସମସ୍ତଙ୍କର ମୃତ୍ୟୁ ଘଟିଛି। ଏହି ଦୁର୍ଭାଗ୍ୟପୂର୍ଣ ଘଟଣାକୁ ନେଇ ଏବେ ଶୋକରେ ବୁଡ଼ିଛି ସାରା ରାଜସ୍ଥାନ।

ଅଧିକ ପଢ଼ନ୍ତୁ: ବିମାନ ନିଆଁରେ ଛାରଖାର ହୋଇଗଲା ଖୁଶବୁଙ୍କ ଖୁସି, ୪ ମାସ ପରେ ସ୍ୱାମୀଙ୍କୁ ଭେଟିଥାନ୍ତେ ନବବଧୂ, ହେଲେ...